പ്രക്ഷോഭങ്ങളില്‍ പങ്കെടുത്തതിന്റെ പേരില്‍ 19 കാരികളായ ഇരട്ട സഹോദരിമാര്‍ക്ക് അതിക്രൂരമായ ശിക്ഷാവിധികള്‍ ചുമത്തി ഇറാന്‍ ഭരണകൂടം. ഹൈസ്‌കൂള്‍ വിദ്യാര്‍ത്ഥിനികളായ തരാനെ റഹീമി, റോമിന റഹീമി എന്നിവര്‍ക്കാണ് ഇറാനിലെ വിചാരണക്കോടതി കടുത്ത ശിക്ഷ വിധിച്ചിരിക്കുന്നത്. പ്രക്ഷോഭങ്ങളില്‍ പങ്കെടുത്തതിന് തരാനെയ്ക്ക് വധശിക്ഷയും സഹോദരി റോമിനയ്ക്ക് 25 വര്‍ഷത്തെ കഠിനതടവുമാണ് നല്‍കിയിരിക്കുന്നത്. ഈ വര്‍ഷം ജനുവരി 8, 9 തീയതികളില്‍ ഇസ്ഫഹാനില്‍ നടന്ന വന്‍ജനകീയ പ്രക്ഷോഭത്തിലാണ് ദശലക്ഷക്കണക്കിന് ആളുകള്‍ക്കൊപ്പം ഈ പെണ്‍കുട്ടികളും പങ്കെടുത്തത്.

എന്നാല്‍ മുന്‍പൊരിക്കലും ഇത്തരം രാഷ്ട്രീയ അല്ലെങ്കില്‍ സര്‍ക്കാര്‍ വിരുദ്ധ പ്രതിഷേധങ്ങളില്‍ പങ്കെടുത്തിട്ടില്ലാത്തവരായിരുന്നു ഇരുവരും. പ്രക്ഷോഭം നടന്ന് ഏകദേശം ഒരു മാസത്തിനു ശേഷം ഇരുവരെയും രാത്രിയില്‍ വീടുവളഞ്ഞ് പിടിച്ചുകൊണ്ടുപോവുകയായിരുന്നു.മുഖംമൂടി ധരിച്ചെത്തിയ ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് (IRGC) ഉദ്യോഗസ്ഥര്‍ പെണ്‍കുട്ടികളുടെ തലയില്‍ ചാക്കുകള്‍ കയറ്റി അര്‍ദ്ധരാത്രിയില്‍ വീടുകയറി ആക്രമിച്ചാണ് ഇവരെ കസ്റ്റഡിയിലെടുത്തത്.  മാസങ്ങള്‍ നീണ്ട തിരച്ചിലിനൊടുവില്‍ ഇസ്ഫഹാനിലെ ദൗലാതാബാദ് ജയിലിലാണ് പെണ്‍കുട്ടികളെ പാര്‍പ്പിച്ചിരിക്കുന്നതെന്ന് ഇവര്‍ക്ക് സന്ദേശം ലഭിക്കുകയായിരുന്നു.

തുടര്‍ന്ന് കഴിഞ്ഞ മേയ് മാസത്തിലാണ് അമ്മയ്ക്ക് മക്കളെ നേരില്‍ കാണാന്‍ ജയില്‍ അധികൃതര്‍ അനുമതി നല്‍കിയത്. എന്നാല്‍ ജയിലില്‍ മക്കളെ കണ്ട മര്‍സിയയ്ക്ക് സ്വന്തം പെണ്‍മക്കളെ തിരിച്ചറിയാന്‍ പോലുമാകാത്ത അവസ്ഥയായിരുന്നു.ക്രൂരമായ പീഡനങ്ങളെത്തുടര്‍ന്ന് ഇരുവരുടെയും മുഖവും ശരീരവും വീര്‍ത്തുപോയിരുന്നു. ഇവരുടെ മുടി മുഴുവന്‍ പിഴുതെടുത്ത നിലയിലായിരുന്നുവെന്നും കൈമുട്ടുകളും കാല്‍മുട്ടുകളും കാല്‍പാദങ്ങളും തകര്‍ന്ന നിലയിലായിരുന്നുവെന്നും യു.എസിലെ യൂട്ടായില്‍ താമസിക്കുന്ന ഇവരുടെ ബന്ധു മസൂദ് നോര്‍മൊഹമ്മദി വെളിപ്പെടുത്തി.

ജയില്‍ ഗാര്‍ഡുകള്‍ പെണ്‍കുട്ടികളെ മുടിയില്‍ പിടിച്ച് സെല്ലുകളില്‍ നിന്ന് സെല്ലുകളിലേക്ക് വലിച്ചിഴച്ചതായും ഇവരെ ഏകാന്തതടവില്‍ പാര്‍പ്പിച്ചിരിക്കുകയായിരുന്നുവെന്നും കുടുംബം ആരോപിക്കുന്നു.തടവറയില്‍ വച്ച് ക്രൂരമായ ശാരീരിക പീഡനങ്ങള്‍ക്ക് ഇരയായെന്നും ബലമായാണ് കുറ്റസമ്മതം നടത്തുന്ന പത്രങ്ങളില്‍ ഒപ്പുവെപ്പിച്ചതെന്നും കോടതിയില്‍ വ്യക്തമാക്കി.