കണ്ണൂര്‍ മുനിസിപ്പാലിറ്റിയെ കോര്‍പറേഷനായി ഉയര്‍ത്താനും തിരുവനന്തപുരം കോര്‍പറേഷനെ വിഭജിച്ച് കഴക്കൂട്ടം മുനിസിപ്പാലിറ്റി രൂപീകരിക്കാനും മന്ത്രിസഭാ തീരുമാനം. ഇത് ഉള്‍പ്പെടെ 28 പുതിയ മുനിസിപ്പാലിറ്റികള്‍ രൂപീകരിക്കാനും 66 പുതിയ ഗ്രാമപഞ്ചായത്തുകള്‍ രൂപീകരിക്കാനുമുള്ള കരട് പട്ടിക അംഗീകരിച്ചു. ഇതോടെ സംസ്ഥാനത്ത് കോര്‍പറേഷനുകളുടെ എണ്ണം അഞ്ചില്‍ നിന്ന് ആറായി. മുനിസിപ്പാലിറ്റികളുടെ എണ്ണം 59ല്‍ നിന്ന് 87ഉം ഗ്രാമപഞ്ചായത്തുകളുടെ എണ്ണം 945ല്‍ നിന്ന് 1011ഉം ആയി ഉയരും. പുതുതായി രൂപീകരിക്കുന്ന തദ്ദേശഭരണസ്ഥാപനത്തിലേക്ക് മറ്റൊരു സ്ഥാപനത്തില്‍ നിന്നുള്ള വാര്‍ഡിനെ വെട്ടിമുറിച്ച് ഉള്‍പ്പെടുത്തില്ല. വാര്‍ഡുകളെ അപ്പാടെ കൂട്ടിച്ചേര്‍ക്കുകയേ ഉണ്ടാവൂ. കരട് പട്ടികയെക്കുറിച്ചുള്ള പരാതികളും നിര്‍ദ്ദേശങ്ങളും 15 ദിവസത്തിനകം സമര്‍പ്പിക്കണം. അത് കൂടി പരിശോധിച്ചാവും അന്തിമപട്ടിക പ്രസിദ്ധീകരിക്കുകയെന്ന് മുഖ്യമന്ത്രി ഉമ്മന്‍ചാണ്ടി വാര്‍ത്താസമ്മേളനത്തില്‍ അറിയിച്ചു.
അടുത്ത തദ്ദേശസ്വയംഭരണ തിരഞ്ഞെടുപ്പിന് മുമ്പ് തന്നെ പുതിയ പട്ടിക നിലവില്‍ വരും.
ഗ്രാമപഞ്ചായത്തുകള്‍ വിഭജിച്ച് പുതിയ ഗ്രാമപഞ്ചായത്തുകള്‍ രൂപീകരിക്കുന്നതിനും ഗ്രാമപഞ്ചായത്തുകളെ മുനിസിപ്പാലിറ്റികളായി പരിവര്‍ത്തനം ചെയ്യുന്നതിനുമുള്ള മാനദണ്ഡങ്ങള്‍ നിശ്ചയിക്കുന്നതിനായി നഗരകാര്യ ഡയറക്ടര്‍, പഞ്ചായത്ത് ഡയറക്ടര്‍, സ്‌റ്റേറ്റ് പെര്‍ഫോമന്‍സ് ഓഡിറ്റര്‍, ചീഫ് ടൗണ്‍ പ്ലാനര്‍ എന്നിവര്‍ അംഗങ്ങളും പഞ്ചായത്ത് ഡയറക്ടര്‍ കണ്‍വീനറുമായി സര്‍ക്കാര്‍ സമിതി രൂപീകരിച്ചിരുന്നു. ഈ സമിതിയുടെ ശുപാര്‍ശകളും കരട് പട്ടികയ്ക്ക് പരിഗണിച്ചിട്ടുണ്ട്. ഇതോടൊപ്പം ശാസ്ത്രീയവും ജനകീയവുമായ മാനദണ്ഡങ്ങള്‍ ഉപയോഗിച്ചാണ് ഇപ്പോഴത്തെ തീരുമാനം.വാര്‍ഡുകളുടെ അതിരുകള്‍ നിശ്ചയിക്കുന്നതിന് സര്‍ക്കാര്‍ ഡീലിമിറ്റേഷന്‍ കമ്മിഷനെ നിയോഗിച്ചു കഴിഞ്ഞു. പ്രിന്‍സിപ്പല്‍ സെക്രട്ടറി ജയിംസ് വര്‍ഗീസ്, അര്‍ബന്‍ സെക്രട്ടറി മുഹമ്മദ് ഹനീഷ്, പൊതുഭരണ വകു പ്പ് സെക്രട്ടറി കെ.ആര്‍. ജ്യോതിലാല്‍, ആരോഗ്യസെക്രട്ടറി കെ. ഇളങ്കോവന്‍ എന്നിവര്‍ അംഗങ്ങളും സംസ്ഥാന തിരഞ്ഞെടു പ്പ് കമ്മിഷണര്‍ കെ. ശശിധരന്‍ നായര്‍ ചെയര്‍മാനുമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha