മേനോന് അന്ന് വെറും ബാലചന്ദ്രന്... എസ്എഫ്ഐയും യൂണിവേഴ്സിറ്റി കോളജും വീണ്ടും വിവാദത്തില് നിറയുമ്പോള് മനസ് തുറന്ന് ബാലചന്ദ്ര മേനോന്; കുളിച്ച് കുറിതൊട്ട് പ്രാര്ത്ഥനയുമായി പരീക്ഷ എഴുതാന് വന്ന വിദ്യാര്ത്ഥിയെ നേരിട്ടത് സൈക്കിള് ചെയിന്
തിരുവനന്തപുരം യൂണിവേഴ്സിറ്റി കോളേജ് വീണ്ടും വിവാദങ്ങളിലേക്ക് നീക്കുകയാണ്. കല്ലും കമ്പും വടിയും ഒക്കെയായിരുന്നു അന്നും പണ്ടും ഇന്നും വിദ്യാര്ത്ഥി നേതാക്കളുടെ ആയുധം. അതില് മാസ്റ്റര് പീസായിരുന്നു സൈക്കിള് ചെയിന്. അതുകൊണ്ടൊരു അടി കിട്ടിയാല് ആ പാട് മാറണമെങ്കില് ഏഴ് ജന്മം കഴിയണം. എന്നാല് കാലം മാറിയതോടെ സൈക്കിള് ചെയിന് കിട്ടാനില്ല. പകരം ക്രിക്കറ്റ് ബാറ്റും ഹോക്കി സ്റ്റിക്കും മലപ്പുറം കത്തിയുമൊക്കെയായി. പഴയകാലം ഓര്ത്തെടുക്കുകയാണ് പ്രശസ്ത സിനിമാ താരം ബാലചന്ദ്ര മേനോന്.
കെ എസ് യുവിന്റെ കോട്ടയായിരുന്ന തിരുവനന്തപുരം യൂണിവേഴ്സിറ്റി കോളജില് നിന്നും അവരെ വേരോടെ പിഴുതെറിഞ്ഞാണ് എസ് എഫ് ഐ അധികാരം ഉറപ്പിച്ചത്. വര്ഷങ്ങള്ക്ക് മുമ്പാണ് ഇത്തരം ഒരു നേട്ടം എസ് എഫ് ഐ കൈവരിച്ചത്. എസ്എഫ്ഐ പിന്തുണയോടെ 1974ല് മല്സരിച്ച് ചെയര്മാനായ ബാലചന്ദ്രമേനോന്റെ വാക്കുകളാണ് ഇപ്പോള് വൈറലായിരിക്കുന്നത്.
ബാലചന്ദ്രമേനോന്റെ ഫേസ് ബുക്ക് പോസ്റ്റിന്റെ പൂര്ണ രൂപം
വരുന്ന വെള്ളിയാഴ്ച 'filmy Fridays'ല് ഞാന് പരാമര്ശിക്കുന്നത് എന്റെ യൂണിവേഴ്സിറ്റി കോളേജ് ജീവിതമാണ് ...
മുന് രാഷ്ട്രപതി കെ ആര് നാരായണന് അടക്കം എത്രയോ പ്രതിഭകളെ വാര്ത്തെടുത്ത ആ കലാലയത്തില് പഠിക്കാനും അവിടുത്തെ ചെയര്മാനായി 'വിലസുവാനും' എനിക്ക് കിട്ടിയ അവസരം ഒരു ഭാഗ്യമായെ ഞാന് കാണുന്നുള്ളൂ .
എന്നാല് ആ കോളേജിലെ രാഷ്ട്രീയത്തിന് ഒരു അപകടസൂചന കൂടിയുണ്ട് എന്ന് കൂടി കൂട്ടി വായിക്കണം .രാവിലെ കുളിച്ചു പരീക്ഷ എഴുതാന് ചെല്ലുന്ന ഒരു കോളേജ് യൂണിയന് ഭാരവാഹി കോളേജ് ഗേറ്റു കടക്കുമ്പോള് എതിരേല്ക്കുന്നതു ഓര്ക്കാപ്പുറത്തു കിട്ടുന്ന എതിരാളിയുടെ സൈക്കിള് ചെയിന് കൊണ്ടുള്ള ഇരുട്ടടി ആയിരിക്കും . അതിന്റെ കാരണം അറിയുന്നത് വൈകുന്നേരമായിരിക്കും .അതാവട്ടെ തലേ ദിവസം കാസര്ഗോഡ് കോളേജില് നടന്ന ഒരു കുടിപ്പകയുടെ പകരം വീട്ടലായിരിക്കും . എങ്ങനുണ്ട്?
എന്നാല് സത്യം പറയട്ടെ , എനിക്ക് അങ്ങിനെ ഒരു പീഡനം ഉണ്ടാകാഞ്ഞതും ഭാഗ്യമെന്നേ പറയേണ്ടു... പക്ഷെ എന്നില് ഒരു ആജ്ഞാശ്ശക്തി അന്തര്ലീനമായിട്ടുണ്ട് എന്ന് ഞാന് തിരിച്ചറിഞ്ഞതും യൂണിവേഴ്സിറ്റി കോളേജില് വെച്ചാണ് . നമുക്ക് നേരെ ചീറിപ്പാഞ്ഞു വരുന്ന ഒരു ആനയെ നോക്കി സര്വ്വ ശക്തിയും സമാഹരിച്ചു ആക്രോശിച്ചാല് ആന വിരണ്ടു നില്കുന്നത് ഞാന് പിന്നീട് പല വീഡിയോയിലും കണ്ടിട്ടുണ്ട് . ഞാന് ചെയര്മാന് ആയിരിക്കെ നടന്ന ഒരു ചടങ്ങില് സഖാവ് ഇ .എം .എസ് ആയിരുന്നു മുഖ്യാതിഥി .ഒരു പക്ഷെ ഞാന് ജീവിതത്തില് ആദ്യമായും അവസാനമായും ഒരു വേദി അദ്ദേഹവുമായി പങ്കിട്ട ഒരേ ഒരു സന്ദര്ഭവും അതായിരിക്കണം .
മീറ്റിംഗ് കഴിഞ്ഞു എല്ലാവരും പിരിഞ്ഞുകഴിഞ്ഞപ്പോള് ആവശ്യമില്ലാതെ ഒരു ക്രമാസമാധാന പ്രശ്നമുണ്ടായി . അത്യാവശ്യം കല്ലേറും ഉന്തും തല്ലും ഒക്കെ ചേര്ന്ന ഒരു മസാല . പുറത്തു നിന്നിരുന്ന പോലീസുകാര് കൂടി ആയപ്പോള് സംഗതി കുശാലായി . കോളേജിന്റെ ഒരു അടഞ്ഞ ബാല്ക്കണിയില് നിന്ന എന്നെ ലാക്കാക്കി ഒരു ഭീമാകാരന് പോലീസ് ചീറിപ്പാഞ്ഞു വരുന്നത് ഞാന് കണ്ടു . എന്നാല് എനിക്കെങ്ങോട്ടും ചാടിപ്പോകാനാവില്ല . ഭിത്തിയോട് ചേര്ന്ന് നില്ക്കാനേ കഴിയുള്ളൂ .അടി ഉറപ്പു തന്നെ . ചെയര്മാനായാലും അടി കൊണ്ടാല് നോവുമല്ലോ .ആ നിമിഷം എന്നിലും ഒരു ആവേശം നിറഞ്ഞു എന്നാലാവുന്ന തരത്തില് ഞാന് അലറി വിളിച്ചു :
'എന്നെ തൊട്ടു പോകരുത്....'
ആ ഗര്ജ്ജനത്തിനു മുന്നില് പോലീസുകാരന്റെ ലാത്തി അറിയാതെ താണത് എങ്ങിനെ എന്ന് എനിക്കും ഇന്നും വിശ്വാസം വരുന്നില്ല . പക്ഷെ കാക്കിക്കുള്ളിലെ ആ മനുഷ്യ സ്നേഹിയെ ഇപ്പോള് നന്ദിപൂര്വ്വം ഓര്ക്കാതെ വയ്യ .മരിച്ചു പോയ എന്റെ സഹപാഠി ലെനിന് രാജേന്ദ്രന് ആ സംഭവത്തെപ്പറ്റി തമാശയായി പറഞ്ഞു പരത്തിയത് എനിക്കോര്മ്മയുണ്ട് ...
'യൂണിവേഴ്സിറ്റി കോളേജിലെ ചെയര്മാന് ആയിരുന്നിട്ടു പോലീസിന്റെ ഒരു തല്ലു പോലും കൊള്ളാതെ രക്ഷപെട്ട ഒരാള് ബാലചന്ദ്ര മേനോന് മാത്രമായിരിക്കും . ഞാന് ഇപ്പോഴും കരുതുന്നത് അടിക്കാന് വന്ന പൊലീസിന് വേണ്ടി ഒന്നുകില് മേനോന് ഒരുപാട്ടു പാടി കാണും ; അല്ലെങ്കില് ഒരു മിമിക്രി കാണിച്ചു കാണും . ആ ഗ്യാപ്പില് അടികൊള്ളാതെ രക്ഷപെട്ടുക്കാണും '
WELCOME TO UNIVERSITY COLLEGE !
that's ALL your honour.......
https://www.facebook.com/Malayalivartha
