അസമിലെ ഗുവാഹത്തിയിൽ നാടിനെ നടുക്കിയ ക്രൂരമായ കൊലപാതകം. 25 കാരിയായ ഭാര്യ റിയ താലൂക്ക്ദാർ ഗോസ്വാമിയെ അതിക്രൂരമായി കൊലപ്പെടുത്തിയ ശേഷം ഭർത്താവ് രാമാനുജൻ ഗോസ്വാമി ഹതിഗാവ് പൊലീസിന് മുന്നിൽ കീഴടങ്ങി കുറ്റസമ്മതം നടത്തി.ഗുവാഹത്തിയിലെ ബസിഷ്ഠപൂരിലുള്ള ഒരു അപ്പാർട്ട്മെന്റിലാണ് ദാരുണമായ ഈ സംഭവം നടന്നത്. ഫ്ലാറ്റിൽ നിന്ന് കടുത്ത ദുർഗന്ധം വമിച്ചതിനെ തുടർന്ന് അയൽവാസികൾ അധികൃതരെ വിവരം അറിയിക്കുകയായിരുന്നു. തുടർന്ന് പോലീസ് എത്തി നടത്തിയ പരിശോധനയിലാണ് ഞായറാഴ്ച രാത്രിയോടെ റിയയുടെ മൃതദേഹം കണ്ടെത്തുന്നത്.റിയയെ കൊലപ്പെടുത്തിയ ശേഷം പ്രതി തലയറുത്ത് പോളിത്തീൻ ബാഗിലാക്കി ഫ്ലാറ്റിലെ ഫ്രിഡ്ജിനുള്ളിൽ സൂക്ഷിക്കുകയായിരുന്നു. കൂടാതെ യുവതിയുടെ വിരലുകളും വെട്ടിമാറ്റിയ നിലയിലായിരുന്നു. കൊലപാതകത്തിന് ഉപയോഗിച്ചതെന്ന് കരുതുന്ന ആയുധവും മദ്യക്കുപ്പികളും പോലീസ് സംഭവസ്ഥലത്തുനിന്ന് കണ്ടെടുത്തിട്ടുണ്ട്.

മൃതദേഹം കണ്ടെത്തുന്നതിന് 48 മണിക്കൂർ മുമ്പാണ് കൊലപാതകം നടന്നതെന്നാണ് പ്രാഥമിക നിഗമനം.ഓൺലൈൻ ടാക്സി ഡ്രൈവറായ രാമാനുജനും വസ്ത്രവ്യാപാര സ്ഥാപനത്തിലെ ജീവനക്കാരിയായ റിയയും ആറുമാസം മുമ്പാണ് വിവാഹിതരായത്. നിലവിൽ ഗുവാഹത്തി മെഡിക്കൽ കോളേജിലേക്ക് മാറ്റിയ മൃതദേഹത്തിൽ ഫൊറൻസിക്, വിരലടയാള വിദഗ്ധർ പരിശോധനകൾ പൂർത്തിയാക്കി തെളിവുകൾ ശേഖരിച്ചിട്ടുണ്ട്. പ്രതിയുടെ അറസ്റ്റ് രേഖപ്പെടുത്തിയ പോലീസ് നിലവിൽ ചോദ്യം ചെയ്യൽ തുടരുകയാണ്. കേസിൽ സംസ്ഥാന ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റും (സിഐഡി) പ്രത്യേക അന്വേഷണം ആരംഭിച്ചിട്ടുണ്ട്.