കര്‍ക്കിടക പുലരിയില്‍ അയ്യപ്പനെ കണ്ടു വണങ്ങാനായി ശബരിമലയില്‍ വന്‍ ഭക്തജനതിരക്ക്. ഭക്തിയുമായി മലകയറിയ പതിനായിരങ്ങള്‍ കര്‍ക്കടകപ്പുലരിയില്‍ ഹരിഹരാത്മജനെ കണ്ടു തൊഴുതു. ഭക്തരുടെ വന്‍ തിരക്കായിരുന്നു ശബരിമലയില്‍. പതിനെട്ടാംപടി കയറാനും ദര്‍ശനത്തിനും മണിക്കൂറുകള്‍ നീണ്ട കാത്തുനില്‍പ്പായിരുന്നു. പൂക്കള്‍ കൊണ്ട് അലംകൃതമായിരുന്നു ക്ഷേത്രവും സന്നിധാനവും പരിസരവും.

അയ്യപ്പ സ്വാമിക്ക് കളഭാഭിഷേകവും പുഷ്പാഭിഷേകവും നടന്നു. തന്ത്രി കണ്ഠര് രാജീവരുടെ കാര്‍മികത്വത്തില്‍ ബ്രഹ്മകലശം പൂജിച്ചു. വാദ്യഘോഷങ്ങളോടെ ശ്രീകോവിലില്‍ എത്തിച്ച് ഉച്ചയ്ക്ക് കളഭാഭിഷേകം നടന്നു. മേല്‍ശാന്തി വി.എന്‍.വാസുദേവന്‍ നമ്ബൂതിരി സഹകാര്‍മികത്വം വഹിച്ചു.