പലനാളുകളായി പരസ്യ പ്രസ്ഥാവനകളുമായി യുഡിഎഫിനെ ദുര്‍ബലപ്പെടുത്തുന്ന കേരള കോണ്‍ഗ്രസ് ബി നേതാവ് ബാലകൃഷ്ണപിള്ളയെ സംബന്ധിച്ചിടത്തോളം വരാന്‍ പോകുന്നത് നിര്‍ണായക നാളുകളാണ്. എല്ലാം വെട്ടിത്തുറന്ന് പറയുന്ന പിള്ള ഇപ്പോള്‍ ശരിക്കും വെട്ടിയിലായിരിക്കുകയാണ്. വര്‍ഷങ്ങള്‍ക്ക് മുമ്പ് ജയിലിലായിരുന്ന സമയത്ത്, കിംസ് ആശുപത്രിയില്‍ സുഖ ചികിത്സയിലായിരുന്നപ്പോഴും ബാലകൃഷ്ണ പിള്ള ഇതുപോലെ ഫോണില്‍ പെട്ടു പോയിരുന്നു. അന്ന് നികേഷിന്റെ ചാനലായ റിപ്പോര്‍ട്ടര്‍ക്ക് പിള്ള നല്‍കിയ ഫോണ്‍ ഇന്‍ ഇന്റര്‍വ്യൂ ഏറെ വിവാദമായിരുന്നു. ജയില്‍പുള്ളി ഫോണ്‍ ഉപയോഗിച്ചത് ഏറെ വിവാദമാകുകയും ചെയ്തു. അന്ന് യുഡിഎഫ് ഭരിച്ചിരുന്നത് കൊണ്ടു മാത്രമാണ് പിള്ള രക്ഷപ്പെട്ടത്.

ഇന്നും അതുപോലെ പിള്ള വെട്ടിലായിരിക്കുകയാണ്. വിവാദ മദ്യവ്യവസായി ബിജു രമേശുമായി തന്റെ മനസിലുള്ളത് പിള്ള തുറന്നു പറഞ്ഞു. ഗണേഷിനെ മന്ത്രിയാക്കാത്തതിലുള്ള അമര്‍ഷം തന്നെയായിരുന്നു ഉള്ളില്‍. തന്നെ മൈന്‍ഡ് ചെയ്യാത്ത ഉമ്മന്‍ചാണ്ടി സര്‍ക്കാരിനെ ഒരു പാഠം പഠിപ്പിക്കുകയായിരുന്നു ലക്ഷ്യം. ആ ഒരു രീതിയിലാണ് ബിജുവിനോട് പിള്ള ഫോണില്‍ സംസാരിക്കുന്നത്. മാണിക്കെതിരായ കേസ് വിടരുതെന്നും ഇന്ന ആളിനെ പോയി കണ്ടാല്‍ മതിയെന്നും വരെ ഉപദേശിക്കുന്നു. മാത്രമല്ല മുഖ്യമന്ത്രിയെക്കൂടി ആരോപണ വിധേയനാക്കുകയും ചെയ്തു.
എന്നും പിള്ളയോട് മൃദു സമീപനം സ്വീകരിച്ചിരുന്ന ഉമ്മന്‍ചാണ്ടി ഇത്തവണ അത് തുറന്ന് പറയുകയും ചെയ്തു. പിള്ളയെ പുറത്താക്കണമോയെന്ന് യുഡിഎഫ് തീരുമാനിക്കുമെന്ന് മുഖ്യമന്ത്രി വ്യക്തമാക്കിക്കഴിഞ്ഞു.
അതേസമയം പിള്ളയും തോറ്റുകൊടുക്കാന്‍ തയ്യാറല്ല. പറഞ്ഞ കാര്യങ്ങളില്‍ ഉറച്ചു നില്‍ക്കുകയും ചെയ്തു. മാത്രമല്ല തന്നെ പുറത്താക്കൂ എന്നും പുറത്താക്കിയാല്‍ കൂടുതല്‍ കാര്യങ്ങള്‍ പറയാമെന്നും പിള്ള പറയുന്നു.
ഇതോടെയാണ് യുഡിഎഫ് പ്രത്യേകിച്ചും കോണ്‍ഗ്രസ് ധര്‍മ്മസങ്കടത്തിലായത്. സരിതയുടെ വിവാദമായ പരാതി ബാലകൃഷ്ണ പിള്ളയുടെ കൈവശമുണ്ടെന്നാണ് നേരത്തേയുള്ള വിലയിരുത്തല്‍. പല കോണ്‍ഗ്രസ് മന്ത്രിമാരും ഈ ലിസ്റ്റില്‍ ഉള്‍പ്പെട്ടിട്ടുണ്ട്. ആവശ്യം വന്നാല്‍ പിള്ള ഇത് അവസാനത്തെ അടവായി പുറത്തു വിടും. അങ്ങനെ വന്നാല്‍ ബാര്‍ കോഴ ഒന്നുമല്ലാതാകും. സരിത വീണ്ടും കളം നിറയും. ആ മലവെള്ളപ്പാച്ചിലില്‍ ഒഴുകിപ്പോകുന്നത് പല മന്ത്രിമാരായിരിക്കും. പിള്ളയുടെ ഈ ഒരു കാര്യത്തെ മാത്രമാണ് യുഡിഎഫ് ഭയപ്പെടുന്നത്.
അതേസമയം പിള്ളയെ പുറത്താക്കണമെന്ന് തന്നെയാണ് യുഡിഎഫ് നേതാക്കളുടേയും മാണി ഗ്രൂപ്പിന്റേയും ആവശ്യം. പിള്ളയുടെ രാജിക്കായുള്ള ചര്‍ച്ച അണിയറയില്‍ നടക്കുകയാണ്. പക്ഷെ പിള്ളയ്‌ക്കെങ്ങനെ മണികെട്ടുമെന്ന് കണ്ടറിയാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha