സി.പി.എം പ്രവര്ത്തകനെ ബോംബെറിഞ്ഞ് കൊലപ്പെടുത്തിയ കേസില് അഞ്ച് ആര്.എസ്.എസ് പ്രവര്ത്തകര് കുറ്റക്കാരെന്ന് കോടതി. ആര്.എസ്.എസ് നേതാവ് വത്സന് തില്ലങ്കേരിയെ കോടതി വെറുതെ വിട്ടു
സി.പി.എം പ്രവര്ത്തകനെ ബോംബെറിഞ്ഞ് കൊലപ്പെടുത്തിയ കേസില് അഞ്ച് ആര്.എസ്.എസ് പ്രവര്ത്തകര് കുറ്റക്കാരെന്ന് കോടതി. ആര്.എസ്.എസ് നേതാവ് വത്സന് തില്ലങ്കേരിയെ കോടതി വെറുതെ വിട്ടു. സിപിഎം പ്രവര്ത്തകന് ഇരിട്ടി പുന്നാട് കോട്ടക്കുന്നിലെ കാണിക്കല്ലുവളപ്പില് യാക്കൂബിനെ (24) ബോംബെറിഞ്ഞ് കൊലപ്പെടുത്തിയ കേസില് ആര്.എസ്.എസ് പ്രവര്ത്തകരായ ആര്എസ്എസ് മുന് താലൂക്ക് കാര്യവാഹകും പേരാവൂര് പ്രഗതികോളേജ് പ്രിന്സിപ്പലുമായകീഴൂര് മീത്തലെപുന്നാട് ദീപംഹൗസില് ശങ്കരന് (48), അനുജനും ബിജെപി മണ്ഡലം പ്രസിഡന്റുമായ വിലങ്ങേരി മനോഹരന് എന്ന മനോജ് (42), ആര്എസ്എസ് മുന്താലൂക്ക് ശിക്ഷണ്പ്രമുഖും കെഎസ്ആര്ടിസി കണ്ടക്ടറുമായ തില്ലങ്കേരി ഊര്പ്പള്ളിയിലെ തെക്കന്വീട്ടില് ടി വി വിജേഷ് (38), കീഴൂര് കോട്ടത്തെക്കുന്നിലെ കൊടേരി പ്രകാശന് എന്ന ജോക്കര് പ്രകാശന് (48), മുന് താലൂക്ക് കാര്യവാഹകും പ്രഗതികോളേജ് മുന് അധ്യാപകനുമായ കീഴൂര് പുന്നാട് കാറാട്ട്ഹൗസില് പി കാവ്യേഷ് (40) എന്നിവരെയാണ് അഡീഷനല് ജില്ലസെഷന്സ് കോടതി കുറ്റക്കാരെന്ന് കണ്ടെത്തിയത്.
2006 ജൂണ് 13ന് രാത്രിയാണ് കേസിനാസ്പദമായ സംഭവം. സുഹൃത്തിന്റെ വീട്ടില് സംസാരിച്ചുകൊണ്ടിരുന്ന യാക്കൂബിനെ പിന്തുടര്ന്നെത്തിയ അക്രമികള് ബോംബെറിഞ്ഞ് കൊല്ലുകയായിരുന്നു. 23 സാക്ഷികളെ കോടതിമുമ്പാകെ വിസ്തരിച്ചു. 49 രേഖകളും തൊണ്ടിമുതലുകളും കോടതി പരിഗണിച്ചു. പതിനാലാംപ്രതിയായ വത്സന് തില്ലങ്കേരിക്കെതിരെ ഗൂഢാലോചനകുറ്റമായിരുന്നു ചുമത്തിയിരുന്നത്. തില്ലങ്കേരി കാര്ക്കോട് അമ്മുഅമ്മ സ്മൃതിമന്ദിരത്തില് വെച്ച് പ്രതികള് ഗൂഢാലോചന നടത്തിയതെന്നായിരുന്നു ആരോപണം. ഇക്കാര്യം സംശയാതീതമായി തെളിയിക്കാന് പ്രോസിക്യുഷന് സാധിച്ചില്ല.
സംഭവദിവസം രാത്രി ഒമ്പതേകാലിനാണ് യാക്കൂബിനെ അക്രമിസംഘം ബോബെറിഞ്ഞ് കൊന്നത്. കല്ലിക്കണ്ടി ബാബുവിന്റെ വീട്ടില് സുഹൃത്തുക്കളായ പുതിയപുരയില് ഷാനവാസ്, കല്ലിക്കണ്ടി സുധീഷ്, സുഭാഷ്, ആഷിക്ക് എന്നിവര്ക്കൊപ്പം സംസാരിച്ചുകൊണ്ടിരിക്കെയാണ് അക്രമം. വീടിന്റെ പിറക് വശത്തുംകൂടി വാള്, ബോംബ്, മഴു, ഇരുമ്പ്വടി എന്നീ മാരക ആയുധങ്ങളുമായി എത്തിയ സംഘത്തെ കണ്ട് യാക്കൂബ് രക്ഷപ്പെടാന് ശ്രമിച്ചപ്പോഴാണ് യാക്കൂബിനെ ബോംബെറിഞ്ഞ് കൊന്നത്.
അഞ്ചാംപ്രതിയായ കാവ്യേഷ് എറിഞ്ഞ ബോംബ് യാക്കൂബിന്റെ തലയുടെ പിറകില്കൊണ്ടാണ് പൊട്ടിയത്. പുതിയപുരയില് ജമീലയുടെ വീടിന്റെ അടുക്കളഭാഗത്തെ വരാന്തയിലാണ് ബോംബേറേറ്റ് തലചിതറി വീണത്. ഒന്നാംപ്രതിയായ ശങ്കരന് ബോംബെറില് പരിക്കേറ്റ യാക്കൂബിന്റെ അടുത്ത് ചെന്നിട്ട് ഒരുത്തന് മരിച്ചെടാന്ന് വിളിച്ച് പറഞ്ഞു. അത് കേട്ട് പ്രദേശത്തുള്ളവര് വന്നപ്പോള് കൈയിലുണ്ടായിരുന്ന ബോംബെറിഞ്ഞ് ഭീതിസൃഷ്ടിച്ച ശേഷം ഓടിരക്ഷപ്പെട്ടു. അക്രമത്തില് ഷാനവാസ്, ബാബു, സുധീഷ് എന്നിവര്ക്കും പരിക്കേറ്റിരുന്നു. ഏറെ കോളിളക്കമുണ്ടാക്കിയ കേസില് പ്രോസിക്യുഷന്വേണ്ടി അഡീഷനല് പബ്ലിക്പ്രോസിക്യൂട്ടര് അഡ്വ കെ പി ബിനിഷ, അഡ്വ ജാഫര്നല്ലൂര് എന്നിവര് ഹാജരായി.
https://www.facebook.com/Malayalivartha