അമേരിക്കയിലെ ലോസ് ഏഞ്ചൽസിലുള്ള സൗത്ത് ബേ പ്രദേശത്ത് നേരിയ ഭൂചലനം അനുഭവപ്പെട്ടു. ഞായറാഴ്ച പുലർച്ചെ 12:15 ഓടെയാണ് പ്രകമ്പനം ഉണ്ടായത്. യുഎസ് ജിയോളജിക്കൽ സർവേയുടെ കണക്കുകൾ പ്രകാരം റിക്ടർ സ്കെയിലിൽ 3.2 തീവ്രതയാണ് ഈ ഭൂചലനത്തിന് രേഖപ്പെടുത്തിയത്.കോംപ്ട്ടണിൽ നിന്ന് രണ്ട് മൈൽ തെക്കുകിഴക്കായി, ഭൂമിക്കടിയിൽ ഏകദേശം എട്ട് മൈൽ ആഴത്തിലാണ് ഭൂചലനത്തിന്റെ പ്രഭവകേന്ദ്രം എന്ന് അധികൃതർ വ്യക്തമാക്കി. പ്രദേശവാസികൾക്ക് ശക്തമായ പ്രകമ്പനം അനുഭവപ്പെട്ടെങ്കിലും ആളപായമോ മറ്റ് നാശനഷ്ടങ്ങളോ എവിടെയും റിപ്പോർട്ട് ചെയ്തിട്ടില്ല. എങ്കിലും നിലവിലെ സാഹചര്യങ്ങൾ അധികൃതർ സൂക്ഷ്മമായി നിരീക്ഷിച്ചു വരികയാണ്.ദക്ഷിണ കലിഫോർണിയയിലെ ഉയർന്ന ടെക്റ്റോണിക് സമ്മർദ്ദവും ഭാവിയിൽ 7.5 തീവ്രത വരെ രേഖപ്പെടുത്താൻ സാധ്യതയുള്ള വലിയ ഭൂകമ്പങ്ങളെക്കുറിച്ചുള്ള ശാസ്ത്രജ്ഞരുടെ മുന്നറിയിപ്പുകളും ആശങ്ക ഉയർത്തുന്നുണ്ട്.