സംസ്ഥാനത്ത് 'പിഎം ശ്രീ' പദ്ധതി നടപ്പാക്കാനുള്ള യു.ഡി.എഫ് സര്‍ക്കാരിന്റെ നീക്കത്തിനെതിരെ കടുത്ത വിമര്‍ശനവുമായി പ്രതിപക്ഷ നേതാവ് പിണറായി വിജയന്‍. മുന്‍പ് പ്രതിപക്ഷത്തിരുന്നപ്പോള്‍ പിഎം ശ്രീ പദ്ധതിയെ എതിര്‍ത്തവരാണ് യു.ഡി.എഫെന്നും, അന്ന് കോണ്‍ഗ്രസും ലീഗും ചേര്‍ന്ന് വലിയ വിവാദങ്ങള്‍ ഉയര്‍ത്താനാണ് ശ്രമിച്ചതെന്നും അദ്ദേഹം കുറ്റപ്പെടുത്തി.

അന്ന് എല്‍.ഡി.എഫ് സര്‍ക്കാര്‍ കേന്ദ്രവുമായി ചര്‍ച്ച നടത്തുമ്പോള്‍ 'ബിജെപിസിപിഎം ഡീല്‍' എന്നും, കേരളം കേന്ദ്രത്തിന് കീഴടങ്ങിയെന്നും പ്രചരിപ്പിച്ചവരാണ് ഇപ്പോള്‍ ഭരണം കിട്ടിയപ്പോള്‍ പദ്ധതിയുമായി മുന്നോട്ട് പോകുന്നതെന്ന് പിണറായി വിജയന്‍ ചൂണ്ടിക്കാട്ടി.

മുന്‍ സര്‍ക്കാര്‍ ധാരണാപത്രത്തില്‍ ഒപ്പിട്ടതുകൊണ്ട് ഈ പദ്ധതിയുമായി മുന്നോട്ട് പോകുകയല്ലാതെ മറ്റ് വഴികളില്ലെന്നാണ് യുഡിഎഫ് ഇപ്പോള്‍ ന്യായീകരിക്കുന്നത്. അതില്‍ നിന്നും പിന്നോട്ട് പോകാന്‍ കഴിയില്ലെന്ന വാദമാണ് അവര്‍ ഉന്നയിക്കുന്നത്. എന്നാല്‍ ഒപ്പിട്ടതുകൊണ്ട് മാത്രം ഒരു പദ്ധതിയും നടപ്പാക്കേണ്ടതില്ലെന്നും, തെറ്റായ വാദങ്ങള്‍ നിരത്തി ജനങ്ങളെ വഴിതെറ്റിക്കാനാണ് യുഡിഎഫ് ശ്രമിക്കുന്നതെന്നും പ്രതിപക്ഷ നേതാവ് പറഞ്ഞു. മുന്‍പ് എല്‍ഡിഎഫ് സര്‍ക്കാര്‍ പദ്ധതി നടപ്പാക്കിയില്ലെന്ന് ആരോപിച്ച് ഒച്ചപ്പാടുണ്ടാക്കിയവര്‍ തന്നെയാണ് ഇപ്പോള്‍ ഈ മലക്കംമറച്ചില്‍ നടത്തുന്നതെന്നും അദ്ദേഹം കൂട്ടിച്ചേര്‍ത്തു.

കേരളത്തിലെ യു.ഡി.എഫ് ഒരു കാര്യം ആലോചിക്കണമെന്ന് പിണറായി വിജയന്‍ ഓര്‍മ്മിപ്പിച്ചു. ഇന്ത്യയില്‍ കോണ്‍ഗ്രസ് നേതൃത്വം നല്‍കുന്ന മറ്റ് സംസ്ഥാന സര്‍ക്കാരുകളെല്ലാം ഈ പദ്ധതിയുടെ ഭാഗമായാണ് പ്രവര്‍ത്തിക്കുന്നത്.

'ഇന്ത്യയിലുള്ള കോണ്‍ഗ്രസ് ഭരിക്കുന്ന എല്ലാ സംസ്ഥാന സര്‍ക്കാരുകളും പിഎം ശ്രീ പദ്ധതി നടപ്പാക്കുന്നുണ്ട്. ഒരു വിയോജിപ്പും ഒരു സര്‍ക്കാരും ഇതുവരെ പുറപ്പെടുവിച്ചിട്ടില്ല. അവര്‍ പദ്ധതിയില്‍ ഒപ്പിടുകയും ദേശീയ വിദ്യാഭ്യാസ നയം എന്തൊക്കെയാണോ നിര്‍ദ്ദേശിച്ചിരിക്കുന്നത് അതെല്ലാം അതുപോലെ നടപ്പാക്കാന്‍ തയ്യാറാവുകയും ചെയ്തിട്ടുണ്ട്. കോണ്‍ഗ്രസിന്റെ യഥാര്‍ത്ഥ നിലപാട് എന്താണെന്നതാണ് ഇവിടെ പ്രസക്തമായ ചോദ്യം.'