മലയാളികള്‍ക്ക് ഗള്‍ഫ് കേരളം പോലെയാണ്. കാരണം അത്രയേറെ മലയാളികളാണ് ഗള്‍ഫിനെ ആശ്രയിച്ച് ജീവിക്കുന്നത്. ഗള്‍ഫിലെ ഓരോ ചലനവും മലയാളികള്‍ക്ക് പ്രിയപ്പെട്ടതാണ്. ഗള്‍ഫ് മേഖലയില്‍ നിന്നും അസ്വസ്തതകള്‍ ഉണ്ടാക്കുന്ന വാര്‍ത്തയാണ് വരുന്നത്. 

ഒമാന്‍ കടലിടുക്കിലൂടെ സഞ്ചരിക്കുകയായിരുന്ന രണ്ട് എണ്ണക്കപ്പലുകള്‍ക്ക് നേരെ ആക്രമണമുണ്ടാതോടെയാണ് കാര്യങ്ങള്‍ വഷളായത്. ഇതിന് പിന്നാലെ ഗള്‍ഫ് മേഖലയില്‍ യുദ്ധസമാനമായ സാഹചര്യം ഉണ്ടായിരിക്കുകയാണ്. നോര്‍വേ, തായ്‌വാന്‍ ടാങ്കറുകള്‍ക്ക് നേരെ ആക്രമണമുണ്ടായതായി അമേരിക്കയും ബ്രിട്ടനും സ്ഥിരീകരിച്ചിട്ടുണ്ട്. രണ്ട് കപ്പലുകളില്‍ നിന്നുള്ള അപായ സന്ദേശം ലഭിച്ചതിന് പിന്നാലെ അമേരിക്കന്‍ നാവികസേനയുടെ അഞ്ചാം കപ്പല്‍ പടയിലെ പടക്കപ്പലുകള്‍ മേഖലയിലേക്ക് തിരിച്ചു. സംഭവത്തിന് പിന്നാലെ ആഗോള വിപണിയില്‍ ക്രൂഡ് ഓയില്‍ വിലയും കുതിച്ചുയര്‍ന്നിട്ടുണ്ട്. ഇന്നലെ സൗദി അറേബ്യന്‍ നഗരമായ അബഹയിലെ വിമാനത്താവളത്തില്‍ ഹൂതി വിമതര്‍ നടത്തിയ മിസൈല്‍ ആക്രമണത്തില്‍ ഇന്ത്യന്‍ വംശജ അടക്കം 26 പേര്‍ക്ക് പരിക്കേറ്റതിന് പിന്നാലെയാണ് പുതിയ സംഭവവികാസങ്ങള്‍.

അതേസമയം, ആക്രമണത്തിന് ഇരയായ കൊക്കുവ കറേജസ്, ഫ്രണ്ട് ആല്‍ടയര്‍ എന്നീ കപ്പലുകളില്‍ നിന്നുള്ള 41 ജീവനക്കാരെ ഇറാനിയന്‍ സേന സുരക്ഷിതമായി രക്ഷിച്ചതായി ബി.ബി.സി റിപ്പോര്‍ട്ട് ചെയ്യുന്നു. ഇവരെ ജാസ്‌ക് തുറമുഖത്ത് എത്തിച്ചതായും ഇറാന്‍ മാദ്ധ്യമങ്ങളിലെ വാര്‍ത്തകളെ അടിസ്ഥാനമാക്കി ബി.ബി.സി റിപ്പോര്‍ട്ട് ചെയ്യുന്നു.എന്നാല്‍ ആക്രമണത്തിന് പിന്നില്‍ ഇറാനാണെന്നാണ് സൗദി അറേബ്യയും യു.എ.ഇയും അടക്കമുള്ള സഖ്യരാജ്യങ്ങള്‍ ആരോപിക്കുന്നത്. എന്നാല്‍ ഇക്കാര്യം ഇറാന്‍ നിഷേധിച്ചിട്ടുണ്ട്. അതിനിടെ തങ്ങള്‍ക്ക് പ്രാദേശിക സമയം രാവിലെ 6.12നും 07.00 മണിക്കും രണ്ട് കപ്പലുകളില്‍ നിന്നും അപായ സന്ദേശം ലഭിച്ചതായി ബഹ്‌റിനിലെ അമേരിക്കന്‍ നാവികസേനയുടെ അഞ്ചാം കപ്പല്‍പ്പടയുടെ വക്താവ് അറിയിച്ചിട്ടുണ്ട്.ഉടന്‍ തന്നെ അമേരിക്കന്‍ പടക്കപ്പലായ യു.എസ്.എസ് ബയ്ന്‍ബ്രിഡ്ജ് ഇവിടെത്തി കപ്പലുകള്‍ക്ക് സംരക്ഷണം നല്‍കിയതായും ഔദ്യോഗിക വൃത്തങ്ങള്‍ കൂട്ടിച്ചേര്‍ത്തു.

എന്നാല്‍ നോര്‍വെയുടെ കൊക്കുവ കറേജസ്‌കപ്പലിലുണ്ടായിരുന്ന 21 പേര്‍ കപ്പല്‍ ഉപേക്ഷിച്ച് ലൈഫ് ബോട്ടില്‍ രക്ഷപ്പെടുകയായിരുന്നുവെന്നാണ് സൗദി സഖ്യസേനാ വൃത്തങ്ങള്‍ പറയുന്നത്. സമീപമുണ്ടായിരുന്ന കോസ്റ്റല്‍ എയ്‌സ് എന്ന കപ്പലാണ് ഇവര്‍ക്ക് സഹായവുമായെത്തിയത്. കപ്പലിലെ ഒരാള്‍ക്ക് ചെറിയ പരിക്കുണ്ടെന്നും കപ്പല്‍ ഉടമകളായ ബി.എസ്.എം ഷിപ് മാനേജ്‌മെന്റ് പ്രതിനിധി അറിയിച്ചു. കപ്പല്‍ മുങ്ങാനുള്ള സാധ്യതയില്ല. ടാങ്കറിലുള്ള മെഥനോള്‍ സുരക്ഷിതമാണ്. ഫുജൈറയില്‍ നിന്ന് 70 നോട്ടിക്കല്‍ മൈലും ഇറാനില്‍ നിന്ന് 14 നോട്ടിക്കല്‍ മൈലും അകലെയായിരുന്നു കപ്പല്‍. 

തായ്‌വാന്റെ ദേശീയ എണ്ണ കോര്‍പറേഷനായ സി.പി.സി കോര്‍പിന്റെ എണ്ണ ടാങ്കറിന് നേരെയാണ് മറ്റൊരു ആക്രമണമുണ്ടായത്. ഫ്രണ്ട് ആല്‍ടയര്‍ എന്ന കപ്പലില്‍ 75,000 ടണ്‍ നാഫ്തയാണ് ഉണ്ടായിരുന്നത്. കപ്പലിലെ അംഗങ്ങളെയെല്ലാം രക്ഷപ്പെടുത്തി. ടോര്‍പിഡോ ആക്രമണമാണ് നടന്നതെന്നാണ് സൂചന. യു.എ.ഇയിലെ റുവൈസില്‍ നിന്ന് മടങ്ങുകയായിരുന്നു കപ്പല്‍.

അതിനിടെ എണ്ണ ടാങ്കറുകള്‍ക്ക് നേരെയുണ്ടായ ആക്രമണത്തിന് പിന്നാലെ ആഗോള വിപണിയില്‍ എണ്ണവിപണിയില്‍ വന്‍ വര്‍ദ്ധനവുണ്ടായി.മിഡില്‍ ഈസ്റ്റില്‍ നിന്നുള്ള എണ്ണവരവ് തടസപ്പെടുമോ എന്ന ആശങ്കയാണ് എണ്ണവിലവര്‍ദ്ധനവിന് കാരണമായി ചൂണ്ടിക്കാണിക്കപ്പെടുന്നത്.