മിടുക്കനാ അവന്... തിരുവനന്തപുരം മെഡിക്കല് കോളേജിലെ മിടുക്കനായ വിദ്യാര്ത്ഥിയായിരുന്നു ശ്രീറാം വെങ്കിട്ടരാമന്; അവിടെ നിന്നും എംബിബിഎസ് കരസ്ഥമാക്കിയ ശേഷം ജൂനിയര് റെസിഡന്റായി ജോലി നോക്കവെ 2012ല് സിവില് സര്വീസ് പരീക്ഷയില് രണ്ടാം സ്ഥാനം; അധ്യാപകരുടേയും സഹപാഠികളുടേയും പ്രിയ കൂട്ടുകാരന്റെ തകര്ച്ചയില് വേദനിക്കുമ്പോള്...
എല്ലാം വിധിയുടെ വിളയാട്ടം എന്നല്ലാതെ എന്ത് പറയാന്. അല്ലെങ്കില് ഒരുകാലത്ത് കയ്യടി നേടിയ യുവ പ്രതിഭയായ ശ്രീറാം വെങ്കിട്ടരാമന് ഇങ്ങനെയൊരു അവസ്ഥയുണ്ടാകുമെന്ന് ആരും കരുതിയോ യുവ മാധ്യമ പ്രവര്ത്തകനായ കെ.എം. ബഷീറിനെ കാറിടിച്ച് കൊന്ന കേസില് പ്രതിയായി തിരുവനന്തപുരം മെഡിക്കല് കോളേജ് ആശുപത്രി സെല്ലില് പ്രവേശിക്കുമ്പോള് മരിക്കാത്ത ഓര്മ്മകളാണ് നിലനില്ക്കുന്നത്.
ഈ മെഡിക്കല് കോളേജില് നിന്നാണ് എം.ബി.ബി.എസ്. ബിരുദം നേടിയത്. തുടര്ന്ന് ഹൗസ് സര്ജന്സി നേടിയതും ഇവിടെ നിന്നാണ്. ഇത്രയും മിടുക്കനായൊരു വിദ്യാര്ത്ഥിയെ കിട്ടുക പ്രയാസമാണെന്നാണ് കേളേജിലെ അധ്യാപകര് പറയുന്നത്. സുഹൃത്തുക്കള്ക്കും വേണ്ടപ്പെട്ടവന് തന്നെ. മെഡിക്കല് കോളേജില് നിന്നുമാണ് ഹൗസ് സര്ജന്സി പൂര്ത്തിയാക്കിയത്. മെഡിക്കല് കോളേജ് ക്യാഷ്വാലിറ്റിയിലും വാര്ഡിലുമായി നിരവധി രോഗികളേയാണ് പരിചരിച്ചത്. കുറഞ്ഞ കാലയളവ് കൊണ്ട് നല്ലൊരു സുഹൃത് വലയം സൃഷ്ടിക്കാനും ശ്രീറാമിനായി. അവിടെ നിന്നും കുറച്ചുനാള് കട്ടക്കില് ജൂനിയര് റെസിഡന്റായും ജോലിനോക്കി. അപ്പോഴാണ് സിവില് സര്വീസ് എന്ന മോഹം ഉദിച്ചത്. 2012ല് നടന്ന സിവില് സര്വീസ് പരീക്ഷയില് രണ്ടാം റാങ്ക് നേടി. സിവില് സര്വീസ് റാങ്ക് നേടിയ ശ്രീറാം വെങ്കിട്ടരാമന് മെഡിക്കല് കോളേജില് നിന്ന് ഊഷ്മളമായ അഭിനന്ദനങ്ങളാണ് ലഭിച്ചത്. മിടുക്കനായ ഒരു ഡോക്ടറെ നഷ്ടപ്പെട്ടന്നാണ് പലരും പറഞ്ഞത്.
പിന്നീട് പത്തനംതിട്ടയില് അസിസ്റ്റന്റ് കലക്ടറായി നിയമനം. തുടര്ന്ന്, തിരുവല്ല ആര്ഡിഒ, ഡല്ഹിയില് ഭക്ഷ്യ പൊതുവിതരണ വകുപ്പില് അസിസ്റ്റന്റ് സെക്രട്ടറി, 2016 ജൂലൈ 22ന് ഇടുക്കി ജില്ലയില് ദേവികുളം സബ്കളക്ടര് എന്നീ ചുമതലകള് വഹിച്ചു. 2016 ഒക്ടോബറില് മൂന്നാറിലെ അനധികൃത ഭൂമി കൈയ്യേറ്റങ്ങള്ക്കെതിരെ നടപടിയുമായി മുന്നോട്ട് നീങ്ങി. ആര് എതിര്ത്താലും എന്ത് സംഭവിച്ചാലും കൈയ്യേറ്റ ഭൂമി ഒഴിപ്പിച്ചേ താന് മടങ്ങൂ എന്ന നിലപാടിലൂടെ പൊതുസമൂഹത്തില് കൈയ്യടി നേടി. തുടര്ന്ന് ശ്രീറാമിനെ ഒതുക്കി. പിന്നീടാണ് പഠനാര്ത്ഥം അവധിയെടുത്തതും തിരികെയെത്തിയതും വിവാദമായതും.
മാധ്യമ പ്രവര്ത്തകന്റെ മരണത്തോടെ നാടിളകി. കയ്യടിച്ചവരെല്ലാം തിരെകെ പറഞ്ഞു. ഡോക്ടറായ ശ്രീറാം മദ്യത്തിന്റെ അളവ് അലിയിച്ചുകളഞ്ഞു എന്നുപോലും ആരോപണമുണ്ടായി. സമയത്ത് രക്ത പരിശോധന നടത്താത്തതും ജനറില് ആശുപത്രിയില് നിന്നും മെഡിക്കല് കോളേജിലേക്ക് പോകാതെ ഫൈവ് സ്റ്റാര് ആശുപത്രിയില് കിടത്തിയതും വലിയ വിവാദമായി. അവസാനം മജിസ്ട്രേറ്റ് ജയില് വാസം വിധിച്ചു. എന്നാല് ആംബുലന്സിലെത്തിയ ശ്രീറാമിനെ ചികിത്സയ്ക്കായി തന്നെ വിട്ടു. അതും താന് പഠിച്ച് വളര്ന്ന് കുറച്ചുകാലം ഹൗസ് സര്ജനായി രോഗികളെ നോക്കിയ തിരുവനന്തപുരം മെഡിക്കല് കോളേജില്. ഇപ്പോഴും സൗഹൃദം സൂക്ഷിക്കുന്ന സ്വന്തം മെഡിക്കല് കോളേജില്. ഇതിനിടെ പല തവണ മെഡിക്കല് കോളേജ് സന്ദര്ശിച്ച് സൗഹൃദം പുതുക്കിയിട്ടുണ്ട്. അന്ന് പഠിപ്പിച്ചവരില് ബഹുഭൂരിപക്ഷവും അവിടെയുണ്ട്. തന്നോടൊപ്പം പഠിച്ച പലരും ഇവിടെ ഡോക്ടര്മാരായി സേവനം അനുഷ്ഠിക്കുന്നുമുണ്ട്. തങ്ങളുടെ പ്രിയപ്പെട്ടവന്റെ ഈ വരവ് ഒട്ടും പ്രതീക്ഷിച്ചതല്ല. നീ വലിയ ഐഎഎസ് നേടി. രക്ഷപ്പെട്ടടാ. ഇനി നമ്മളെയൊക്കെ ഓര്ക്കുമോ... അങ്ങനെ അവര് ചോദിച്ച നൂറായിരം ചോദ്യങ്ങള് ബാക്കി... ആരുടെയെങ്കിലും കണ്ണ് നിറഞ്ഞിട്ടുണ്ടെങ്കില് ക്ഷമിക്കുക. എല്ലാം വിധിയുടെ വിളയാട്ടം.
https://www.facebook.com/Malayalivartha
