ധനമന്ത്രി കെ എം മാണിയെ കുടുക്കാനായി ഉന്നത യുഡിഎഫ് നേതാക്കള്‍ ഗൂഢാലോചന നടത്തിയതായി തെളിവുകള്‍. ബാര്‍ കോഴ വിഷയത്തില്‍ ബിജു രമേശ് പി സി ജോര്‍ജുമായും ആര്‍ ബാലകൃഷ്ണ പിള്ളയുമായും ഫോണില്‍ സംസാരിച്ചതിന്റെ തെളിവുകള്‍ പുറത്തു വിട്ടു. രണ്ടു രാഷ്ട്രീയ നേതാക്കളുമായും ബിജു രമേശ് നടത്തിയ ഫോണ്‍ സംഭാഷണമാണ് പുറത്ത് വിട്ടത്.
ധനമന്ത്രി കെ എം മാണിക്കെതിരെ കടുത്ത നിലപാടാണ് ഇരുനേതാക്കളും സ്വീകരിച്ചതെന്ന് ഫോണ്‍ സംഭാഷണത്തിലൂടെ വ്യക്തമാണ്. മാണിക്കെതിരായ നീക്കത്തില്‍ എല്ലാ പിന്തുണയും അറിയിക്കുന്നുവെന്നും തങ്ങള്‍ കൂടെയുണ്ടെന്നുമുള്ള തരത്തിലാണ് ഇരുനേതാക്കളും ബിജുവിനോടു സംസാരിച്ചത്.
നമുക്കൊന്ന് കാണണം എന്ന് പി സി ജോര്‍ജ് ഫോണ്‍ സംഭാഷണത്തില്‍ ബിജുവിനോട് ആവശ്യപ്പെടുന്നുണ്ട്. ബിജു രമേശാണ് പി സി ജോര്‍ജിനെ വിളിച്ചത്. ബാര്‍ കോഴ നടന്നതായി ബാലകൃഷ്ണ പിള്ള സംഭാഷണത്തില്‍ ശരിവയ്ക്കുന്നുമുണ്ട്. കോഴ വിവാദത്തില്‍ സിബിഐ അന്വേഷണം ആവശ്യപ്പെടണമെന്ന് പിള്ള ആവശ്യപ്പെട്ടു. ആരോപണത്തില്‍ നിന്ന് പിന്മാറരുതെന്ന് പിള്ള ബിജുവിനോട് ആവശ്യപ്പെടുന്നുമുണ്ട്.
പ്രമുഖ നേതാക്കള്‍ പലരും ബാര്‍ കേസ് ഒതുക്കിത്തീര്‍ക്കാന്‍ ആവശ്യപ്പെട്ടിരുന്നുവെന്ന് ബിജു രമേശ് പറഞ്ഞിരുന്നു. നവംബറിലാണ് ജോര്‍ജ് ബിജു രമേശിനെ വിളിച്ചത്.
പി സി ജോര്‍ജ് ബിജുവിനെ വിളിച്ചെങ്കിലും എടുത്തില്ല. പിന്നീട് റെക്കോര്‍ഡിങ്ങുള്ള മറ്റൊരു ഫോണില്‍ നിന്ന് ജോര്‍ജിനെ ബിജു തിരികെ വിളിച്ചു. നാലാം തിയതിയോ അഞ്ചാം തിയതിയോ ഈരാറ്റുപേട്ടയില്‍ വന്നാല്‍ മതിയെന്ന് ആദ്യം പി സി ജോര്‍ജ് പറയുന്നുണ്ട്. എന്നാല്‍ താന്‍ ആ ദിവസം എറണാകുളത്താണെന്നു ബിജു പറയുന്നു.
നവംബര്‍ ഒന്നിനാണ് ബിജു രമേശും ബാലകൃഷ്ണ പിള്ളയും തമ്മില്‍ സംസാരിച്ചത്. കെ എം മാണി ബാര്‍ വിഷയത്തില്‍ കോഴ കൈപ്പറ്റിയ കാര്യം താന്‍ മുഖ്യമന്ത്രിയെ അറിയിച്ചിരുന്നുവെന്ന് പിള്ള ബിജുവിനോടു പറയുന്നുണ്ട്. അപ്പോള്‍ മുഖ്യമന്ത്രി ഒന്നും പറയാതെ താടിക്കു കൈയും കൊടുത്ത് ഇരിക്കുകയായിരുന്നു. കേസില്‍ സിബിഐ അന്വേഷണം ആവശ്യപ്പെടണമെന്നു പിള്ള പറയുന്നു. ഇറങ്ങിത്തിരിച്ച സ്ഥിതിക്ക് വിട്ടുകളയരുതെന്നും താന്‍ മറ്റെയാളെ വിളിച്ചു പറയാമെന്ന് പറഞ്ഞാണു ഫോണ്‍ സംഭാഷണം അവസാനിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha