കണ്ണൂര്‍ സി.പി.എമ്മിലെ പാളയത്തില്‍ പടയില്‍ എ.എന്‍ ഷംസീര്‍ എം.എല്‍.എ വെട്ടിലാകുമോ? എന്നാണ് രാഷ്ട്രീയ കേരളം ഉറ്റുനോക്കുന്നത്. സി.ഒ.ടി നസീര്‍ വധ ശ്രമക്കേസ് അന്വേഷണത്തിന്റെ തുടക്കം മുതല്‍ ആരോപണവിധേയനായ ഷംസീറിനെ രക്ഷിക്കാനാണ് പൊലീസ് ശ്രമിക്കുന്നത്. വധശ്രമം ഒറ്റപ്പെട്ട സംഭവമാണെന്ന് മുഖ്യമന്ത്രി പിണറായി വിജയന്‍ നിയമസഭയില്‍ പറഞ്ഞതും അതുകൊണ്ടാണ്. എന്നാല്‍ ഷംസീര്‍ ഗഢാലോചന നടത്തിയെന്ന് അന്വേഷണ ഉദ്യോഗസ്ഥനോട് ഫോണിലൂടെ സംസാരിച്ചെന്നും അതിന്റെ ശബ്ദരേഖ തന്റെ കൈവശമുണ്ടെന്നും നസീര്‍ വെളിപ്പെടുത്തിയതോടെ പൊലീസ് പ്രതിരോധത്തിലായി. അങ്ങനെയാണ് രഹസ്യമൊഴിയെടുക്കാന്‍ തീരുമാനിച്ചത്. മൂന്ന് തവണ മൊഴിയെടുത്തെങ്കിലും വ്യക്തതയില്ലാത്തതിനാലാണ് രഹസ്യമൊഴി എടുക്കാന്‍ തീരുമാനിച്ചതെന്നാണ് പൊലീസ് വിശദീകരിക്കുന്നത്. 

ലോക്‌സഭാ തെരഞ്ഞെടുപ്പില്‍ പി.ജയരാജനെതിരെ വടകരയില്‍ വിമത സ്ഥാനാര്‍ത്ഥിയായിരുന്നു സി ഒ ടി നസീര്‍. എന്നാല്‍ ആക്രമണത്തില്‍ പി. ജയരാജന് പങ്കില്ലെന്ന് നസീര്‍ ആദ്യമേ വ്യക്തമാക്കിയിരുന്നു. തലശ്ശേരിയിലെ സ്റ്റേഡിയം നവീകരണം ഉള്‍പ്പെടെയുള്ള കാര്യങ്ങളിലെ ക്രമക്കേട് ചൂണ്ടിക്കാണിച്ചത് ഷംസീറിന് ഇഷ്ടപ്പെട്ടില്ലെന്നും ഇതേ തുടര്‍ന്ന് അദ്ദേഹത്തിന്റെ ഓഫീസില്‍ വിളിച്ചുവരുത്തി ഭീഷണിപ്പെടുത്തിയെന്നും നസീര്‍ ആക്ഷേപിച്ചിരുന്നു. സംഭവത്തെ കുറിച്ച് നിയമസഭയില്‍ പ്രതിപക്ഷം അടിയന്തിരപ്രമേയം ഉള്‍പ്പെടെ അവതരിപ്പിക്കുകയും എം.എല്‍.എയെ അറസ്റ്റ് ചെയ്യണമെന്ന് ആവശ്യപ്പെടുകയും ചെയ്തിരുന്നു. എന്നിട്ടും ഷംസീര്‍ ഇതുവരെ പ്രതികരിക്കാന്‍ തയ്യാറായിട്ടില്ല. മൂന്ന് തവണ മൊഴിയെടുത്തപ്പോഴും ഷംസീറിനെതിരെ മൊഴി നല്‍കിയിരുന്നു. ഷംസീറിനൊപ്പമുള്ള രാജേഷ്, സന്തേഷ് എന്നിവരെ വിശദമായി ചോദ്യം ചെയ്താല്‍ ഗൂഢാലോചന പുറത്ത് വരുമെന്നും നസീര്‍ പറയുന്നു. ആദ്യ തവണ മൊഴിയെടുത്ത ശേഷം പൊലീസ് ബ്ലാങ്ക് പേപ്പറില്‍ ഒപ്പിടീക്കാന്‍ നോക്കിയെന്നും നസീര്‍ ആരോപിച്ചിരുന്നു.

കേസില്‍ അറസ്റ്റിലായ പ്രത റോഷനെയും കൊണ്ട് പൊലീസ് ബെംഗളൂരുവില്‍ തെളിവെടുപ്പിന് പോകും.കര്‍ണാടകയിലെ ഹൊസൂരിലാണ് ഇയാള്‍ ഒളിവില്‍ കഴിഞ്ഞത്. റോഷനും മറ്റൊരു പ്രതിയായ ശ്രീജിലുമാണ് കസ്റ്റഡിയിലുള്ളത്. ആക്രമണം നടന്ന റോഡില്‍ ഇവരെ എത്തിച്ച് തെളിവെടുത്തിരുന്നു. കേസിലെ മൂന്ന് പ്രതികളുടെ മുന്‍കൂര്‍ ജാമ്യാപേക്ഷ തലശ്ശേരി സെഷന്‍സ് കോടതി തള്ളി. ഒളിവിലുള്ളവര്‍ക്കായി അന്വേഷണം ഊര്‍ജ്ജിതമാക്കിയെന്നാണ് പൊലീസ് പറയുന്നത്. അക്രമത്തില്‍ പാര്‍ട്ടിക്ക് പങ്കില്ലെന്ന് ആവര്‍ത്തിക്കുമ്പോഴും അറസ്റ്റിലാകുന്നതെല്ലാം സി.പി.എം പ്രവര്‍ത്തകരാണ്. പാര്‍ട്ടിക്ക് പങ്കുള്ളത് കൊണ്ടാണ് ജില്ലാ കമ്മിറ്റി അന്വേഷണ കമ്മിഷനെ വെച്ചതെന്ന് നസീര്‍ ചൂണ്ടിക്കാട്ടുന്നു. ഷംസീറുമായി തനിക്ക് ഏറെ അടുപ്പമുണ്ടായിരുന്നെന്നും എം.എല്‍.എയുടെ ഉമ്മയെ ആശുപത്രിയില്‍ കൊണ്ടുപോയിരുന്നത് താനാണെന്നും നസീര്‍ വ്യക്തമാക്കി. 

പി.ജയരാജനും കല്യാശ്ശേരി എം.എല്‍.എ ടി.വി രാജേഷും ആണ് നസീര്‍ ആക്രമണം അന്വേഷിക്കുന്നത്. എന്നാല്‍ അരിയില്‍ ഷുക്കൂര്‍ വധക്കേസിന്റെ ഗൂഢാലോചനയില്‍ പ്രതികളായ ഇരുവരെയും മറ്റൊരു വധശ്രമക്കേസിന്റെ അന്വേഷണ കമ്മീഷന്‍ ആക്കിയതിനെതിരെ വ്യാപക പ്രതിഷേധം ഉയര്‍ന്നിട്ടുണ്ട്. നസീറിന് പൂര്‍ണ പിന്തുണ അറിയിച്ച് കോണ്‍ഗ്രസ് നേതാക്കള്‍ രംഗത്തെത്തിയിട്ടുണ്ട്. ഷംസീറിനെ അറസ്റ്റ് ചെയ്യണമെന്ന് ആവശ്യപ്പെട്ട് കഴിഞ്ഞ ദിവസം കോണ്‍ഗ്രസ് പൊലീസ് സ്്‌റ്റേഷന്‍ മാര്‍ച്ച് നടത്തിയിരുന്നു. അറസ്റ്റ് ഉണ്ടായില്ലെങ്കില്‍ നിയമം കയ്യിലെടുക്കുമെന്ന് കെ.സുധാകരന്‍ എം.പി ഭീഷണിയും മുഴക്കിയിട്ടുണ്ട്. അതിനാല്‍ കേസ് രാഷ്ട്രീയമായും സി.പി.എമ്മിന് തിരിച്ചടിയായി.