തിരുവനന്തപുരത്തെ പാറ്റൂരിലെ വിവാദ ഭൂമിയുടെ രേഖകള്‍ നാലുവര്‍ഷം മുന്‍പ് ജല അതോറിറ്റിയി ഒരു ഉന്നത ഉദ്യോഗസ്ഥന്‍ കടത്തികൊണ്ട് പോയതായി വെളിപ്പെടുത്തല്‍. ഇതുസംബന്ധിച്ച് മുന്‍ ചീഫ് എന്‍ജിനീയര്‍ അയച്ച കത്താണ് പുറത്തായത്. പൊതുപ്രവര്‍ത്തകനായ ജോയ് കൈതാരം പൊലീസ് ഉന്നതര്‍ക്ക് നല്‍കിയ പരാതിയിലാണ് കത്ത് ഉള്ളത്. 

 ഫ്‌ളാറ്റ് കമ്പനി കയ്യേറ്റം നടത്തിയെന്ന് വ്യക്തമാക്കുന്ന ജലഅതോറിറ്റി ഭൂമിയുടെ രേഖകള്‍ നാലുവര്‍ഷം മുന്‍പ് വകുപ്പിലെ ഉന്നതന്‍ കടത്തിക്കൊണ്ടു പോയെന്നാണ് വെളിപ്പെടുത്തല്‍. പാറ്റൂര്‍ ഇടപാടില്‍ ജല അതോറിറ്റി എംഡി അശോക് കുമാര്‍ 2011 നവംബര്‍ 18ന് പാറ്റൂര്‍ സ്വീവറേജ് ഡിവിഷന്‍ ഓഫീസിലെത്തി വിവാദ ഭൂമിയുടെ മുഴുവന്‍ രേഖകളും ബലമായി കൈക്കലാക്കി എന്നാണ് കത്തിലെ പരാമര്‍ശം. അന്ന് എക്‌സിക്യൂട്ടീവ് എന്‍ജിനീയറായിരുന്ന ദേവകുമാറിന്റെ സാന്നിധ്യത്തിലായിരുന്നു ഇതെന്നും അദ്ദേഹം നേരിട്ട് ഇക്കാര്യം തന്നെ അറിയിച്ചതാണെന്നും കൃഷ്ണകുമാര്‍ പറയുന്നു. പാറ്റൂര്‍ ഭൂമിയുടെ കാര്യത്തിലടക്കം എംഡിയുടെ താല്‍പര്യങ്ങള്‍ക്ക് വഴങ്ങാത്തതിന്റെ പേരില്‍ വിരമിച്ച ശേഷവും പ്രതികാര നടപടികള്‍ തുടരുകയാണെന്നും കത്തില്‍ ചൂണ്ടിക്കാട്ടുന്നു. ഇതടക്കം പാറ്റൂര്‍ ക്രമക്കേടിന്റെ മറ്റ് വശങ്ങളെക്കുറിച്ച് ക്രൈംബ്രാഞ്ച് അന്വേഷണം ആവശ്യപ്പെട്ട് ജോയ് കൈതാരം ഡിജിപിക്ക് പരാതി നല്‍കി. 

പാറ്റൂരില്‍ ഫ്‌ളാറ്റ് സമുച്ചയം പണിയാനായി സ്വകാര്യ കമ്പനി ജല അതോറിറ്റി വക ഭൂമി കയ്യേറിയെന്ന് സ്ഥിരീകരിച്ച് വിജിലന്‍സ് എഡിജിപി, ലോകായുക്തയില്‍ റിപ്പോര്‍ട്ട് സമര്‍പ്പിച്ചിരുന്നു. ഭൂമിയെ സംബന്ധിച്ച നിര്‍ണായക രേഖകള്‍ കാണാനില്ലെന്ന് ഈ റിപ്പോര്‍ട്ടില്‍ ഒന്നിലേറെ ഇടങ്ങളില്‍ ചൂണ്ടിക്കാണിച്ചിട്ടുണ്ട്. ഈ ഘട്ടത്തിലാണ് ജല അതോറിറ്റിയില്‍ നിന്ന് വിരമിച്ച ചീഫ് എന്‍ജിനീയര്‍ കെ.പി. കൃഷ്ണകുമാര്‍ രണ്ടുമാസം മുന്‍പ് നല്‍കിയ കത്ത് പുറത്താകുന്നത്.
ചീഫ് സെക്രട്ടറി ഇ.കെ. ഭരത്ഭൂഷണ്‍, റവന്യു പ്രിന്‍സിപ്പല്‍ സെക്രട്ടറിയായിരുന്ന നിവേദിത പി. ഹരന്‍ തുടങ്ങിയവരെ പ്രതിചേര്‍ത്ത് കേസ് റജിസ്റ്റര്‍ ചെയ്യണമെന്ന് ആവശ്യപ്പെട്ട് വിജിലന്‍സ് ഡയറക്ടര്‍ക്കും ജോയ് കൈതാരം കത്ത് നല്‍കി. വിജിലന്‍സ് റിപ്പോര്‍ട്ട് കഴിഞ്ഞയാഴ്ച പരിഗണിച്ച ലോകായുക്ത പക്ഷെ, തിരുവനന്തപുരം ജില്ലാ കലക്ടര്‍ മുതല്‍ താഴേക്കുള്ള റവന്യു ഉദ്യോഗസ്ഥരുടെ പേരിലാണ് നടപടിക്ക് തുടക്കമിട്ടത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha