ബാര്‍ അസോസിയേഷന്‍ സംസ്ഥാന വര്‍ക്കിംഗ് പ്രസിഡന്റ് ബിജു രമേശുമായി സംസാരിച്ചതിന്റെ ശബ്ദരേഖ പുറത്തുവന്ന സാഹചര്യത്തില്‍ കേരള കോണ്‍ഗ്രസ്-ബി ചെയര്‍മാന്‍ ആര്‍.ബാലകൃഷ്ണപിള്ളയ്‌ക്കെതിരേ നടപടി വേണമെന്ന് കേരള കോണ്‍ഗ്രസ്-എം ആവശ്യപ്പെട്ടു. ബാലകൃഷ്ണപിള്ളയുടെ പാര്‍ട്ടിയെ യുഡിഎഫില്‍ നിന്നും പുറത്താക്കണമെന്നാണ് കെ.എം.മാണിയുടെ ആവശ്യം. ഇക്കാര്യം ആവശ്യപ്പെട്ട് മാണി യുഡിഎഫ് നേതൃത്വത്തെ സമീപിച്ചു.
മുന്നണിയില്‍ നിന്നുള്ളവര്‍ തന്നെ ഇത്തരം ആരോപണങ്ങള്‍ ഉന്നയിക്കുന്നത് വന്‍ പൊട്ടിതെറിയുണ്ടാക്കും. ഇക്കാര്യങ്ങള്‍ കണ്ടില്ലെന്ന് നടിക്കാന്‍ കഴിയില്ല. ബാര്‍ കോഴ ആരോപണത്തില്‍ തനിക്കെതിരേയുള്ള ഗൂഢാലോചന വ്യക്തമായെന്നും ശക്തമായ നടപടിയുണ്ടായില്ലെങ്കില്‍ മുന്നണിയില്‍ തുടരാന്‍ താത്പര്യമില്ലെന്നും മാണി നേതൃത്വത്തെ അറിയിച്ചു.
മാണിക്ക് മുസ്‌ലിം ലീഗിന്റെ പിന്തുണയും ഇക്കാര്യത്തില്‍ ഉണ്ട്. മാണിക്കെതിരേ പറഞ്ഞ കാര്യങ്ങള്‍ പിള്ള നിഷേധിക്കാത്ത സാഹചര്യത്തില്‍ കടുത്ത നടപടി വേണമെന്ന് തന്നെയാണ് ലീഗിന്റെയും നിലപാട്. എന്നാല്‍ ഇക്കാര്യം ലീഗ് ഔദ്യോഗികമായി ആവശ്യപ്പെട്ടിട്ടില്ല.
പൊതുമരാമത്ത് മന്ത്രി വി.കെ.ഇബ്രാഹിംകുഞ്ഞിന്റെ പേഴ്‌സണല്‍ സ്റ്റാഫിനെതിരേ കെ.ബി.ഗണേഷ്‌കുമാര്‍ ആരോപണങ്ങള്‍ ഉന്നയിച്ചപ്പോഴും കടുത്ത നടപടിയുണ്ടായില്ല. പാര്‍ലമെന്ററി പാര്‍ട്ടി യോഗത്തില്‍ നിന്നും ഗണേഷിനെ മാറ്റിനിര്‍ത്തുക മാത്രമാണ് ചെയ്തത്. ഇനി ഇത്തരം നടപടികള്‍ പോരെന്നും കടുത്ത നടപടി വേണമെന്നുമാണ് കേരള കോണ്‍ഗ്രസ് എമ്മിന്റെയും ലീഗിന്റെയും നിലപാട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha