ജനങ്ങളാൽ തെരഞ്ഞെടുക്കപ്പെട്ട ജന പ്രതിനിധികൾ ജനങ്ങൾക്ക് വേണ്ടി ചെയ്തതും ചെയ്യുന്നതുമൊക്കെ എല്ലാവർക്കും അറിയാം.അതിനായി നിയമസഭ ടി വി ഒരുക്കാൻ പോകുന്നു.

നിയമസഭയുടെ ചരിത്രം, സഭ പാസാക്കിയ നിയമങ്ങളുടെ ഗുണഫലങ്ങളെക്കുറിച്ചുള്ള ചർച്ചകൾ, എംഎൽഎമാരുടെ മണ്ഡലങ്ങളിലെ പ്രവർത്തനങ്ങൾ തുടങ്ങിയവ ടി വിയിലൂടെ ആൾക്കാരുടെ മുന്നിലേക്ക്‌ എത്തിക്കാനാണ് ശ്രമം. തുടക്കത്തിൽ ചാനലുകളുമായി സഹകരിച്ചു അതിലൂടെ പരിപാടികൾ സംപ്രേഷണം ചെയ്യാനാണ് പദ്ധതി. ചാനലുകളിൽ നിന്നും താൽപര്യ പത്രം ക്ഷണിച്ചു.

ചാനലുകൾക്കു രാവിലെ 9 മുതൽ 10 വരെയുള്ള ചോദ്യോത്തരവേളയെ സംപ്രേഷണം ചെയ്യാനുള്ള അനുമതിയുണ്ട് എന്നാൽ അതിനു ശേഷമുള്ളവ പകർത്താൻ അവർക്കു അവകാശമില്ല. ആഴ്ചയിൽ രണ്ടു മണിക്കൂർ പ്രത്യേക പരിപാടിയായിട്ടാകും ചാനലുകളിൽ അവതരിപ്പിക്കുക. സംരംഭം വിജയിച്ചാൽ നിയമസഭ ടി വി എന്ന പേരിൽ ചാനൽ തുടങ്ങും. നിലവിൽ ലോക്സഭാ പ്രവർത്തനങ്ങൾ സംപ്രേഷണം ചെയ്യുന്ന ലോക്സഭാ ടി വിയും രാജ് സഭാ നടപടികൾ സംപ്രേഷണം ചെയ്യുന്ന രാജ് സഭാ ടി വിയുമുണ്ട്. ഇതേ മാതൃകയിൽ നിയമസഭ ടി വി സംപ്രേഷണം ചെയ്യാനാണ് തീരുമാനം.

ന്യൂസ് ചാനലുകളിൽ സംപ്രേഷണം ചെയ്യുന്ന വിനോദ പരിപാടികളിൽ നിയമ സഭയ്‌ക്കുള്ളിലെ കാര്യങ്ങൾ ഹാസ്യാത്മകമായി അവതരിപ്പിക്കുന്ന സാഹചര്യം കണക്കിലെടുത്താണ് ഇത്തരത്തിലൊരു തീരുമാനം. ഇതിലൂടെ നിയമസഭയുടെ ഗൗരവവും പ്രാധാന്യതയും ജനങ്ങളിലേയ്ക്ക് എത്തിക്കാൻ കഴിയും. നിയമസഭയിലെ ചർച്ചകളും തീരുമാനങ്ങളും ജനങ്ങൾക്ക് ഏതൊക്കെ രീതിയിലാണ് സഹായകരമാകുന്നുവെന്നു വിശദമാക്കാനും അവരെ ബോധവൽക്കരിക്കാനുമുള്ള പരിപാടികൾ ആസൂത്രണം ചെയ്യുന്നുണ്ട്. ടി വി മാത്രമല്ല സഭയെ കടലാസ്സു വിമുക്തമാകാനുള്ള ശ്രമവും ആരംഭിച്ചു കഴിഞ്ഞു. കടലാസ് രഹിത കേരള നിയമസഭ’ എന്ന ആശയമാണ് സ്പീക്കർ ഉദ്ദേശിക്കുന്നത്. 50 കോടിയോളം ചിലവഴിച്ചാണ് സഭാ രേഖകൾ തയ്യാറാക്കുന്നത്. അതിനാൽ സഭയെ പൂർണമായും ഡിജിറ്റലാക്കാനാണ് പദ്ധതി.