വനിതാ മതിലിന്റെ പിറ്റേന്ന് ശബരിമലയില്‍ ഫെമിനിസ്റ്റുകളെ കയറ്റിയ സര്‍ക്കാരിന് മതചിഹ്നങ്ങളെ അധിക്ഷേപിച്ച കാര്‍ട്ടൂണ്‍ പിന്‍വലിക്കാന്‍ ധൃതി. അവാര്‍ഡ് പ്രഖ്യാപിച്ച് 48 മണിക്കൂര്‍ കഴിഞ്ഞിട്ടും പ്രഖ്യാപനം പിന്‍വലിക്കാത്ത കേരള ലളിതകലാ അക്കാദമിയെ സര്‍ക്കാരും സാംസ്‌കാരിക വകുപ്പും ചേര്‍ന്നു വിരട്ടുന്നു . 

പ്രഖ്യാപനം പിന്‍വലിച്ചില്ലെങ്കില്‍ അക്കാദമി ചെയര്‍മാനെയും സെക്രട്ടറിയെയും പിന്‍വലിക്കാനാണ് സര്‍ക്കാര്‍ ആലോചിക്കുന്നത്. ഇക്കാര്യം ചെയര്‍മാനെയും സെക്രട്ടറിയെയും അറിയിച്ചു. 

അതേസമയം പാകിസ്ഥാനില്‍ കാര്‍ട്ടൂണും ആക്ഷേപഹാസ്യവും നിരോധിച്ചു കൊണ്ട് പ്രഖ്യാപനമുണ്ടായതായി കാര്‍ട്ടൂണ്‍ അക്കാദമി ആരോപിച്ചു. ന്യൂയോര്‍ക്ക് ടൈംസും രാഷ്ട്രീയ കാര്‍ട്ടൂണുകളുടെ പ്രസിദ്ധീകരണം നിര്‍ത്തി. ഇതേ ശൈലിയാണ് കേരളം പിന്തുടരുന്നതെന്ന് കാര്‍ട്ടൂണ്‍ അക്കാദമി പ്രഖ്യാപിച്ചു. 

എന്നാല്‍ ഓരോന്നിനും ഓരോ നയമുണ്ടെന്നും അതനുസരിച്ച് മാത്രമേ പ്രവര്‍ത്തിക്കാന്‍ കഴിയുകയുള്ളുവെന്നുമാണ് അക്കാദമിയുടെ നിലപാട്. ചെയര്‍മാന്‍ നേമം പുഷ്പരാജിന് പുരസ്‌കാര പ്രഖ്യാപനം പിന്‍വലിക്കാന്‍ താത്പര്യമുണ്ടെങ്കിലും അക്കാദമി ഭരണ സമിതിയില്‍ ഭിന്നാഭിപ്രായമുണ്ട്. അതെങ്ങനെ കരകയറ്റും എന്ന ചിന്തയിലാണ് ഭാരവാഹികള്‍. അതിനിടെ കാര്‍ട്ടൂണ്‍ അവാര്‍ഡ് പിന്‍വലിച്ചാല്‍ സര്‍ക്കാരിന്റെ മുഖം വികൃതമാകുമെന്നും ഇടത് ചിന്തകന്‍മാര്‍ ഉള്‍പ്പെടെയുള്ളവര്‍ രംഗത്തെത്തി. എന്നാല്‍ കാര്‍ട്ടൂണ്‍ പിന്‍ വലിച്ചില്ലെങ്കില്‍ കാണിച്ചു തരാം എന്ന നിലപാടിലാണ് കത്തോലിക്കാ സഭ.

കാര്‍ട്ടൂണ്‍ കലയ്ക്ക് എതിരെ അസഹിഷ്ണുതയുടെ ഇരുട്ട് അതിവേഗം വ്യാപിക്കുന്നത് ആശങ്കപ്പെടുത്തുന്നുവെന്ന് കേരള കാര്‍ട്ടൂണ്‍ അക്കാദമി അക്കാദമി പ്രസ്താവിച്ചു. കാര്‍ട്ടൂണില്‍ മാത്രമല്ല മറ്റു മേഖലകളിലും ഇതു വ്യാപിക്കുന്നുണ്ട്. അസഹിഷ്ണുത അതിരുകളില്ലാതെയാണ് നീളുന്നത്. കേരളത്തില്‍ കാര്‍ട്ടൂണിന് ലളിതകലാ അക്കാദമി അവാര്‍ഡ് നല്‍കിയതിനെച്ചൊല്ലി ഉയര്‍ന്ന വിവാദം ശക്തമായി തുടരുന്നു.

കാര്‍ട്ടൂണിനെ ചിരിയോടെ സ്വീകരിക്കാനുള്ള തുറന്ന മനസ്സ് സമൂഹത്തിന് നഷ്ടമാകുന്നത് ഖേദകരമാണ്. അടിസ്ഥാന രഹിതമായ ആരോപണങ്ങള്‍ ഉന്നയിച്ച് കാര്‍ട്ടൂണിസ്റ്റിനെ പ്രതിക്കൂട്ടില്‍ നിര്‍ത്തുന്നതിനെതിരെ കേരള കാര്‍ട്ടൂണ്‍ അക്കാദമി ശക്തമായി പ്രതിഷേധിച്ചു . ചിരിക്കും ചിന്തയ്ക്കും വിലങ്ങിടാനുള്ള നീക്കങ്ങള്‍ ഇരുട്ടിന്റെ വാഴ്ച കടന്നു വരുന്നതിന്റെ സൂചനയാണ്. അത് കേരളത്തിലാണെങ്കിലും പാകിസ്ഥാനിലാണെങ്കിലും അമേരിക്കയിലാണെങ്കിലും എതിര്‍ക്കപ്പെടേണ്ടതാണ്. പരിഷ്‌കൃത സമൂഹമെന്ന നിലയില്‍ കേരളം കൈവരിച്ച ധൈഷണികസ്വാതന്ത്ര്യവും കലാപാരമ്പര്യവും കാര്‍ട്ടൂണ്‍ പൈകൃതവും കാത്തു സൂക്ഷിക്കാന്‍ എല്ലാവരും ജാഗ്രത പുലര്‍ത്തണമെന്ന് അക്കാദമി അഭ്യര്‍ത്ഥിച്ചു

എന്നാല്‍ സി പി എമ്മില്‍ ഒരു വിഭാഗം കാര്‍ട്ടൂണ്‍ പിന്‍വലിക്കരുതെന്ന അഭിപ്രായക്കാരാണ്. ശബരിമലയില്‍ ശക്തമായ നിലപാട് സ്വീകരിച്ച സര്‍ക്കാര്‍ ക്രൈസ്തവ സഭകള്‍ക്ക് മുന്നില്‍ മുട്ടു മടക്കിയാല്‍ അത് നാണ കേടാവുമെന്ന് അവര്‍ ആരോപിക്കുന്നു. അതേസമയം സര്‍ക്കാരിന് ഇപ്പോഴും സഭകളെ ഭയമാണ്. ഫ്രാങ്കോ മുളയ്ക്കലിനെതിരെ അന്വേഷണം നടത്തുന്ന എസ്പിയെയും ഡി വൈ എസ്പിയെയും മാറ്റിയതിലൂടെ സര്‍ക്കാര്‍ അതാണ് തെളിയിച്ചത്. കന്യാസ്ത്രിമാര്‍ എന്തൊക്കെ കാണിച്ചാലും അത് മുഖവിലയ്‌ക്കെടുക്കാന്‍ സര്‍ക്കാര്‍ തയ്യാറല്ല. അതേ സമയം ശബരിമലയില്‍ വീണ്ടും സ്ത്രീകളെ കയറ്റുമെന്ന് സര്‍ക്കാര്‍ പ്രഖ്യാപിക്കുകയും ചെയ്യുന്നു. ചെങ്ങന്നൂര്‍ ഉപതെരഞ്ഞടുപ്പിന് ശേഷം ക്രൈസ്തവ സഭകള്‍ കാലുമാറിയതാണ് സര്‍ക്കാരിനെ വേദനിപ്പിക്കുന്നത് .

കോണ്‍ഗ്രസ് കാര്‍ട്ടൂണ്‍ വിഷയം ഏറ്റെടുക്കും. ചെന്നിത്തലയും ഉമ്മന്‍ ചാണ്ടിയും ഉള്‍പ്പെടെയുള്ള നേതാക്കള്‍ പരസ്യ പ്രതികരണം നടത്തി. എന്നാല്‍ സാംസ്‌കാരിക നായകര്‍ ഒരക്ഷരവും ഇതു വരെ മിണ്ടിയിട്ടില്ല.