കരുവാറ്റ കൊലപാതകത്തില് മൂന്ന് പ്രതികളെയും പൊലീസ് കസ്റ്റഡിയില് വിടാന് ഉത്തരവ്
കരുവാറ്റയില് വാടകയ്ക്ക് താമസിച്ചിരുന്ന ശിവന്കുട്ടി ചെട്ടിയാര് കൊലക്കേസില് പ്രായപൂര്ത്തിയാകാത്ത മൂന്ന് പ്രതികളെയും പൊലീസ് കസ്റ്റഡിയില് വിടാന് ഉത്തരവിട്ട് ആലപ്പുഴ ജുവനൈല് കോടതി. കോടതിയുടേത് അസാധാരണ നടപടിയാണ്. പ്രായപൂര്ത്തിയാകാത്ത കുട്ടികളെ പൊലീസ് കസ്റ്റഡിയില് വിടാന് ജുവനൈല് ജസ്റ്റിസ് നിയമത്തില് വ്യവസ്ഥയില്ല. അത്തരത്തിലുള്ള മുന് കോടതി വിധികളുമില്ല. എന്നാല് ഈ വാദങ്ങള് തള്ളിയാണ് കോടതിയുടെ ഉത്തരവ്.
കൊല്ലം പരവൂര് കൊച്ചാലുംമൂട് സരസ്വതി നിവാസില് ശിവന്കുട്ടി ചെട്ടിയാറാണ് (65) കഴിഞ്ഞ ഓഗസ്റ്റ് 15ന് കൊല്ലപ്പെട്ടത്. മോശമായി പെരുമാറിയെന്ന് ചെറുമകളായ പെണ്കുട്ടി പറഞ്ഞതിനെ തുടര്ന്നാണ് കരുവാറ്റയിലെ ഗൃഹനാഥനെ കൊന്നതെന്നാണ് അറസ്റ്റിലായ ആണ്കുട്ടികള് മൊഴി നല്കിയത്. സ്വര്ണവും പണവും മോഷ്ടിക്കാനാണ് എത്തിയതെന്നും ഇവര് മൊഴി നല്കിയിരുന്നു.
ക്രിമിനല് നടപടി ചട്ടത്തില് പറയുന്ന വ്യവസ്ഥകളനുസരിച്ച് പ്രതികളെ തെളിവെടുപ്പിന് വിട്ടുകിട്ടണമെന്ന പ്രോസിക്യൂഷന്റെ ആവശ്യമാണ് കോടതി അംഗീകരിച്ചത്. കുട്ടികളെ ലോക്കപ്പിലും ജയിലിലും പാര്പ്പിക്കരുതെന്ന് മാത്രമേ ജുവനൈല് ജസ്റ്റിസ് നിയമത്തില് പറയുന്നുള്ളൂ.
കുട്ടികള് മാത്രം പ്രതികളായ, ദൃക്സാക്ഷികളില്ലാത്ത, അടച്ചിട്ട വീട്ടില് അര്ദ്ധരാത്രിയില് നടത്തിയ കൊലപാതകത്തില് പ്രതികളെ തെളിവെടുപ്പിന് വിട്ടുകിട്ടിയില്ലെങ്കില് കേസ് ദുര്ബലപ്പെടുമെന്നും പ്രോസിക്യൂഷന് കോടതിയെ ധരിപ്പിച്ച സാഹചര്യത്തിലാണ് ഉത്തരവ്. കുട്ടികളെ ദുരുപയോഗം ചെയ്ത് കൊലപാതകം നടത്തിയാല് നിയമ പരിരക്ഷ കിട്ടില്ലെന്ന സന്ദേശമാണ് വിധിയെന്നും പ്രോസിക്യൂഷന് വ്യക്തമാക്കി.
https://www.facebook.com/Malayalivartha
