വിഴിഞ്ഞം പദ്ധതിയുടെ പൂര്‍ത്തീകരണത്തിനായി ഹിന്ദുസമൂഹം ഉണരണമെന്ന സിനിമാ താരം സുരേഷ് ഗോപിയുടെ ആഹ്വാനത്തിനെതിരെ രൂക്ഷ വിമര്‍ശനവുമായി കോണ്‍ഗ്രസ് മുഖപത്രം വീക്ഷണം രംഗത്ത്. ഇന്നു പ്രസിദ്ധീകരിച്ച മുഖപ്രസംഗത്തിലാണ് സുരേഷ് ഗോപിയോ കേരളാ തൊഗാഡിയയോ? എന്ന തലക്കെട്ടില്‍ നടനെതിരെ വീക്ഷണം രൂക്ഷ വിമര്‍ശനം ഉന്നയിക്കുന്നത്. അഹങ്കാരം ആള്‍രൂപം പ്രാപിച്ചാല്‍ സുരേഷ് ഗോപിയാകുമെന്ന് പറയുന്ന വീക്ഷണം സുരേഷ് ഗോപിയ്ക്ക് കാവിജ്വരം മൂത്താല്‍ കേരള തൊഗാഡിയയായി മാറുമെന്നും പറയുന്നു.
വിഴിഞ്ഞം പദ്ധതിയുടെ പേരില്‍ ഹിന്ദുത്വ പ്രസംഗം നടത്തിയ സുരേഷ് ഗോപി വര്‍ഗീയ വിഷ പ്രചരണത്തില്‍ വിഎച്ച്പി നേതാവ് പ്രവീണ്‍ തൊഗാഡിയയ്ക്ക് ശിഷ്യപ്പെട്ടിരിക്കുകയാണ്. വിവരക്കേടോ അല്ലെങ്കില്‍ കാവി തമ്പുരാക്കന്‍മാരെ പ്രീതിപ്പെടുത്താനുള്ള ശ്രമമോ ആണ് വിഴിഞ്ഞം തുറമുഖത്തിന്റെ വികസനകാര്യത്തില്‍ വര്‍ഗീയത വലിച്ചിഴക്കാന്‍ സുരേഷ് ഗോപിയെ പ്രേരിപ്പിച്ചതെന്നും പത്രം ആരോപിക്കുന്നു.
ഇന്ന് മോഡിയ്ക്കും ബിജെപിയ്ക്കും സ്തുതി പാടുന്ന സുരേഷ് ഗോപി പണ്ട് ഇന്ദിരാ ഭവനും ക്ലിഫ് ഹൗസിനും ചുറ്റുവട്ടമിട്ടു നടന്ന നാളുകളുണ്ടായിരുന്നു. അങ്ങിനെയാണ് ലീഡര്‍ കെ. കരുണാകരന്റെ സപ്തതിക്ക് ചോറ് വിളമ്പാനെത്തിയത്. അന്ന് കൊല്ലം ലോക്‌സഭാ സീറ്റിനോടുള്ള പ്രണയം ലീഡറുടെ ചെവിയിലെത്തിക്കാന്‍ അദേഹം പഠിച്ച പണി പതിനെട്ടും പയറ്റിയിട്ടുണ്ടായിരുന്നു. ഒടുവില്‍ വിടരാത്ത പ്രണയമായി അത് വാടിക്കരിഞ്ഞുവെന്നും പത്രം പരിഹസിക്കുന്നു.
തട്ടുകര്‍പ്പന്‍ ഡയലോഗുകളിലൂടെ മലയാള വെള്ളിത്തിരയെ ചൂടു പിടിപ്പിച്ച സുരേഷ് ഗോപി വിവരക്കേടിന്റെ തിടമ്പേന്തി ബിജെപി രാഷ്ട്രീത്തിലെ ഗുരുവായൂര്‍ കേശവനാകാന്‍ ശ്രമിക്കുകയാണെന്നും പത്രം ആരോപിക്കുന്നു. ബിജെപിയിലേക്ക് ഘര്‍വാപസിയായതിന് ശേഷം നിഘണ്ടുവില്‍നിന്നും സുരേഷ് ഗോപി കുറേ വാക്കുകള്‍ മനഃപാഠമാക്കിയിട്ടുണ്ട്. ഹിന്ദു സമാജം, ഹിന്ദു ധര്‍മം എന്നൊക്കെയാണവ. വിശുദ്ധമായ ഈ പദങ്ങള്‍ എപ്പോള്‍, എവിടെ, എങ്ങിനെ ഉപയോഗിക്കണമെന്ന് സുരേഷ് ഗോപിക്കറിയില്ല- പത്രം പറയുന്നു.
വെള്ളിത്തിരയില്‍നിന്നും ഏതാണ്ട് ജനഗണമന പാടി പടിയിറങ്ങാറായപ്പോഴാണ് സുരേഷ് ഗോപി നരേന്ദ്ര മോഡിയില്‍ ആകൃഷ്ടനാകുന്നതും ലോക്‌സഭാ തിരഞ്ഞെടുപ്പിന് മുമ്പ്തന്നെ മോഡിയ്ക്ക് മുമ്പില്‍ ദര്‍ശനം നടത്തി അനുഗ്രങ്ങള്‍ ഏറ്റുവാങ്ങിയതും. വിടരാത്ത മോഹങ്ങള്‍ മനസിലിട്ട് സുരേഷ് ഗോപി മോഡിയെ സന്ദര്‍ശിക്കുമ്പോള്‍ അധികാരം തന്നെയായിരുന്നു അന്തിമലക്ഷ്യമെന്നും പത്രം ആരോപിക്കുന്നു. നരേന്ദ്രമോഡി അധികാരത്തിലേക്ക് ക്ഷണിച്ചാല്‍ നോ എന്നു പറയാന്‍ തനിക്കാവില്ലെന്നും രാഷ്ട്രീയത്തില്‍ തനിക്കും വേണം ഒരു പിടിയെന്നും പച്ചയായി പറയാന്‍ സുരേഷ് ഗോപിയെ പ്രേരിപ്പിച്ചത് ഈ അധികാര ദുര തന്നെയാണെന്നും പത്രം ആരോപിക്കുന്നു.
യൂത്ത് കോണ്‍ഗ്രസുകാര്‍ താരത്തിന്റെ കോലം കത്തിച്ചതിനെ പരാമര്‍ശിച്ച് അത് താരം വടി കൊടുത്ത് അടി വാങ്ങിയതാണെന്നും മുഖപ്രസംഗം പറയുന്നു. പിന്നീട് വി.എസ്. അച്യുതാനന്ദനു വേണ്ടി മലമ്പുഴയില്‍ പ്രചരണം നടത്താന്‍ പോയതിനെക്കുറിച്ചും പരാമര്‍ശമുണ്ട്. ഇത്തരത്തില്‍ സ്വന്തം നിലപാടുകളോടും വാക്കുകളോടും പ്രതിബദ്ധതയും സത്യസന്ധതയുമില്ലാത്തൊരാള്‍ എങ്ങിനെ നാടിനോടും രാഷ്ട്രീയത്തോടും പ്രതിബന്ധത കാണിക്കുമെന്നും പത്രം ചോദിക്കുന്നു. ഒടുവില്‍, പ്രവീണ്‍ തൊഗാഡിയയുടെ കേരള രൂപമായി സുരേഷ് ഗോപി മാറരുത് എന്ന അഭ്യര്‍ഥനയോടെയാണ് മുഖപ്രസംഗം അവസാനിപ്പിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha