വഴിനടക്കാന്‍ അനുവദിക്കാത്ത സവര്‍ണ്ണര്‍ക്കെതിരെ സമരം ചെയ്ത ഡി.വൈ.എഫ്.ഐ നേതാവിനെ വെട്ടിക്കൊന്നു. ഡിവൈഎഫ്.ഐ ജില്ലാ ട്രഷറര്‍ അശോകാണ് (25) കൊല്ലപ്പെട്ടത്. തമിഴ്‌നാട്ടിലെ തഞ്ചാവൂരിന് അടുത്ത് കരയിരുപ്പ് ഗ്രാമത്തില്‍ ഇന്നലെ രാത്രി പത്തെരയ്ക്കാണ് നാടിനെ നടുക്കിയ ദാരുണ സംഭവം നടന്നത്. സംഭവത്തെ തുടര്‍ന്ന് നാട്ടുകാര്‍ തിരുനെല്‍വേലി - മധുര ഹൈവേ ഉപരോധിച്ചു. പ്രദേശത്ത് ഇപ്പോഴും സംഘര്‍ഷം നിലനില്‍ക്കുകയാണ്. സംഘടനയുടെ എല്ലാ സമരങ്ങള്‍ക്കും തൊട്ടുകൂടായ്മ നിര്‍മാര്‍ജന മുന്നണിയുടെ സമരങ്ങള്‍ക്കും മുന്നില്‍ നിന്നിരുന്ന അശോക് കഴിഞ്ഞ ദിവസം നീറ്റ് പരീക്ഷയിന്മേല്‍ ഡിവൈഎഫ്‌ഐ നടത്തിയ സമരങ്ങളിലും പങ്കെടുത്തിരുന്നു. സ്ഥലത്ത് ജാതിയമായ അടിച്ചമര്‍ത്തലുകള്‍ നടക്കുന്നെന്ന് പൊലീസിനെ അറിയിച്ചിട്ടും നടപടികള്‍ സ്വീകരിച്ചില്ലെന്ന് ഗ്രാമവാസികള്‍ ആരോപിക്കുന്നു. ദളിത് വിഭാഗത്തില്‍ പെട്ട അശോകിന് ഉയര്‍ന്ന ജാതിയില്‍ പെട്ടവരാണ് കൊലപ്പെടുത്തിയതെന്ന് പൊലീസ് സംശയിക്കുന്നു. 

ഗംഗയ്‌കൊണ്ടന്‍ എന്ന സ്ഥലത്തെ ടയര്‍ കടയില്‍ ജോലി ചെയ്യുന്ന അശോക് ഇന്നലെ രാത്രി പത്തെരയോടെയാണ് കരയിരുപ്പ് ബസ് സ്റ്റോപ്പിലെത്തിയതെന്ന് പൊലീസ് പറഞ്ഞു. അവിടെ വെച്ച് ചിലയാളുകള്‍ തടഞ്ഞ് വെച്ച് മര്‍ദ്ദിച്ച ശേഷം മാരകായുധങ്ങള്‍ ഉപയോഗിച്ച് കൊലപ്പെടുത്തുകയായിരുന്നു. ശേഷം മൃതദേഹം റെയില്‍വേ പാളത്തില്‍ ഉപേക്ഷിച്ചു. സംഭവം അറിഞ്ഞ് ബന്ധുക്കളും ഗ്രാമവാസികളും സ്ഥലത്തെത്തിയത് സംഘര്‍ഷത്തിനിടയാക്കി. ഇവരെ തടഞ്ഞ ശേഷമാണ് പൊലീസ് മൃതദേഹം പോസ്റ്റ്‌മോര്‍ട്ടത്തിനായി കൊണ്ടുപോയത്. . തിരുനെല്‍വേലി കമ്മീഷ്ണര്‍ എന്‍. ഭാസ്‌ക്കരന്റെ നേതൃത്വത്തില്‍ വലിയ പൊലീസ് സംഘം പ്രദേശത്ത് ക്യാമ്പ് ചെയ്യുന്നുണ്ട്. വഴിനടക്കുന്നതുമായി ബന്ധപ്പെട്ട് അശോകിന്റെ അമ്മയെ സവര്‍ണജാതിയില്‍ പെട്ടവര്‍ ഭീഷണിപ്പെടുത്തിയിരുന്നു. ഇതിനെതിരെ പ്രത്യക്ഷ പ്രതിഷേധം നടത്തുകയും അവരെ ചോദ്യം ചെയ്യുകയും ചെയ്തതിനാണ് അശോകിനെ ആക്രമിച്ച് കൊലപ്പെടുത്തിയതെന്ന് ഗ്രാമവാസികള്‍ ആരോപിക്കുന്നു. 

ഗ്രാമങ്ങളില്‍ അയിത്തം ഇല്ലാതാക്കാന്‍ തമിഴ്‌നാട് സര്‍ക്കാര്‍ കുറച്ച് വര്‍ഷങ്ങള്‍ക്ക് മുമ്പ് 10 ലക്ഷം രൂപ പ്രോല്‍സാഹന സമ്മാനം പ്രഖ്യാപിച്ചിരുന്നു. തമിഴ്‌നാട്ടിലെ ഗ്രാമങ്ങളില്‍ ജാതിയത പലവിധത്തില്‍ ഉണ്ടെന്ന് ബോധ്യപ്പെട്ടതിന്റെ അടിസ്ഥാനത്തിലായിരുന്നു അത്. പല ഗ്രാമങ്ങളിലും ജാതിയുടെ അടിസ്ഥാനത്തില്‍ മതിലുകള്‍ പണിതിട്ടുണ്ട്. ദളിതര്‍ക്കും മറ്റും ക്ഷേത്രങ്ങളില്‍ പ്രവേശിക്കാന്‍ കഴിയാത്ത സ്ഥിതിയുണ്ട്. സവര്‍ണര്‍ സഞ്ചരിക്കുന്ന റോഡുകളിലൂടെ താഴ്ന്ന ജാതിയില്‍ പെട്ടവര്‍ നടന്നാല്‍ വഴക്കുണ്ടാകുന്നത് പതിവാണ്. തമിഴ്‌നാട് അണ്‍ടച്ചബിലിറ്റി ഇറാഡിക്കേഷന്‍ ഫ്രണ്ട് നേരത്തേ നടത്തിയ സര്‍വേയില്‍ തമിഴ്‌നാട്ടിലെ 22 ജില്ലകളില്‍ 86 തരത്തില്‍ അയിത്തം നിലനില്‍ക്കുന്നുവെന്നു കണ്ടെത്തിയിരുന്നു. 

ജാതി മാറി വിവാഹം കഴിക്കുന്നവരെ കൊലപ്പെടുത്തുന്ന സംഭവങ്ങള്‍ തമിഴ് ഗ്രാമങ്ങളില്‍ വലിയ സംഭവമല്ല. സഹോദരങ്ങളെ പോലും കൊല്ലാന്‍ ഇവര്‍ മടിക്കുകയില്ല. തേവര്‍ സമുദായത്തിലെ സമ്പന്ന കുടുംബത്തില്‍ ജനിച്ച കൗസല്യ, പിന്നോക്ക ജാതിയില്‍പെട്ട, നിര്‍ധന യുവാവായ ശങ്കറിനെ പ്രണയിച്ചതോടെ കൗസല്യയുടെ വീട്ടുകാര്‍ക്ക് അപമാനമായി. അവര്‍ ശങ്കറിനെ കൊലപ്പെടുത്തി. അന്ന് ശങ്കറിന് 20 വയസ്. ഉദുമല്‍പേട്ട നഗരത്തിലിട്ട് പട്ടാപ്പകല്‍ കൗസല്യയുടെ അച്ഛനും അമ്മയും അമ്മാവനും ഗുണ്ടകളും ചേര്‍ന്ന് ഇരുവരെയും വെട്ടിവീഴ്ത്തുകയായിരുന്നു. ശങ്കര്‍ ആശുപത്രിയില്‍ മരിച്ചെങ്കിലും കൗസല്യ ദീര്‍ഘകാലം ശങ്കറിന്റെ വീട്ടില്‍ ജീവിച്ച ശേഷം കഴിഞ്ഞ വര്‍ഷം ദളിത് യുവാവായ ശക്തിയെ വിവാഹം കഴിച്ച് ജീവിക്കുന്നു.