പാതിരിപ്പള്ളി ഇളയമ്പള്ളിക്കോണത്തെ ജവഹര്‍ ഇംഗ്ലീഷ് മീഡിയം സ്‌കൂളിലെ പട്ടിക്കൂട് വിഷയം സംബന്ധിച്ച് ബാലാവകാശ കമ്മീഷന്‍ ഹൈക്കോടതിക്ക് റിപ്പോര്‍ട്ട് നല്‍കി. തന്നെ പട്ടിക്കൂട്ടിലടച്ചുവെന്ന് ആരോപണമുന്നയിച്ച അഭിഷേകിന്റെ ജാതി, സ്‌കൂളിലെ അടിസ്ഥാനസൗകര്യങ്ങള്‍ എന്നിവയെക്കുറിച്ചുള്ള പരാമര്‍ശം ഉള്‍പ്പെടെ 20ഓളം പേജു വരുന്ന റിപ്പോര്‍ട്ടാണ് കമ്മീഷന്‍ സമര്‍പ്പിച്ചിരിക്കുന്നത്. റിപ്പോര്‍ട്ട് പ്രകാരം കുട്ടി എസ്.സി വിഭാഗത്തില്‍പ്പെടുന്നില്ലെന്ന് കമ്മീഷന്‍ കണ്ടെത്തിയിട്ടുണ്ട്. അദര്‍ എലജിബിള്‍ കമ്മ്യൂണിറ്റിയില്‍ ഉള്‍പ്പെട്ടതാണ് അഭിഷേക് എന്നാണ് റിപ്പോര്‍ട്ടില്‍ പറയുന്നത്.
കുട്ടിയെ പട്ടിക്കൂട്ടിലടച്ചിട്ടുണ്ടോ ഇല്ലയോ എന്നതു സംബന്ധിച്ച് പോലീസാണ് അന്വേഷണം നടത്തി നിജസ്ഥിതി പുറത്തുകൊണ്ടു വരേണ്ടതെന്നു കമ്മീഷന്‍ പറയുന്നുണ്ട്. ജവഹര്‍ സ്‌കൂളില്‍ അടിസ്ഥാനസൗകര്യങ്ങളില്ല എന്ന കാര്യവും കമ്മീഷന്‍ റിപ്പോര്‍ട്ടില്‍ പരാമര്‍ശിക്കുന്നുണ്ട്. സ്‌കൂളിലെ പ്രശ്‌നം സംബന്ധിച്ച് ഒരു വനിതാ ഐ.പി.എസ് ഉദ്യോഗസ്ഥയെക്കൊണ്ട് അന്വേഷിപ്പിക്കണമെന്നതാണ് കമ്മീഷന്‍ റിപ്പോര്‍ട്ടിലെ പ്രധാന പരാമര്‍ശം.
ഇതുകൂടാതെ അടിസ്ഥാനസൗകര്യങ്ങളില്ലാതെ പ്രവര്‍ത്തിക്കുന്ന എല്ലാ സ്ഥാപനങ്ങളിലും അന്വേഷണം നടത്തി ഉചിതമായ നടപടികള്‍ സ്വീകരിക്കണമെന്നും കമ്മീഷന്‍ പറയുന്നുണ്ട്. ജവഹര്‍ സ്‌കൂളിലെ വിഷയം സംബന്ധിച്ച് അന്വേഷണം നടത്തണമെന്ന വി. ശിവന്‍കുട്ടി എം.എല്‍.എ ഹൈക്കോടതിയില്‍ ആവശ്യപ്പെട്ടിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha