കേരളം മൊത്തം കാതോര്‍ക്കുന്ന മണ്ഡലമാണ് തിരുവനന്തപുരം. ഇവിടെ ബിജെപി ജയിക്കുമോ എന്നാണ് എല്ലാവരും ഉറ്റുനോക്കുന്നത്. അതിന് നാളെ വൈകുന്നേരത്തോടെ തീരുമാനമാകുമെന്നാണ് അറിയുന്നത്. അതേ സമയം ആ ഓരോ നിമിഷവും ആകാക്ഷ നിറഞ്ഞതാണ്. തിരുവനന്തപുരത്തെ ഫലം ഫോട്ടോഫിനിഷിലൂടെയായിരിക്കുമെന്ന എക്‌സിറ്റ് പോള്‍ പ്രവചനം കൂടി പുറത്തു വന്നതോടെ ആകാംക്ഷയുടെ മുള്‍മുനയിലാണ് സ്ഥാനാര്‍ഥികളും പാര്‍ട്ടി നേതാക്കളും അണികളും മറ്റു വോട്ടര്‍മാരും.

10 മുതല്‍ 14 വരെ മേശകളാണ് സജ്ജീകരിക്കുന്നത്. നാളെ രാവിലെ 8നാണ് വോട്ടെണ്ണല്‍ ആരംഭിക്കുക. ആദ്യം തപാല്‍ ബാലറ്റുകള്‍ എണ്ണും. സ്‌ട്രോങ് റൂമില്‍നിന്ന് വോട്ടിങ് യന്ത്രങ്ങള്‍ അതതു നിയമസഭാ മണ്ഡലങ്ങള്‍ക്കായി നിശ്ചയിച്ചിട്ടുള്ള ഹാളുകളിലേക്കു മാറ്റും. തിരഞ്ഞെടുപ്പ് നിരീക്ഷകന്‍, അസിസ്റ്റന്റ് റിട്ടേണിങ് ഓഫിസര്‍, രാഷ്ട്രീയ പാര്‍ട്ടി പ്രതിനിധികള്‍ എന്നിവരുടെ സാന്നിധ്യത്തിലാകും യന്ത്രങ്ങള്‍ പുറത്തെടുക്കുക. 

ഓരോ വോട്ടെണ്ണല്‍ ഹാളിലും സൗകര്യമനുസരിച്ച് 10 മുതല്‍ 14 വരെ മേശകളാണ് സജ്ജീകരിച്ചിട്ടുള്ളത്. ഓരോ ടേബിളിലും ഒരു മൈക്രോ ഒബ്‌സര്‍വറും കൗണ്ടിങ് സൂപ്പര്‍വൈസറും കൗണ്ടിങ് അസിസ്റ്റന്റും ഉള്‍പ്പടെ 3 പേരാണ് ഉണ്ടാകുക. രാവിലെ എട്ടരയോടെ ആദ്യ ഫലസൂചന അറിയാനാകുമെന്നാണ് പ്രതീക്ഷ.

തിരുവനന്തപുരം മണ്ഡലത്തില്‍ 1305 ബൂത്തുകളും ആറ്റിങ്ങല്‍ മണ്ഡലത്തില്‍ 1410 ബൂത്തുകളുമാണുള്ളത്. ഒരു നിയമസഭാ മണ്ഡലത്തിലെ വോട്ടുകള്‍ എണ്ണാന്‍ ഹാളില്‍ എത്ര മേശ ഒരുക്കിയിട്ടുണ്ടോ അത്രയും ബൂത്തുകളുടെ വോട്ടിങ് മെഷീനുകള്‍ ആദ്യം ഓരോ മേശയിലേക്കു മാറ്റും. 10 മുതല്‍ 14 മേശകള്‍ വരെയാണ് ഓരോ മണ്ഡലങ്ങളുടെയും വോട്ടുകള്‍ എണ്ണാന്‍ സജ്ജീകരിച്ചിട്ടുള്ളത്.

ഉദാഹരണത്തിന് 12 മേശയാണുളളതെങ്കില്‍ ഒന്നാം നമ്പര്‍ ബൂത്തു മുതല്‍ 12ാം നമ്പര്‍ ബൂത്തു വരെയുള്ള മെഷീനുകള്‍ മേശകളിലേക്കു മാറ്റി എണ്ണിത്തുടങ്ങും. ഇവ എണ്ണിക്കഴിയുമ്പോള്‍ ആദ്യ റൗണ്ട് പൂര്‍ത്തിയാകും. ഇതേസമയം സമാന്തരമായി ഓരോ നിയമസഭാ മണ്ഡലത്തിലെയും ഹാളുകളില്‍ എണ്ണല്‍ നടക്കും. ഓരോ റൗണ്ട് കഴിയുമ്പോഴും ലീഡ് നില പുറത്തുവിടും. 

തിരുവനന്തപുരം, ആറ്റിങ്ങല്‍ മണ്ഡലങ്ങളിലെ 2715 മെഷീനുകളും എണ്ണക്കഴിഞ്ഞ ശേഷമാണ് വിവിപാറ്റ് മെഷീനുകള്‍ എണ്ണുക. ഓരോ മണ്ഡലത്തിലും 5 ബത്തേുകള്‍ നറുക്കിട്ടെടുത്ത് അവിടുത്തെ വിവിപാറ്റ് മാത്രമാണ് എണ്ണുക. ആകെ എണ്ണേണ്ടി വരുക 70 വിവിപാറ്റുകളാണെങ്കിലും ഒരേസമയം 14 ഇടത്ത് എണ്ണല്‍ നടക്കുന്നതിനാല്‍ 7 വിവിപാറ്റ് എണ്ണുന്ന സമയമേ ആകെ എടുക്കൂ. വൈകിട്ട് ആറോടെ മാത്രമേ വിവിപാറ്റ് എണ്ണിക്കഴിയൂ എങ്കിലും മെഷീനിലെ അവസാന ലീഡ് നിലവച്ച് വിജയിയെ ഉച്ചയോടെ അറിയാം. 

നാലാഞ്ചിറ മാര്‍ ഇവാനിയോസ് വിദ്യാനഗറിലാണ് ജില്ലയിലെ രണ്ടു ലോക്‌സഭാ മണ്ഡലങ്ങളിലെയും വോട്ടുകള്‍ എണ്ണുന്നത്. നിയമസഭാ മണ്ഡലം തിരിച്ച് 14 ഹാളുകളിലായാണ് എണ്ണല്‍. വോട്ടെണ്ണല്‍ കേന്ദ്രത്തിലേക്കുള്ള പ്രവേശനത്തിന് കര്‍ശന നിയന്ത്രണമുണ്ട്. ഉദ്യോഗസ്ഥരെയും മാധ്യമപ്രവര്‍ത്തകരെയും മാത്രമേ വോട്ടെണ്ണല്‍ കേന്ദ്രത്തിലേക്കു പ്രവേശിപ്പിക്കൂ. മൊബൈല്‍ ഫോണ്‍ അനുവദിക്കില്ല.