കളികുറേ കണ്ടതാ... ശബരിമല വിഷയത്തില് ബിജെപിയുടെ കണ്ണിലെ കരടായി; പ്രധാനമന്ത്രിയെ ഗൗനിച്ചില്ല എന്ന വിഷയം ചൂണ്ടിക്കാട്ടി സ്ഥലം മാറ്റം നേരിട്ട യതീഷ് ചന്ദ്ര തൃശൂരില് തുടരും
അടുത്തിടെ ഏറെ വിവാദത്തില്പ്പെട്ട യുവ പോലീസ് ഉദ്യോഗസ്ഥനാണ് യതീഷ് ചന്ദ്ര. ഈ പോലീസ് ഉദ്യോഗസ്ഥന്റെ മികച്ച പ്രവര്ത്തനങ്ങളില് കേരളം പലപ്പോഴും കയ്യടിച്ചിട്ടുണ്ട്. എന്നാല് ശബരിമല വിഷയത്തിലാണ് യതീഷ് ചന്ദ്ര ശരിക്കും സ്റ്റാര് ആയത്. വെല്ലുവിളിച്ച ബിജെപിയുടെ സുരേന്ദ്രനെ പൊക്കി അകത്തിട്ടതും ശശികലയെ വിരട്ടി നിര്ത്തിയതും അന്നത്തെ കേന്ദ്രമന്ത്രി പൊന് രാധാകൃഷ്ണനെ തടഞ്ഞതും ഏറെ വിവാദമായിരുന്നു. അതോടെ ബിജെപി ആര്എസ്എസ് പ്രവര്ത്തകര് യതീഷ് ചന്ദ്രയ്ക്ക് എതിരായി. അതിനിടെ കേരളത്തിലെത്തിയ പ്രധാനമന്ത്രിയെ യതീഷ് ചന്ദ്ര വേണ്ടത്ര ഗൗനിച്ചില്ലെന്ന വാര്ത്തയും വന്നു. ഇതിന്റെ പേരില് യതീഷ് ചന്ദ്രയെ സ്ഥലം മാറ്റുന്നു എന്ന വാര്ത്ത പുറത്തായത്.
എന്നാല് തൃശൂരില് നിന്നും യതീഷ് ചന്ദ്രയുടെ സ്ഥലംമാറ്റം തത്കാലത്തേയ്ക്കു മരവിപ്പിച്ചുവെന്നാണ് റിപ്പോര്ട്ട്. വ്യക്തിപരമായ കാരണങ്ങളാല് സ്ഥലംമാറ്റം തടയണമെന്ന യതീഷ്ചന്ദ്രയുടെ അപേക്ഷ കണക്കിലെടുത്താണ് തീരുമാനം. കൊല്ലം കമ്മിഷണറായിരുന്ന പികെ മധുവിനെ തൃശൂര് കമ്മിഷണറായി നിയമിച്ചിരുന്നു. മധുവിനെ പോലീസ് ആസ്ഥാനത്ത് തല്ക്കാലത്തേയ്ക്കു നിയമിച്ചു.
തൃശൂരില് നിന്ന് സ്ഥലംമാറ്റത്തിന് സാവകാശം വേണമെന്ന അഭ്യര്ഥന സര്ക്കാര് കണക്കിലെടുത്തു. തുടര്ന്ന്, ജൂലൈ ഒന്നു വരെ തുടരാന് അനുമതി നല്കി. കുടുംബസമേതം തൃശൂരിലാണ് യതീഷ്ചന്ദ്ര താമസിക്കുന്നത്.
സൈബര് സെല്ലിലേയ്ക്കായിരുന്നു യതീഷ്ചന്ദ്രയെ സ്ഥലംമാറ്റിയത്. സര്ക്കാര് തീരുമാനപ്രകാരം സ്ഥലംമാറ്റ ഉത്തരവ് പുറത്തിറക്കിയാല് റദ്ദാക്കുന്ന പതിവില്ല. പക്ഷേ, യതീഷ്ചന്ദ്രയുടെ കാര്യത്തില് സര്ക്കാര് വിട്ടുവീഴ്ച ചെയ്യുകയായിരുന്നു. ജുലൈ ഒന്നിനു ശേഷം യതീഷ്ചന്ദ്ര തന്നെ തൃശൂരില് തുടരുമോ അതോ സ്ഥലംമാറ്റുമോ എന്ന കാര്യത്തില് സര്ക്കാര് തീരുമാനമെടുത്തിട്ടില്ല.
തിരുവനന്തപുരം, കൊച്ചി, ആലുവ റൂറല്, കൊല്ലം, വടകര റൂറല്, കണ്ണൂര് തുടങ്ങി നിരവധിയിടങ്ങളില് പോലീസ് മേധാവിമാരെ മാറ്റിയ കൂട്ടത്തിലായിരുന്നു യതീഷ് ചന്ദ്രയുടെ സ്ഥലംമാറ്റവും. എന്നാല്, യതീഷ്ചന്ദ്രയുടെ കാര്യത്തില് മാത്രമാണ് പ്രത്യേക താല്പര്യം സര്ക്കാര് കാണിച്ചത്. ഉന്നയിച്ച വ്യക്തിപരമായ ആവശ്യം പരിഗണിക്കപ്പെടേണ്ടതാണെന്ന് സര്ക്കാരും വിലയിരുത്തി.
പ്രധാനമന്ത്രിയുടെ സന്ദര്ശനവുമായി ബന്ധപ്പെട്ടാണ് യതീഷ്ചന്ദ്രയെ സ്ഥലംമാറ്റിയതെന്ന് അഭ്യൂഹങ്ങള് പ്രചരിച്ചിരുന്നു. എന്നാല്, അഭ്യൂഹങ്ങള് തെറ്റാണെന്ന് ഇതോടെ വ്യക്തമായി. ശബരിമലയില് കേന്ദ്രമന്ത്രി പൊന് രാധാകൃഷ്ണന്റെ വാഹനം തടഞ്ഞതുമായി ബന്ധപ്പെട്ടും യതീഷ്ചന്ദ്ര വിവാദത്തിലായിരുന്നു.
അതേസമയം പ്രധാനമന്ത്രി നരേന്ദ്രമോദിയുടെ ഫിറ്റ്നസ് ചാലഞ്ച് ഏറ്റെടുത്ത് തൃശ്ശൂര് സിറ്റി പോലീസ് കമ്മിഷണര് യതീഷ്ചന്ദ്ര നേരത്തെ രംഗത്തെത്തിയിരുന്നു. തന്റെ ഫെയ്സ്ബുക്ക് പേജില് ഒറ്റക്കൈ കൊണ്ടുള്ള പുഷ് അപ്പ് ഉള്പ്പെടെയുള്ള ഫിറ്റ്നസ് തെളിയിക്കുന്ന വീഡിയോ അദ്ദേഹം പോസ്റ്റ് ചെയ്തത്. സിറ്റി പോലീസിന്റെ ഫെയ്സ്ബുക്ക് പേജിലും ഇത് ഷെയര് ചെയ്തിരുന്നു. പ്രധാനമന്ത്രി ഐ.പി.എസ്. ഉദ്യോഗസ്ഥരെ ഫിറ്റ്നസ് ചാലഞ്ചിനായി ക്ഷണിച്ചിരുന്നു. ഇതിന് പിന്നാലെയാണ് കഴിഞ്ഞ വര്ഷം യതീഷ് ചന്ദ്രയും രംഗത്തെത്തിയത്.
https://www.facebook.com/Malayalivartha
