ഭൂമിയെ വലംവയ്ക്കുന്ന രാജ്യാന്തര ബഹിരാകാശ നിലയം (ഇന്റര്‍നാഷണല്‍ സ്പെയ്സ് സെന്റര്‍) വ്യഴാഴ്ച കേരളത്തില്‍ ദൃശ്യമാകും. സന്ധ്യയ്ക്ക് 7.38 മുതലാണ് കേരളത്തില്‍ നിന്നു ദൃശ്യമാകുംവിധം ആകാശത്തൂടെ ഐഎസ്എസ് കടന്നു പോകുന്നത്.

ഒരു നക്ഷത്രം കണക്കെ വടക്കു പടിഞ്ഞാറ് ദിശയില്‍ ഉദിച്ചുയരുന്ന ബഹിരാകാശ നിലയം 7.41-ന് തലയ്ക്കു മുകളില്‍ ശോഭയോടെ കാണാം. 7.43-ന് തെക്കു കിഴക്കായി അസ്തമിക്കുകയും ചെയ്യും. മഴമേഘങ്ങളുടെ തടസമില്ലെങ്കില്‍ നഗ്‌ന നേത്രങ്ങള്‍ക്കൊണ്ട് വ്യക്തമായി ഇത് കാണാനാകും. ദക്ഷിണേന്ത്യയിലെ എല്ലാ സംസ്ഥാനങ്ങളില്‍ ഉള്ളവര്‍ക്കും ശ്രീലങ്കയില്‍  ഉള്ളവര്‍ക്കും ഇന്ന് ഐഎസ്എസ് ഭൂമിയെ വലം വയ്ക്കുന്നത് കാണാനാകും.

നക്ഷത്രംപോലെ തിളങ്ങുന്ന ബഹിരാകാശനിലയം ഭൂമിയില്‍ നിന്നു നോക്കുമ്പോള്‍ എളുപ്പത്തില്‍ തിരിച്ചറിയാന്‍ സാധിക്കും. ആകാശത്ത് ഇപ്പോള്‍ സൂര്യനും ചന്ദ്രനും കഴിഞ്ഞാല്‍ ഏറ്റവും തിളക്കമുള്ളത് ബഹിരാകാശനിലയത്തിനാണ്.

അമേരിക്ക, റഷ്യ, കാനഡ, ജപ്പാന്‍, ബ്രസീല്‍, യൂറോപ്യന്‍ സ്പേസ് ഏജന്‍സിയിലെ ആറു രാജ്യങ്ങള്‍ എന്നിവര്‍ ചേര്‍ന്നു നിര്‍മിച്ച വലിയ ബഹിരാകാശനിലയമാണ് ഐഎസ്എസ്. ഭൂമിയില്‍നിന്ന് 330 കിലോമീറ്ററിനും 435 കിലോമീറ്ററിനും ഇടയ്ക്കുള്ള ഭ്രമണപഥത്തിലാണ് സഞ്ചാരം. സെക്കന്‍ഡില്‍ 7.66 കിലോമീറ്ററാണ് ഇതിന്റെ സഞ്ചാരവേഗം. മണിക്കൂറില്‍ 27,600 കിലോമീറ്റര്‍.

92.69 മിനിറ്റുകൊണ്ട് ഭൂമിയെ ഒരുതവണ വലംവയ്ക്കും. ദിവസം 15.54 തവണ ഇത് ഭൂമിയെ ചുറ്റും. 4,19,455 കിലോഗ്രാമാണ് ഇതിന്റെ ഭാരം. 72.8 മീറ്റര്‍ നീളവും 108.5 മീറ്റര്‍ വീതിയുമാണ് ഇതിനുള്ളത്. 935 ഘനമീറ്റര്‍ വ്യാപ്തിയുള്ള ഭാഗത്ത് താമസയോഗ്യമാണ്. ആറുപേര്‍ക്കു താമസിക്കാനുള്ള സൗകര്യമാണ് ഇതിനുള്ളത്.