ലോക്‌സഭാ തെരഞ്ഞെടുപ്പിന്റെ ഫലസൂചനകള്‍ പുറത്ത് വരുന്ന ആദ്യ മണിക്കൂറുകളില്‍ യു.ഡി.എഫ് തരംഗം. എക്‌സിറ്റ് പോളുകളിലെ പ്രവചനങ്ങള്‍ക്കും മേലെ കേരളത്തില്‍ യു.ഡി.എഫ് വ്യക്തമായ ആധിപത്യം നേടിയിരിക്കുന്നു. പോസ്റ്റല്‍ വോട്ടുകള്‍ എണ്ണിത്തീര്‍ന്ന ശേഷം ഇലക്ട്രോണിക്‌സ് വോട്ടിംഗ് മെഷീനുകള്‍ എണ്ണിത്തുടങ്ങിയപ്പോള്‍ മുതല്‍ യു.ഡി.എഫ് തേരോട്ടം ആരംഭിക്കുകയായിരുന്നു. ഇടയ്ക്ക് ചില സീറ്റുകളില്‍ നേരിയ മുന്‍തൂക്കം എല്‍.ഡി.എഫിനും എന്‍.ഡി.എയ്ക്കും ലഭിച്ചെങ്കിലും അതെല്ലാം പെട്ടെന്ന് മാറിമറിയുന്ന കാഴ്ചയാണുള്ളത്. സര്‍ക്കാര്‍ വിരുദ്ധതരംഗമാണ് എല്ലാ മണ്ഡലങ്ങളിലും തുടക്കം മുതല്‍ പ്രതിഫലിക്കുന്നത്. 

യു.ഡി.എഫ് വിജയപ്രതീക്ഷിക്കാത്ത മണ്ഡലങ്ങളില്‍ പോലും അവര്‍ക്ക് ഏറെ മുന്നേറ്റം ഉണ്ടാക്കാനായി. കാസര്‍കോട്ട് രാജ്‌മോഹന്‍ ഉണ്ണിത്താന്‍ നടത്തുന്ന അപ്രതീക്ഷിത കുതിപ്പ് തന്നെ ഉദാഹരണം. 14,000ത്തോളം വോട്ടുകളുടെ ലീഡാണ് ആദ്യ ഒന്നര മണിക്കൂറില്‍ രാജ്‌മോഹന്‍ ഉണ്ണിത്താന്‍ നേടിയത്. രാഹുല്‍ഗാന്ധിയും വി.കെ ശ്രീകണ്ഠനും പിന്നാലെയാണ് ഉണ്ണിത്താന്‍. ആലത്തൂരില്‍ രമ്യാഹരിദാസ് ആദ്യം മുതല്‍ വ്യക്തമായ ആധിപത്യം നിലനിര്‍ത്തുന്നു. കൊല്ലത്ത് എന്‍.കെ പ്രേമചന്ദ്രനും കോട്ടയത്ത് തോമസ് ചാഴിക്കാടനും എറണാകുളത്ത് ഹൈബി ഈഡനും തൃശൂരില്‍ ടി.എന്‍ പ്രതാപനും എതിരാളികളെ അമ്പരപ്പിക്കുന്നു.

പ്രചരണത്തിനിടെ ആശുപത്രിയിലായിട്ടും ചാലക്കുടിയില്‍ ബെന്നിബഹാന് വ്യക്തമായ ലീഡ് നിലനിര്‍ത്താനായി. ആറ്റിങ്ങലില്‍ ഇടത്‌കോട്ട പൊളിച്ച് അടൂര്‍പ്രകാശ് ഏവരേയും ഞെട്ടിച്ചിരിക്കുകയാണ്. പോസ്റ്റല്‍ വോട്ടുകള്‍ എണ്ണിത്തീര്‍ന്നതോടെ എല്‍.ഡി.എഫിലെ സമ്പത്തിന്റെ നിലപരുങ്ങലിലായി. ഇടുക്കിയില്‍ 10 ശതമാനം വോട്ട് എണ്ണിത്തീര്‍ന്നപ്പോള്‍ ഡീന്‍ കുര്യാക്കോസിന് 20000 വോട്ടിന്റെ ലീഡ് നേടാനായി. പാലക്കാട് വി.കെ ശ്രീകണ്ഠന്‍ വലിയ ലീഡിലാണ് തുടക്കം മുതല്‍ മുന്നോട്ട് പോകുന്നത്. മലപ്പുറത്തും പൊന്നാനിയിലും യു.ഡി.എഫ് വിജയം ഉറപ്പാണ്. മാവേലിക്കരയില്‍ കൊടിക്കുന്നിലല്ലാതെ മാറ്റാരും ചിത്രത്തിലേയില്ല. ആലപ്പുഴയില്‍ ഷാനിമോള്‍ ഉസ്മാന്‍ ആവേശകരമായി മുന്നേറുന്നു. 

കോഴിക്കോട്ടെ ഒളിക്യാമറാ വിവാദങ്ങളൊന്നും എം.കെ രാഘവനെ തളര്‍ത്താനായില്ല. പത്തനംതിട്ടയില്‍ ചില യിടങ്ങളിലെ വോട്ട് എണ്ണിയപ്പോള്‍ കെ.സുരേന്ദ്രന്‍ മുന്നിലെത്തിയെങ്കിലും പിന്നീട് യു.ഡി.എഫിലെ ആന്റോ ആന്റണിക്ക് തിരിഞ്ഞ് നോക്കേണ്ടിവന്നു. കണ്ണൂര്‍ കോട്ട കെ.സുധാകരന്‍ വീണ്ടും പിടിച്ചെടുക്കുന്ന സ്ഥിതിയിലേക്കാണ് കാര്യങ്ങള്‍ നീങ്ങുന്നു. വയനാട്ടില്‍ രാഹുല്‍ ഗാന്ധിയും വടകരയില്‍ കെ. മുരളീധരനും തുടക്കം മുതല്‍ വ്യക്തമായ ലീഡില്‍ മുന്നേറുകയാണ്. ഈ മുന്നേറ്റം യു.ഡി.എഫിന് വലിയ വിജയം സമ്മാനിക്കുമെന്ന് ഉറപ്പാക്കാം.