കുണ്ടറ പൊലീസ് കസ്റ്റഡിയില്‍ നിന്ന് രക്ഷപ്പെട്ട മോഷണക്കേസ് പ്രതി പിടിയില്‍. സാരഥി ജംഗ്ഷന് സമീപത്ത് നിന്നാണ് എഴുകോണ്‍ പുത്തന്‍നട സ്വദേശി വൈജേഷിനെ (23) പൊലീസ് പിടികൂടിയത്. ലോക്കപ്പ് പൂട്ടാന്‍ മറന്നതിനെ തുടര്‍ന്നാണ് കസ്റ്റഡിയില്‍ നിന്ന് പ്രതി ഓടി രക്ഷപ്പെട്ടത്. മോഷണക്കേസില്‍ കസ്റ്റഡിയിലെടുത്ത വൈജേഷ് ലോക്കപ്പ് തുറന്ന് ഓടി രക്ഷപ്പെടുകയായിരുന്നു. വൈജേഷിനെ ലോക്കപ്പില്‍ അടച്ചശേഷം പൂട്ടാന്‍ മറന്നുപോയിരുന്നു. ഇതോടെ രാത്രി ഒന്നരയോടെ പൊലീസുകാരുടെ കണ്ണുവെട്ടിച്ച് വൈജേഷ് ലോക്കപ്പ് തുറന്ന് ഇറങ്ങിപോകുകയായിരുന്നു.

രണ്ടുദിവസം മുമ്പ് നാന്തിരിക്കലെ ഒരു വീട്ടില്‍ നിന്ന് വയറിംഗ് സാമഗ്രികള്‍ മോഷ്ടിച്ചെന്ന പരാതിയിലാണ് ഇയാളെ പൊലീസ് കസ്റ്റഡിയിലെടുത്തത്. നാന്തിരിക്കലിലെ പവര്‍ ടൂള്‍സ് കടയില്‍ നിന്ന് വയറിങ്, പ്ലമിങ് സാമഗ്രികള്‍ മുറിക്കുന്ന ഉപകരണങ്ങള്‍ വൈജേഷ് വാടകക്കെടുക്കുകയും ചെയ്തിരുന്നു. ചൊവ്വാഴ്ച രാത്രി ഇവ തിരിച്ചുനല്‍കാന്‍ എത്തിയ വൈജേഷിനെ വീട്ടുകാര്‍ തടഞ്ഞുവെച്ച് പൊലീസില്‍ അറിയിക്കുകയായിരുന്നു.

റൂറല്‍ കണ്‍ട്രോള്‍ റൂം എസ്.ഐ അനില്‍കുമാര്‍ സ്ഥലത്തെത്തി ഇയാളെ കസ്റ്റഡിയിലെടുത്ത് വൈദ്യ പരിശോധനക്ക് ശേഷം കുണ്ടറ സ്‌റ്റേഷനിലെത്തിച്ചു. ചൊവ്വാഴ്ച രാത്രി രണ്ട് പൊലീസുകാര്‍ മാത്രമാണ് സംഭവസമയം സ്‌റ്റേഷനിലുണ്ടായിരുന്നത്.