ഓടിക്കൊണ്ടിരുന്ന കെഎസ്ആര്ടിസി ബസിലെ ഡ്രൈവര് കുഴഞ്ഞു വീണു മരിച്ചു, അച്ഛന്റെ മരണത്തിന് ദൃക്സാക്ഷിയായി മകളും, ആ കാഴ്ച യാത്രക്കാരെ കണ്ണീരിലാഴ്ത്തി
ഓടിക്കൊണ്ടിരുന്ന കെ.എസ്.ആര്.ടി.സി. ബസിലെ ഡ്രൈവര് ഹൃദയാഘാതത്തെത്തുടര്ന്ന് മരിച്ചു. ഇതേ ബസിലെ യാത്രക്കാരിയായിരുന്ന മകള് അച്ഛന്റെ മരണത്തിനു ദൃക്സാക്ഷിയായി. നെടുമങ്ങാട് ഡിപ്പോയിലെ ഡ്രൈവര് മൂഴി കുളപ്പള്ളി കിഴക്കുംകര വീട്ടില് കെ.ജയരാജ്(55) ആണ് നാല്പതു യാത്രക്കാരുമായുള്ള ഓട്ടത്തിനിടയില് ഹൃദയാഘാതത്തെത്തുടര്ന്ന് മരിച്ചത്.
സഹയാത്രികനും കെ.എസ്.ആര്.ടി.സി.യിലെ ജീവനക്കാരനുമായ സുഹൃത്താണ് പകരം ഡ്രൈവറായത്. കല്ലറ മുതുവിള പരപ്പില്നിന്ന് നെടുമങ്ങാട്ടേക്കു വരികയായിരുന്ന ബസിലെ ഡ്രൈവര് ജയരാജ് ശാരീരിക അസ്വസ്ഥത തോന്നിയതിനെത്തുടര്ന്ന് ബസ് പുത്തന്പാലം മൂഴിക്കു സമീപം ഒതുക്കിനിര്ത്തി, െ്രെഡവിങ് സീറ്റിലേക്കു കുഴഞ്ഞുവീഴുകയായിരുന്നു. യാത്രക്കാര് പരിഭ്രാന്തരായി.
ഉടനെ ബസിലെ യാത്രക്കാരനും സഹജീവനക്കാരനുമായ ടി.ശിവകുമാര് ജയരാജിനെ ഡ്രൈവിങ് സീറ്റില്നിന്നു മാറ്റിയശേഷം ബസ് നെടുമങ്ങാട് ജില്ലാ ആശുപത്രിയിലെത്തിച്ചു. അപ്പോഴേയ്ക്കും ജയരാജ് മരിച്ചിരുന്നു. നെടുമങ്ങാട് സ്വകാര്യ സ്ഥാപനത്തിലെ വിദ്യാര്ഥിനിയായ ജയരാജിന്റെ ഇളയമകള് ജയരാഗിണി ഇതേ ബസില് യാത്രക്കാരിയായിരുന്നു. അച്ഛന്റെ മരണത്തിന് മകള് സാക്ഷിയായത് സങ്കടകരമായ അനുഭവമായി.
തന്റെ ബസിലുണ്ടായിരുന്ന യാത്രക്കാരെ രക്ഷിക്കാന് ജയരാജ് പരമാവധി ശ്രമിച്ചു. മനസ്സാന്നിദ്ധ്യം കൈവിടാതെ ബസ് സുരക്ഷിതമായ സ്ഥലത്ത് ഒതുക്കിയശേഷമാണ് ഡ്രൈവിങ് സീറ്റില് കുഴഞ്ഞുവീണത്.
പി.എസ്.സി. വഴി നിയമിതനായ ജയരാജ് 11 വര്ഷമായി നെടുമങ്ങാട് ഡിപ്പോയില് സേവനമനുഷ്ഠിക്കുകയായിരുന്നു. മുമ്പ് താത്കാലികാടിസ്ഥാനത്തിലും 10 വര്ഷം ഇവിടെ ജോലിനോക്കിയിട്ടുണ്ട്. വട്ടിയൂര്ക്കാവ് സ്വദേശിയാണ് ജയരാജ്. വിരമിക്കാന് ഒമ്പതു മാസം ബാക്കി നില്ക്കവേയാണ് ജോലിക്കിടയില് ജയരാജ് മരിച്ചത്.
പോസ്റ്റുമോര്ട്ടത്തിനു ശേഷം നെടുമങ്ങാട് ഡിപ്പോയിലെത്തിച്ച മൃതദേഹം പൊതുദര്ശനത്തിനു വച്ചു. കെ.എസ്.ആര്.ടി.സി.ക്കു വേണ്ടി ഡി.ടി.ഒ. കെ.സുരേഷ്കുമാര് ആദരാഞ്ജലി അര്പ്പിച്ചു. ഭാര്യ: പരേതയായ രാധാമണി. മക്കള്: ജയരഞ്ജിനി, ജയരാഗിണി. മരുമകന്: ഉണ്ണി. സഞ്ചയനം ഞായറാഴ്ച രാവിലെ 9ന്.
https://www.facebook.com/Malayalivartha
