സംസ്ഥാന എന്‍ജിനീയറിങ് പ്രവേശന പരീക്ഷയില്‍ 51665 പേര്‍ യോഗ്യത നേടി. ഫാര്‍മസി പ്രവേശന പരീക്ഷയില്‍ 39908 പേരും യോഗ്യത നേടി. എന്‍ജിനീയറിങ്/ ഫാര്‍മസി പ്രവേശന പരീക്ഷകളുടെ സ്‌കോര്‍ പ്രവേശന പരീക്ഷാ കമീഷണറുടെ www.cee.kerala.gov.in...  വെബ്‌സൈറ്റില്‍ പ്രസിദ്ധീകരിച്ചു. എന്‍ജിനീയറിങ് പ്രവേശന പരീക്ഷയെഴുതിയ 73437 പേരില്‍ 51665 പേര്‍ക്കാണ് രണ്ട് പേപ്പറുകളിലും മിനിമം പത്ത് മാര്‍ക്ക് വീതം നേടി യോഗ്യത നേടാനായത്. 3328 വിദ്യാര്‍ഥികളുടെ ഫലം വിവിധ കാരണങ്ങളാല്‍ തടഞ്ഞുവെച്ചിട്ടുണ്ട്.

യോഗ്യതാ പരീക്ഷയില്‍ (ഹയര്‍സെക്കന്‍ഡറി/ തത്തുല്യം) ഫിസിക്‌സ്, കെമിസ്ട്രി, മാത്തമാറ്റിക്‌സ് എന്നിവയില്‍ നേടിയ മാര്‍ക്കും പ്രവേശന പരീക്ഷയില്‍ നേടിയ സ്‌കോറും തുല്യമായി പരിഗണിച്ചുള്ള സമീകരണ പ്രക്രിയയിലൂടെയാണ് എന്‍ജിനീയറിങ് റാങ്ക് പട്ടിക പ്രസിദ്ധീകരിക്കുക. ജൂണ്‍ ഏഴിനകം റാങ്ക് പട്ടിക പ്രസിദ്ധീകരിക്കും.