സമ്മതിദായകരുടെ ദേശീയദിനമായ ജനുവരി 25നോടനുബന്ധിച്ച് പുതിയ തിരിച്ചറിയല്‍ കാര്‍ഡുകളുടെ വിതരണം മുന്‍വര്‍ഷങ്ങളില്‍ നടന്നിരുന്നതുപോലെ ഇത്തവണ കാര്‍ഡുകളുടെ വിതരണം നടക്കില്ലെന്ന് അറിയിച്ചുകൊണ്ടുള്ള ചീഫ് ഇലക്ഷന്‍ ഓഫീസിലെ അഡീഷണല്‍ സെക്രട്ടറിയുടെ ഉത്തരവ് പുറത്തിറങ്ങി.

മുന്‍കാലങ്ങളിലേപ്പോലെ സമ്മതിദായകരുടെ ദേശീയദിനത്തിന്റെ ഭാഗമായി പൊതു പരിപാടികള്‍ വേണ്ടെന്നും താലൂക്ക് തലത്തില്‍ ഏകദേശം 400ഓളം പേര്‍ക്കുമാത്രം തിരിച്ചറിയല്‍ കാര്‍ഡ് നല്‍കുന്നതാണെന്നുമാണ് 4333/ഇഎല്‍3/2014/ ഇലക്ഷന്‍ എന്ന നമ്പരില്‍ പുറപ്പെടുവിച്ച ഉത്തരവില്‍ വ്യക്തമാക്കുന്നത്.

ഇത്തവണ എ.ടി.എം കാര്‍ഡ് മാതൃകയില്‍ പ്ലാസ്റ്റിക് കോട്ടിംഗുള്ള തിരിച്ചറിയല്‍ കാര്‍ഡുകളാണ് തയാറാക്കുന്നത്. പുതിയ വോട്ടര്‍മാര്‍ക്ക് പ്ലാസ്റ്റിക് കോട്ടിംഗുള്ള കളര്‍ തിരിച്ചറിയല്‍ കാര്‍ഡാണ് സൗജന്യമായി നല്‍കുകയെന്നും വിതരണം സംബന്ധിച്ച് പിന്നീട് തീരുമാനിക്കുമെന്നും ഉത്തരവില്‍ പറയുന്നു.

റേഷന്‍ കാര്‍ഡ് പുതുക്കല്‍ നടപടികള്‍ പുരോഗമിക്കവെ തിരിച്ചറിയല്‍ കാര്‍ഡ് വിതരണം നീളുന്നത് നിരവധിപേര്‍ക്ക് തിരിച്ചടിയാകും. റേഷന്‍ കാര്‍ഡ് പുതുക്കലിന് അപേക്ഷ നല്‍കുന്ന സമയമായതിനാല്‍ പുതിയ തിരിച്ചറിയല്‍ കാര്‍ഡിന് ആവശ്യക്കാര്‍ ഏറെയാണ്. അതിനാല്‍ അത്യാവശ്യമുള്ളവര്‍ക്ക് പഴയ രീതിയിലുള്ള കാര്‍ഡ് നല്‍കാനും പ്ലാസ്റ്റിക് കാര്‍ഡ് വിതരണം ചെയ്യുമ്പോള്‍ ഇവരില്‍ നിന്ന് 10 രൂപ വീതം ഈടാക്കാനുമാണ് തീരുമാനം. എന്നാല്‍ ഇത്തരത്തില്‍ ഉടന്‍ കാര്‍ഡ് ആവശ്യമുള്ളവര്‍ ആരെ സമീപിക്കണമെന്ന് തെരഞ്ഞെടുപ്പ് കമ്മീഷന്‍ വ്യക്തമാക്കിയിട്ടില്ല.

പുതിയ വോട്ടര്‍മാര്‍ക്ക് അവരുടെ തിരിച്ചറിയല്‍ കാര്‍ഡ് നമ്പര്‍ മൊബൈല്‍ ഫോണിലൂടെ എസ്.എം.എസായി അയയ്ക്കാന്‍ ശ്രമം ആരംഭിച്ചിട്ടുണ്ട്.

അതിനിടെ വോട്ടര്‍പട്ടികയില്‍ പുതിയ ആളുകളെ ചേര്‍ക്കാനുള്ള നടപടികള്‍ തുടങ്ങാന്‍ തീരുമാനമായി. ജനുവരി 25 മുതല്‍ ഓണ്‍ലൈനായി അപേക്ഷ സ്വീകരിക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha