ആര്ദ്ര കേരളം പുരസ്കാരം മുഖ്യമന്ത്രി വിതരണം ചെയ്യും
തിരുവനന്തപുരം: നവകേരള കര്മ്മ പദ്ധതിയുടെ ഭാഗമായുള്ള ആര്ദ്രം മിഷന്റെ പ്രവര്ത്തനങ്ങളുടെ പശ്ചാത്തലത്തില് ആരോഗ്യ മേഖലയില് തദ്ദേശസ്വയംഭരണ സ്ഥാപനങ്ങള് നടത്തിവരുന്ന മികച്ച പ്രവര്ത്തനങ്ങളുടെ അംഗീകാരമായി നല്കുന്ന 2017-18 ലെ ആര്ദ്ര കേരളം പുരസ്കാരം ജൂണ് 24-ാം തീയതി തിങ്കളാഴ്ച വൈകുന്നേരം 4 മണിക്ക് നിശാഗന്ധി ആഡിറ്റോറിയത്തില് വച്ച് മുഖ്യമന്ത്രി പിണറായി വിജയന് വിതരണം ചെയ്യും. ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അധ്യക്ഷത വഹിക്കുന്ന ചടങ്ങില് തദ്ദേശ സ്വയംഭരണ വകുപ്പ് മന്ത്രി എ.സി. മൊയ്തീന് വിശിഷ്ടാതിഥിയായിരിക്കും. ഗ്രാമ-ബ്ലോക്ക്-ജില്ലാ പഞ്ചായത്തുകള്ക്കും മുനിസിപ്പാലിറ്റികള്ക്കും മുനിസിപ്പല് കോര്പ്പറേഷനുകള്ക്കും സംസ്ഥാനതല അവാര്ഡുകളും ഗ്രാമപഞ്ചായത്തുകള്ക്ക് ജില്ലാതല അവാര്ഡുകളുമാണ് നല്കുന്നത്.
ജനകീയാസൂത്രണപദ്ധതിയുടെ ഭാഗമായി തദ്ദേശസ്വയംഭരണ സ്ഥാപനങ്ങള് ആരോഗ്യ മേഖലയിലും ആരോഗ്യ അനുബന്ധ മേഖലയിലും മികച്ച ഇടപെടലുകളാണ് നടത്തിവരുന്നത്. ഇന്ഫര്മേഷന് കേരള മിഷന്റെ സോഫ്റ്റ് വെയര് സംവിധാനത്തിലൂടെ ലഭ്യമായ പദ്ധതി വിവരങ്ങള്, ആരോഗ്യ സ്ഥാപനങ്ങളില് നിന്നും ശേഖരിച്ച വിവരങ്ങള്, ഓണ്ലൈന് റിപ്പോര്ട്ടിംഗ്, ഫീല്ഡ്തല പരിശോധനകള് എന്നിവയുടെ അടിസ്ഥാനത്തിലാണ് പുരസ്കാര ജേതാക്കളെ തിരഞ്ഞെടുത്തത്. 2017-18 വര്ഷത്തെ തദ്ദേശ സ്വയംഭരണ സ്ഥാപനങ്ങളുടെ ആരോഗ്യ അനുബന്ധ പദ്ധതികളാണ് പരിശോധനയ്ക്ക് വിധേയമാക്കിയത്. 2017-18 വര്ഷം ആരോഗ്യ മേഖലയില് തദ്ദേശ സ്വയംഭരണ സ്ഥാപനങ്ങള് 569 കോടി രൂപയുടെ പദ്ധതി പ്രവര്ത്തനങ്ങള് നടത്തിയിട്ടുണ്ട്. ഈ പ്രവര്ത്തനങ്ങള് പ്രോത്സാഹിപ്പിക്കുന്നതിനൊപ്പം ആരോഗ്യവകുപ്പിന്റെയും അനുബന്ധ വകുപ്പുകളുടെയും ജനപ്രതിനിധികളുടെയും കൂട്ടായ്മയ്ക്ക് കരുത്തുപകരുവാനും വേണ്ടിയാണ് ആര്ദ്ര കേരള പുരസ്കാരം നല്കുന്നത്.
ജില്ലാ പഞ്ചായത്ത് വിഭാഗത്തില് കൊല്ലം, കോര്പ്പറേഷന് വിഭാഗത്തില് കൊല്ലം കോര്പ്പറേഷന്, മുനിസിപ്പാലിറ്റി വിഭാഗത്തില് കട്ടപ്പന, ഇടുക്കി ജില്ല, ബ്ലോക്ക് പഞ്ചായത്ത് വിഭാഗത്തില് നീലേശ്വരം, കാസര്ഗോഡ് ജില്ല, ഗ്രാമ പഞ്ചായത്ത് വിഭാഗത്തില് കിളിമാനൂര്, തിരുവനന്തപുരം ജില്ല എന്നിവയാണ് സംസ്ഥാന തലത്തില് ഒന്നാം സ്ഥാനം നേടിയത്.
ജില്ലാ പഞ്ചായത്ത് വിഭാഗത്തില് കോഴിക്കോട്, കോര്പ്പറേഷന് വിഭാഗത്തില് തൃശൂര്, മുനിസിപ്പാലിറ്റി വിഭാഗത്തില് അങ്കമാലി, എറണാകുളം ജില്ല, ബ്ലോക്ക് പഞ്ചായത്ത് വിഭാഗത്തില് റാന്നി, പത്തനംതിട്ട, ജില്ല ഗ്രാമ പഞ്ചായത്ത് വിഭാഗത്തില് മുത്തോലി, കോട്ടയം ജില്ല എന്നിവ സംസ്ഥാന തലത്തില് രണ്ടാം സ്ഥാനം നേടി.
ജില്ലാ പഞ്ചായത്ത് വിഭാഗത്തില് മലപ്പുറം, മുനിസിപ്പാലിറ്റി വിഭാഗത്തില് കൂത്താട്ടുകുളം, എറണാകുളം ജില്ല, ബ്ലോക്ക് പഞ്ചായത്ത് വിഭാഗത്തില് ശ്രീകൃഷ്ണപുരം, പാലക്കാട് ജില്ല, ഗ്രാമ പഞ്ചായത്ത് വിഭാഗത്തില് ആലപ്പാട്, കൊല്ലം ജില്ല എന്നിവ സംസ്ഥാന തലത്തില് മൂന്നാം സ്ഥാനവും നേടിയിരുന്നു.
https://www.facebook.com/Malayalivartha
