സംസ്ഥാനത്തെ മിക്ക സ്വകാര്യ ആശുപത്രികളിലും ചികിത്സ തേടി എത്തുന്ന രോഗികളെ നിര്‍ബന്ധിച്ച് ആശുപത്രിയുടെ ഫാര്‍മസിയില്‍ നിന്ന് മരുന്നും, അവരുടെ ലാബുകളില്‍ ടെസ്റ്റും നടത്തിക്കുന്നത് രോഗിയുടെ അവകാശത്തിന്റെ ലംഘനമായിട്ടും ഇന്ത്യന്‍ മെഡിക്കല്‍ അസോസിയേഷന്‍ അടക്കം ഇടപെടുന്നില്ലെന്ന് ആക്ഷേപം. ആരോഗ്യരംഗത്തെ വിഷയങ്ങളില്‍ ഇടപെടുകയും അഭിപ്രായം പറയുകയും ചെയ്യുന്ന ഐ എം എ ഇത്തരം നഗ്‌നമായ മനുഷ്യാവകാശ ലംഘനങ്ങളെ കുറിച്ച് മിണ്ടാറില്ലെന്ന് മുതിര്‍ന്ന മാധ്യമപ്രവര്‍ത്തകനായ റോയിമാത്യു ആരോപിക്കുന്നു. 2018 സെപ്റ്റംബറില്‍ കേന്ദ്ര ആരോഗ്യ മന്ത്രാലയം രോഗികളുടെ അവകാശങ്ങളടങ്ങിയ Charter of Patients Rights  ഭരണഘടനയുടെ അടിസ്ഥാനത്തിലുള്ള അവകാശമായി പ്രഖ്യാപിച്ചു് വെബ് സൈറ്റില്‍ പ്രസിദ്ധീകരിച്ചിട്ടുണ്ട്. പക്ഷേ, ഉപഭോക്തൃ സംഘടനകളോ ആരോഗ്യ പ്രവര്‍ത്തകരോ രോഗികളുടെ ഈ അവകാശത്തെക്കുറിച്ച് അധികമൊന്നും മിണ്ടാറില്ല.

ആരോഗ്യ മന്ത്രാലയം പ്രസിദ്ധീകരിച്ച രോഗികളുടെ 18 പ്രധാന അവകാശങ്ങള്‍ നടപ്പാക്കുന്നതില്‍ ആശുപത്രികളും ആരോഗ്യ പ്രവര്‍ത്തകരും അത്ര ജാഗരൂകരല്ല. ഇങ്ങനെയൊക്കെ അവകാശങ്ങള്‍ രോഗികള്‍ക്ക് ഉള്ളതായുള്ള പ്രചരണങ്ങളോ ആശയ പ്രചരണങ്ങളോ നടത്തുന്നതില്‍ കുറ്റകരമായ മൗനം ഇവരുടെ ഭാഗത്തുണ്ട്. 
മിക്ക ആശുപത്രികളിലെ ഫാര്‍മസികളേക്കാള്‍ കുറഞ്ഞ വിലയ്ക്ക് മരുന്നുകളും രോഗ പരിശോധനാ ടെസ്റ്റുകളും നടത്തുന്ന സാഹചര്യം നിലവിലുള്ളപ്പോള്‍ രോഗികളെ തെറ്റിദ്ധരിപ്പിച്ചും ഭീഷണിപ്പെടുത്തിയും മരുന്നു മേടിപ്പിക്കുകയും ടെസ്റ്റുകള്‍ നടത്തിക്കുകയും ചെയ്യുന്നതിന് മാറ്റം വരണം. ഡോക്ടറന്മാരുടേയും ആശുപത്രികളുടേയും നിയമ വിരുദ്ധ ഇത്തരം നടപടികളെക്കുറിച്ച് ഐഎംഎ ഇനിയെങ്കിലും നിലപാട് സ്വീകരിക്കണമെന്നും റോയി മാത്യു. 

രോഗിക്ക് ഇഷ്ടമുള്ള മരുന്ന് വിപണന കേന്ദ്രത്തില്‍ നിന്ന് മരുന്ന് വാങ്ങാനും ഇഷ്ട മുള്ള ലാബില്‍ പോയി ടെസ്റ്റ് നടത്താനും അവകാശമുണ്ടെന്ന് വളരെ അസന്നിഗ്ദ്ധമായി അവകാശപത്രികയില്‍ രേഖപ്പെടുത്തിയിട്ടുണ്ട്. ഇങ്ങിനെ വ്യക്തമായ മാര്‍ഗ നിര്‍ദേശമുള്ളപ്പോഴാണ്. ഡോക്ടറന്മാര്‍ സ്ഥാപിത താല്‍പര്യങ്ങള്‍ക്കായി അവര്‍ക്ക് താല്പര്യമുള്ള ഫാര്‍മസികളിലേക്കും ലാബിലേക്കും സ്‌കാന്‍ സെന്ററുകളിലേക്കും രോഗികളെ പറഞ്ഞു വിടുന്നത്. എന്തിനാണ് സ്വകാര്യ ആശുപത്രികള്‍ അവിടെ വരുന്ന രോഗികളെ നിര്‍ബന്ധിപ്പിച്ചും ഭീഷണിപ്പെടുത്തിയും മരുന്ന് വാങ്ങാനും ടെസ്റ്റ് നടത്താനും പ്രേരിപ്പിക്കുന്നത്. രോഗിയുടെ ഇഛയ്ക്കും മുകളില്‍ ഡോക്ടറിനും ആശുപത്രിക്കും അവകാശ മുണ്ടോ? കുറഞ്ഞ പക്ഷം രോഗിയോടോ അവരുടെ ബന്ധുക്കളോടൊ എങ്കിലും ആലോചിച്ചിട്ടു വേണ്ടെ ഇക്കാര്യത്തിലൊരു തീരുമാനമെടുക്കാന്‍. മരുന്നിന്റെ കൂറിപ്പടിയും പരിശോധനാ കുറിപ്പുമൊക്കെ രോഗിയുടെ കയ്യില്‍ കൊടുക്കുന്നതിനു പകരം ആശുപത്രി ഫാര്‍മസിയിലേക്കും ലാബിലേക്കും നേരെ വിടുന്നത് നിയമ വിരുദ്ധമല്ലേ? ഇഷ്ടമുള്ള സ്ഥലത്തു പോയി മരുന്ന് വാങ്ങാനും .ടെസ്റ്റ് നടത്താനുമുള്ള രോഗിയുടെ അവകാശം നിഷേധിക്കുകയല്ലേ?

ആശുപത്രികള്‍ നല്‍കുന്ന ചികിത്സാ സൗകര്യങ്ങളിലും മറ്റും ഈടാക്കുന്ന നിരക്കുകള്‍ക്ക് ഒരു ഏകീകരണം വേണം. തോന്നും പടിയാണ് ഓരോ ആശുപത്രിയും ഡോക്ടറന്മാരും ചികിത്സക്കും ടെസ്റ്റുകള്‍ക്കും. ചാര്‍ജ് ഈടാക്കുന്നത്. 90% ആശുപത്രികളിലും തീവെട്ടിക്കൊള്ളയാണ്. നിരക്കുകള്‍ ഒരു ആശുപത്രിയിലും എഴുതി പ്രദര്‍ശിപ്പിക്കാറില്ല. ശസ്ത്രക്രിയകളുടേയും ടെസ്റ്റുകളുടേയും രോഗികള്‍ക്ക് നല്‍ക്കുന്ന പ്രത്യേക ചികിത്സകളുടേയും നിരക്കുകള്‍ എഴുതി പ്രദര്‍ശിപ്പിക്കണമെന്നാണ് അവകാശ പത്രികയില്‍ പറയുന്നത്.