ഇം​ഗ്ലീഷ് പ്രീമിയർ ലീ​ഗിൽ സീസണിലെ ആദ്യ വിജയം സ്വന്തമാക്കി മുൻ ചാംപ്യൻമാരായ ലിവർപൂൾ. ആദ്യ രണ്ട് മത്സരങ്ങളിലും സമനിലയിൽ കുരുങ്ങിയ ലിവർപൂൾ മൂന്നാം പോരാട്ടത്തിൽ പ്രമോട്ട് ചെയ്യപ്പെട്ട് പ്രീമിയർ ലീ​ഗിൽ തിരിച്ചെത്തിയ ഇപ്സ്‍വിച് ടൗണിനെതിരെ അനായാസ വിജയം നേടുകയായിരുന്നു. മറുപടിയില്ലാത്ത രണ്ട് ​ഗോളിനാണ് ലിവർപൂൾ വിജയിച്ചു കയറിയത്.

മത്സരത്തിന്റെ ആദ്യ 9 മിനിറ്റിനുള്ളിൽ തന്നെ ലിവർപൂൾ ഇരട്ട ​ഗോളുകൾ നേടി. രണ്ട് ​ഗോളുകളും വലയിലാക്കിയത് അലക്സാണ്ടർ ഇസാക്. 6, 9 മിനിറ്റുകളിലാണ് താരം വല ചലിപ്പിച്ചത്. ലിവർപൂൾ മാനേജരായി ഈ സീസണിൽ ചുമതലയേറ്റ ആന്റണി ഇറോളയുടെ ആദ്യ പ്രീമിയർ ലീ​ഗ് വിജയം കൂടിയാണിത്. ജയത്തോടെ ലിവർപൂൾ പോയിന്റ് പട്ടികയിൽ അഞ്ചാം സ്ഥാനത്തേക്കും കയറി. നിലവിൽ അവർക്ക് 3 കളിയിൽ 5 പോയിന്റ്. കളിയുടെ ആറാം മിനിറ്റിൽ കോഡി ​ഗാക്പോ കൈമാറിയ പാസിൽ നിന്നാണ് ഇസാക് ആദ്യ ​ഗോൾ നേടിയത്.

മൂന്ന് മിനിറ്റിനുള്ളിൽ സമാന കൂട്ടുകെട്ടു തന്നെയാണ് ടീമിനു രണ്ടാം ​ഗോളും സമ്മാനിച്ചത്. ആദ്യ പകുതി തീരുന്നതിന് മിനിറ്റുകൾ ശേഷിക്കെ ഇസാക് ഹാട്രിക്ക് ​ഗോളും നേടിയിട്ടുണ്ടായിരുന്നു. ഫ്ലോറിയൻ വിയറ്റ്സിന്റെ പാസിൽ താരം വല ചലിപ്പിച്ചു. എന്നാൽ ഇത് ഓഫ് സൈഡായി മാറി.
റെക്കോർഡ് തുകയ്ക്ക് കഴിഞ്ഞ ദിവസം പിഎസ്ജിയിൽ നിന്നു ലിവർപൂൾ ടീമിലെത്തിയ ബ്രാഡ്‍ലി ബാർക്കോള ടീമിനായി കളത്തിലെത്തി. കളിയുടെ അവസാന 25 മിനിറ്റിലാണ് താരം കളിച്ചത്.