തൊഴിലുറപ്പ് തൊഴിലാളിയായ വീട്ടമ്മ വെട്ടേറ്റ് മരിച്ചു. സംഭവവുമായി ബന്ധപ്പെട്ട് ഭര്‍തൃമാതാവിന്റെ സഹോദരന്‍ കസ്റ്റഡിയിലായി. മാനന്തവാടിയില്‍ വാളാട് പ്രശാന്തഗിരി മഠത്താശേരി ബൈജുവിന്റെ ഭാര്യ സിനി(35)യാണ് മരിച്ചത്. പ്രതിയെന്ന് സംശയിക്കുന്ന അയല്‍വാസി കൂടിയായ ദേവസ്യയെ ചോദ്യം ചെയ്യാനായി പോലീസ് കസ്റ്റഡിയിലെടുത്തു. തിങ്കളാഴ്ച രാവിലെയാണ് നാടിനെ നടുക്കിയ സംഭവം നടന്നത്.

രാവിലെ തൊഴിലുറപ്പ് ജോലിക്കു ശേഷം 10 മണിയോടെ പ്രഭാത ഭക്ഷണത്തിന് വീടുകളിലേക്ക് പോയ ഇരുവരെയും ഒരു മണിക്കൂര്‍ കഴിഞ്ഞിട്ടും കാണാഞ്ഞതിനെത്തുടര്‍ന്ന് മറ്റു തൊഴിലാളികള്‍ അന്വേഷിച്ചു ചെന്നപ്പോഴാണ് ഒറ്റമുറിവീട്ടില്‍ കമഴ്ന്നു കിടക്കുന്ന നിലയില്‍ സിനിയെ കണ്ടത്. വെട്ടേറ്റു മരിച്ചതാണെന്ന് പിന്നിടാണ് കണ്ടെത്തിയത്.
100 മീറ്റര്‍ അടുത്തു തന്നെയുള്ള വീട്ടില്‍നിന്ന് ദേവസ്യയെയും കണ്ടെത്തി. സിനിയുടെ കഴുത്തിനാണ് വെട്ടേറ്റത്. ഭക്ഷണാവശിഷ്ടങ്ങളും പാത്രങ്ങളും മുറിയില്‍ ചിതറിത്തെറിച്ചിരുന്നു. പോലീസും പ്രദേശവാസികളും ചേര്‍ന്ന് യുവതിയെ മാനന്തവാടി ജില്ലാ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. അയല്‍ക്കാരായ ദേവസ്യയും ബൈജുവും തമ്മില്‍ അതിര്‍ത്തിത്തര്‍ക്കം നിലനിന്നിരുന്നു. തലപ്പുഴ സ്‌റ്റേഷനില്‍ ഇതുസംബന്ധിച്ച കേസും നിലവിലുണ്ട്. കെട്ടിട നിര്‍മാണത്തൊഴിലാളിയായ ബൈജു ജോലിക്കായി രാവിലെ പോയിരുന്നു. ആറാം ക്ലാസിലും ഒന്നാം ക്ലാസിലും പഠിക്കുന്ന രണ്ടു കുട്ടികളുണ്ട്.