സംസ്ഥാന സ്‌കൂള്‍ കലോല്‍സവത്തില്‍ കോഴിക്കോടും പാലക്കാടും കലാകിരീടം പങ്കിട്ടു. 916 പോയിന്റ്‌വീതം. 899 പോയിന്റ് നേടി തൃശൂര്‍ രണ്ടാംസ്ഥാനത്തും 889 പോയിന്റ് നേടി കണ്ണൂര്‍ മൂന്നാം സ്ഥാനവും നേടി. കലോല്‍സവ ചരിത്രത്തില്‍ നാലാം തവണയാണു രണ്ടു ജില്ലകള്‍ കിരീടം പങ്കിടുന്നത്.
ഹൈസ്‌കൂള്‍ വിഭാഗത്തില്‍ സംസ്ഥാനത്തെ മികച്ച സ്‌കൂളായി പാലക്കാട് ഗുരുകുലത്തെയും ഹയര്‍സെക്കന്‍ഡറി വിഭാഗത്തില്‍ മികച്ച സ്‌കൂളായി കോഴിക്കോട് സില്‍വര്‍ ഹില്‍സ് എച്ച്.എസ്.എസിനെയും തെരഞ്ഞെടുത്തു. തുടര്‍ച്ചയായി ഒമ്പതാം തവണയും കോഴിക്കോട് സ്വര്‍ണക്കപ്പില്‍ തൊട്ടപ്പോള്‍ പാലക്കാടിന് ഇത് മൂന്നാമൂഴം.അവസാന നിമിഷം വരെ രണ്ട് പോയിന്റിന് പാലക്കാടായിരുന്നു മുന്നില്‍. എന്നാല്‍ അപ്പീലുകളില്‍ നിന്നു ലഭിച്ച പോയിന്റാണ് കോഴിക്കോടിനെയും പാലക്കാടിനൊപ്പം എത്തിച്ചത്. 40 അപ്പീലുകളാണ് അവസാനദിനം കോഴിക്കോടിനുണ്ടായിരുന്നത്.
വഞ്ചിപ്പാട്ടിന്റെ മല്‍സരഫലം വന്നപ്പോള്‍ കോഴിക്കോടിനും പാലക്കാടിനും 914 പോയിന്റുമായി ഒപ്പത്തിനൊപ്പമായിരുന്നു. പിന്നീട് ഏഴു വിഭാഗങ്ങളുടെ ഹയര്‍ അപ്പീലിന്റെ ഫലമായിരുന്നു വരാനുണ്ടായിരുന്നത്. നാലെണ്ണം കോഴിക്കോടിന്റെയും മൂന്നെണ്ണം പാലക്കാടിന്റേതുമായിരുന്നു.
2006ല്‍ എറണാകുളത്തു നടന്ന കലോത്സവത്തിലാണു പാലക്കാട് ജില്ല അവസാനമായി ചാമ്പ്യന്മാരായത്. 2005ലെ തിരൂര്‍ കലോത്സവത്തിലും ഇവര്‍ക്കായിരുന്നു കിരീടം. അതിനുശേഷം കിരീടം കോഴിക്കോട് വിട്ടുകൊടുത്തിട്ടില്ല. കഴിഞ്ഞ തവണ പാലക്കാട്ടു നടന്ന കലോത്സവത്തില്‍ ഫോട്ടോഫിനിഷിലായിരുന്നു കോഴിക്കോടിന്റെ കിരീടനേട്ടം. അവസാനകുതിപ്പില്‍ ആറു പോയിന്റിനാണ് അവര്‍ പാലക്കാടിനെ രണ്ടാംസ്ഥാനത്തേക്കു പിന്തള്ളിയത്. കിരീടം പങ്കിട്ടവര്‍