ആലപ്പുഴയ്ക്കടുത്ത് പുളിങ്കുന്ന് പഞ്ചായത്തില്‍ സഹോദരന്റെ ഭാര്യയെ മണ്ണെണ്ണ ഒഴിച്ച് തീ കൊളുത്തി കൊലപ്പെടുത്തിയ കേസിലെ പ്രതിക്ക് പിഴയോടുകൂടി ജീവപര്യന്തം ശിക്ഷ വിധിച്ചു.

പുളിങ്കുന്ന് പഞ്ചായത്തിലെ 10-ാം വാര്‍ഡിലെ മറ്റക്കാട്ട് വീട്ടില്‍ കുഞ്ഞുമോനെയാണ് ആലപ്പുഴ അഡീഷണല്‍ ജില്ലാ കോടതി (രണ്ട്) ജഡ്ജി എ.ഇയാസ് കുറ്റക്കാരനെന്നു കണ്ടത്. ജീവപര്യന്തത്തിന് പുറമേ രണ്ട് ലക്ഷം രൂപ പിഴയും, തുക അടച്ചില്ലെങ്കില്‍ ഒരുവര്‍ഷം കഠിന തടവും അനുഭവിക്കണം. 2010 ജനുവരി ഒന്നിനാണ് കേസിന് ആധാരമായ സംഭവം.

കുഞ്ഞുമോന്റെ സഹോദരന്റെ ഭാര്യ ഐഷമ്മയേയാണ് കൊലപ്പെടുത്തിയത്. ചാണകവെള്ളം ഒഴുക്കി വിടുന്നതുമായും റേഷന്‍ കാര്‍ഡുമായും ബന്ധപ്പെട്ട തര്‍ക്കം കുടുംബകലഹത്തിലും കൊലപാതകത്തിലും എത്തുകയായിരുന്നു. വഴക്കിനിടെ കക്കാ പുഴുങ്ങാന്‍ സൂക്ഷിച്ചിരുന്ന മണ്ണെണ്ണ ഐഷമ്മയുടെ ദേഹത്ത് ഒഴിച്ച് കുഞ്ഞുമോന്‍ തീകൊളുത്തി.

പൊള്ളലേറ്റ ഐഷമ്മയെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും 13-ന് മരിച്ചു. പുളിങ്കുന്ന് പോലീസ് കേസെടുത്ത് പ്രതിയെ അറസ്റ്റ് ചെയ്തു. വിസ്താരവേളയില്‍ പ്രതി കുറ്റക്കാരനാണെന്ന് പ്രോസിക്യൂഷന്‍ കോടതിയെ ബോധ്യപ്പെടുത്തി. പബ്ലിക് പ്രോസിക്യൂട്ടര്‍ പി.കെ.രമേശന്‍ കോടതിയില്‍ ഹാജരായി.