ഉമ്മന്‍ചാണ്ടിയോടൊപ്പമുള്ള വി.എസ് അച്യുതാനന്ദന്റെ ഡല്‍ഹി യാത്രയില്‍ സിപിഎം ഔദ്യോഗിക പക്ഷത്തില്‍ അമര്‍ഷം പുകയുന്നു. പാര്‍ട്ടിയിലൂടെ ബദ്ധവൈരിക്കൊപ്പം വിഎസ് നടന്നു നീങ്ങുന്നത് കണ്ടപ്പോള്‍ ചാണകത്തില്‍ ചവിട്ടിയ പ്രതീതിയാണ് ഉണ്ടായതെന്ന് പേരു വെളിപ്പെടുത്താത്ത ഒരു സിപിഎം ഉന്നതന്‍ പറഞ്ഞു. 

ഉമ്മന്‍ചാണ്ടിയും വിഎസും കഴുത്തില്‍ കൈയിട്ട് നരേന്ദ്രമോദിയെ കാണാന്‍ പോയത് സംസ്ഥാനത്ത് പാര്‍ട്ടിയെ ദുര്‍ബലപ്പെടുത്താന്‍ വേണ്ടിയാണെന്ന് സിപിഎം ഔദ്യോഗിക പക്ഷം വിശ്വസിക്കുന്നു. പാര്‍ട്ടിയുടെ അടിസ്ഥാനം ഇളക്കുകയാണ് വിഎസിന്റെ ലക്ഷ്യമെന്നും അവര്‍ പറയുന്നു. നരേന്ദ്രമോഡി വിഎസിനെ കാര്യമായി സ്വീകരിക്കുകയും ചെയ്തു. അതിന്റെ ചിത്രങ്ങള്‍ പത്രങ്ങള്‍ വലിയ പ്രാധാന്യത്തോടെ പ്രസിദ്ധീകരിച്ചു. സിപിഎമ്മില്‍ നിന്നും അണികള്‍ കൊഴിഞ്ഞു പോകുന്നത് ബിജെപിയിലേക്കാണ്. ഇത്തരമൊരു സാഹചര്യം ഉള്ളപ്പോഴാണ് വിഎസ് ഉമ്മന്‍ചാണ്ടിയ്‌ക്കൊപ്പം നിന്ന് നരേന്ദ്രമോഡിക്ക് കൈകൊടുത്ത് ഫോട്ടോയ്ക്ക് പോസ് ചെയ്തത്.
വിഎസിനെയും കൊണ്ടുള്ള യാത്ര ഉമ്മന്‍ചാണ്ടിയുടെ ബുദ്ധിയായിരുന്നു എന്നാണ് സിപിഎം കരുതുന്നത്. യഥാര്‍ത്ഥത്തില്‍ വിഎസിന്റെ യാത്ര കണ്ട് സിപിഎം ഞെട്ടി. ഉമ്മന്‍ചാണ്ടിക്ക് പണി കൊടുക്കാനുള്ള ആയുധം അണിയറയില്‍ മൂര്‍ച്ച കൂട്ടവേ വിഎസ് ഉമ്മന്‍ചാണ്ടിക്കൊപ്പം നടത്തിയ യാത്ര സിപിഎം നേതൃത്വത്തെ വേദനിപ്പിക്കുകയും ചെയ്തു.

എന്നാല്‍ പ്രതിപക്ഷനേതാവ് മുഖ്യമന്ത്രിക്കൊപ്പം പ്രധാനമന്ത്രിയെ കാണാന്‍ പോകുന്നതില്‍ ഒരു അത്ഭുതവുമില്ലെന്നാണ് വിഎസുമായി ബന്ധപ്പെട്ട കേന്ദ്രങ്ങള്‍ വ്യക്തമാക്കുന്നത്. പ്രതിപക്ഷ നേതാവ് വിഎസ് അച്യുതാനന്ദന്റെ മകന്‍ അരുണ്‍കുമാറിനെ കേസില്‍ നിന്നും ഒഴിവാക്കാന്‍ ഉമ്മന്‍ചാണ്ടി സഹായിച്ചെന്നും സിപിഎം ഔദ്യോഗിക നേതൃത്വം ആരോപിക്കുന്നു. അരുണ്‍കുമാറിനെ രക്ഷിക്കാന്‍ വേണ്ടി വിഎസ് ഏറെനാളായി ശ്രമിച്ചു വരികയാണെന്നും ഔദ്യോഗിക നേതൃത്വം ആരോപിക്കുന്നു.ഡല്‍ഹി യാത്രയെ കുറിച്ചും അച്യുതാനന്ദന്റെ പ്രതികരണത്തിനുവേണ്ടി സിപിഎം കാത്തിരിക്കുന്നു.

വിഎസിന് ഇക്കാര്യം പാര്‍ട്ടി സമ്മേളനങ്ങളിലും വിശദികരിക്കേണ്ടി വരും. നരേന്ദ്രമോഡി വെറും പ്രധാനമന്ത്രിയല്ല സിപിഎമ്മിന്റെ അന്തകനാണെന്നും ഔദ്യോഗിക നേതൃത്വം ആരോപിക്കുന്നു. അങ്ങനെയുള്ള ഒരാളെയാണ് പൂവിട്ട് തൊഴാന്‍ കമ്മ്യൂണിസ്റ്റ് പാര്‍ട്ടിയുടെ സമുന്നത നേതാവ് ഡല്‍ഹിക്ക് പോയത്.വിഎസിനെ പുറത്താക്കുക മാത്രമാണ് പാര്‍ട്ടിയെ രക്ഷിക്കാനുള്ള പോം വഴിയെന്നും സിപിഎം ഔദ്യോഗിക നേതൃത്വം പറയുന്നു. എന്നാല്‍ പൂച്ചയ്ക്കാര് മണികെട്ടും എന്നതാണ് കാതലായ പ്രശ്‌നം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha