യൂണിവേഴ്‌സിറ്റി കോളേജിലെ എസ്എഫ്‌ഐക്കെതിരെ ഗുരുതര ആരോപണങ്ങളുമായി മുന്‍ വിദ്യാര്‍ത്ഥിനി നിഖില. ക്യാമ്പസില്‍ കാര്യങ്ങളെല്ലാം നിയന്ത്രിക്കുന്നത് എസ്എഫ്‌ഐ നേതാക്കളാണ്. മദ്യവും മയക്കുമരുന്നും വരെ ക്യാമ്പസിലുണ്ട്. വിവിധ കേസിലുള്ള പ്രതികള്‍ ഒളിവില്‍ കഴിയുന്നത് ക്യാമ്പസിന് അകത്താണെന്നും പ്രിന്‍സിപ്പാള്‍ പോലും എസ്എഫ്‌ഐയുടെ കയ്യിലെ പാവയാണെന്നും യൂണിവേഴിസിറ്റി കോളേജില്‍ നിന്ന് പഠനമുപേക്ഷിച്ച് പോയ നിഖില പറയുന്നു. യൂണിവേഴ്‌സിറ്റി കോളേജ് യൂണിറ്റിന്റെ വിദ്യാര്‍ത്ഥി വിരുദ്ധ പ്രവര്‍ത്തനങ്ങള്‍ ആദ്യം ചര്‍ച്ചയായതും നിഖിലയുടെ ചെറുത്ത് നില്‍പ്പോടെയായിരുന്നു. അവിടുത്തെ ക്യാന്റീനില്‍ അദ്യവര്‍ഷ ബിരുധ വിദ്യാര്‍ത്ഥികള്‍ക്ക് ഭ്രഷ്ട് കല്‍പ്പിച്ചിരുന്നതായുള്ള വെളിപ്പെടുത്തലുകളും വരുന്നുണ്ട്

പഠിക്കാനുള്ള നല്ല അവസരം വേറെ കിട്ടിയിട്ടും നല്ലരീതിയില്‍ പഠിക്കണം എന്ന് ആഗ്രഹിച്ചാണ് യൂണിവേഴ്‌സിറ്റി കോളേജ് തെരഞ്ഞെടുത്തത്. മികച്ച ലൈബ്രറി സംവിധാനം അടക്കമുള്ള കാര്യങ്ങളാണ് കോളേജില്‍ ചേരുമ്പോഴുണ്ടായിരുന്ന പരിഗണന. എന്നാല്‍ പ്രതീക്ഷിച്ചതോ സ്വപ്നം കണ്ടതോ ആയ അനുഭവമല്ല യൂണിവേഴ്‌സിറ്റി കോളേജില്‍ ഉണ്ടായതെന്നാണ് നിഖില പറയുന്നത്. കാര്യങ്ങളെല്ലാം തീരുമാനിക്കുന്നത് എസ്എഫ്‌ഐ ആണെന്നാണ് അവര്‍ അവകാശപ്പെട്ടിരുന്നത്. ചോദ്യം ചെയ്താല്‍ പരീക്ഷ എഴുതിക്കില്ലെന്നും ജീവിതം നശിപ്പിക്കുമെന്നും ഭീഷണിപ്പെടുത്തും. സമരങ്ങള്‍ക്കും പ്രകടനങ്ങള്‍ക്കും നിര്‍ബന്ധിച്ച് കൊണ്ട് പോകും. സമരപരിപാടികള്‍ക്ക് പങ്കെടുക്കുന്നു എന്ന് ഉറപ്പ് വരുത്താന്‍ ഡിപ്പാര്‍ട്ട്‌മെന്റില്‍ വേറെ വിദ്യാര്‍ത്ഥികളെ ഏര്‍പ്പാടാക്കിയിരുന്നു എന്നും നിഖില പറയുന്നു. 

യൂണിവേഴ്സിറ്റി കോളേജിലുണ്ടായ സംഘര്‍ഷവുമായി ബന്ധപ്പെട്ട് സിപിഎം ജില്ലാ നേതൃത്വം അനുനയ ചര്‍ച്ചയ്ക്ക് എത്തിയതായി അഖിലിന്റെ അച്ഛന്‍ ചന്ദ്രന്റെ വെളിപ്പെടുത്തല്‍. കേസുമായി മുന്നോട്ട് പോകാനാണോ താല്‍പര്യമെന്ന് ഇന്നലെ ആശുപത്രിയില്‍ അഖിലിനെ സന്ദര്‍ശിച്ച സിപിഎം ജില്ലാ നേതൃത്വം ചോദിച്ചിരുന്നതായും ചന്ദ്രന്‍ പറഞ്ഞു. ഏത് വിധത്തിലുള്ള സമ്മര്‍ദ്ദമുണ്ടായാലും കേസുമായി മുന്നോട്ട് പോകുമെന്ന് ചന്ദ്രന്‍ പറഞ്ഞു. അഖിലിന്റെ ആ?ഗ്രഹപ്രകാരമാണ് യൂണിവേഴ്സിറ്റി കോളേജില്‍ ചേര്‍ന്നത്. കോളേജില്‍ ചേര്‍ന്ന സമയത്ത് തന്നെ എസ്എഫ്ഐ പ്രവര്‍ത്തകര്‍ അഖിലിനെ പലതരത്തില്‍ പ്രകോപിപ്പിക്കുകയും ഉപദ്രവിക്കുകയും ചെയ്തിരുന്നു. തങ്ങളുടേത് ഒരു പാര്‍ട്ടി കുടുംബമാണ്. താനിപ്പോഴും സിപിഎംകാരന്‍ തന്നെയാണ്. പാര്‍ട്ടിയുമായി യാതൊരു പ്രശ്നവുമില്ല. എന്നാല്‍ കേസിലൊരു വിട്ടുവീഴ്ചയ്ക്കും തയ്യാറല്ലെന്നും ചന്ദ്രന്‍ വ്യക്തമാക്കി. അതേസമയം, പവര്‍ ലിഫ്റ്റിങ് ചാമ്പ്യനായ അഖിലിന് ശസ്തക്രിയ കഴിഞ്ഞതിനാല്‍ ഇനി മത്സരങ്ങളില്‍ പങ്കെടുക്കാന്‍ കഴിയുമോ എന്ന ആശങ്കയുണ്ടെന്നും ചന്ദ്രന്‍ പറഞ്ഞു.