അനധികൃത ഓണ്‍ലൈന്‍ വ്യാപാരത്തിനു പിഴ
നികുതി നല്‍കാതെ ഓണ്‍ലൈന്‍ കച്ചവടസ്ഥാപനങ്ങള്‍ സംസ്ഥാനത്തു നടത്തുന്ന അനധികൃത കച്ചവടത്തിനെതിരേ വാണിജ്യ നികുതി ഇന്റലിജന്‍സ് വിഭാഗം പിഴ ചുമത്തി. സിവില്‍ നിയമപ്രകാരം ഓണ്‍ലൈന്‍ കച്ചവട സ്ഥാപനങ്ങള്‍ നടത്തിയിട്ടുള്ള വ്യാപാരത്തിന്റെ രേഖകള്‍ പരിശോധിച്ചതിനു ശേഷമാണ് നടപടി.
ഫ്‌ളിപ്കാര്‍ട്ടിന് 47.15 കോടി രൂപയും, ജെബോംഗ് കോമിന് 3.89 കോടി രൂപയും വെക്ടര്‍ ഇ-കൊമേഴ്‌സിന് 2.23 കോടി രൂപയും റോബ്മാള്‍ അപ്പാരല്‍സിന് 36 ലക്ഷം രൂപയുമാണ് പിഴ ചുമത്തിയിരിക്കുന്നത്. വരുംദിവസങ്ങളില്‍ മറ്റ് ഓണ്‍ലൈന്‍ വ്യാപാര കമ്പനികളുടേയും കണക്കുകള്‍ പരിശോധിച്ചു പിഴ ചുമത്താനുള്ള നടപടികള്‍ തുടങ്ങിയതായി അധികൃതര്‍ അറിയിച്ചു. ഡെപ്യൂട്ടി കമ്മീഷണര്‍ വി. സതീഷിന്റെ നിര്‍ദേശപ്രകാരം കൊല്ലം ഇന്‍വെസ്റ്റിഗേഷന്‍ ബ്രാഞ്ച് ഒന്നിലേയും രണ്ടിലേയും ഉദ്യോഗസ്ഥരാണ് വ്യാപാരസ്ഥാപനങ്ങള്‍ക്കെതിരേ നടപടി സ്വീകരിച്ചത്.
ജനറല്‍ ക്ലോസസ് ആക്ട്, സെയില്‍സ് ഓഫ് ഗുഡ്‌സ് ആക്ട്, ട്രാന്‍സ്ഫര്‍ ഓഫ് പ്രോപ്പര്‍ട്ടി ആക്ട്, വാല്യൂ ആഡഡ് ടാക്‌സ് ആക്ട് തുടങ്ങിയവ പ്രകാരം ഓണ്‍ലൈന്‍ ട്രേഡിംഗ് ബിസിനസ് വ്യാപാരി, ചരക്ക്, വില്‍പന എന്നിവയുടെ പരിധിയില്‍ വരുന്നതാണെന്നു കണ്ടെത്തി. അതുകൊണ്ടു തന്നെ ഇത്തരം സ്ഥാപനങ്ങള്‍ നടത്തുന്ന വ്യാപാരത്തിനു നികുതി അടക്കേണ്ടതാണ്. എന്നാല്‍, ഇതുവരെ നികുതി അടച്ചിട്ടുമില്ല. അതിനാല്‍, ഈ സ്ഥാപനങ്ങള്‍ക്കെതിരേ പിഴ ചുമത്താന്‍ വാണിജ്യ വകുപ്പ് തീരുമാനിക്കുകയായിരുന്നു.
ഫ്‌ളിപ്കാര്‍ട്ട് പ്രൈവറ്റ് ലിമിറ്റഡ് -ബംഗളൂരു, ജെബോംഗ് -ഗുഡ്ഗാവ്, വെക്ടര്‍ ഇ-കൊമേഴ്‌സ്- ബംഗളൂരു, റോബ്മാള്‍ അപ്പാരല്‍സ് തുടങ്ങിയ കമ്പനികള്‍ 2012 മുതല്‍ 2014 വരെ സംസ്ഥാനത്തു നടത്തിയ ഇടപാടുകള്‍ വിജിലന്‍സ് വിശദമായ പരിശോധനയ്ക്കു വിധേയമാക്കി. ഓണ്‍ലൈന്‍വഴി ഉപഭോക്താക്കള്‍ ബുക്ക് ചെയ്യുന്ന സാധനങ്ങള്‍ വീട്ടിലെത്തിക്കുമ്പോള്‍ പണം നല്‍കുകയാണു പതിവ്. ഇങ്ങനെ ചെയ്യുമ്പോള്‍ സര്‍ക്കാരിനു ലഭിക്കേണ്ട വില്‍പന നികുതി നഷ്ടപ്പെടുകയാണു ചെയ്യുന്നത്. രജിസ്‌ട്രേഷന്‍ ഇല്ലാതെ നികുതി വെട്ടിപ്പ് നടത്തി വ്യാപാരം നടത്തുന്ന സ്ഥാപനങ്ങളെ കണ്ടെത്തിയാണു പ്രാരംഭ ഘട്ടമായി നടപടി സ്വീകരിച്ചതെന്നു ഡെപ്യൂട്ടി കമ്മീഷണര്‍ പറഞ്ഞു.
ബംഗളൂരു ഉള്‍പ്പെടെ അന്യ സംസ്ഥാനങ്ങളിലെ വിവിധ സ്ഥലങ്ങളില്‍നിന്നാണു സാധനങ്ങള്‍ ഓണ്‍ലൈന്‍ വഴി ബുക്ക് ചെയ്യുന്ന ഉപഭോക്താക്കള്‍ക്കു വിതരണം ചെയ്യുന്നതെന്നാണു വ്യാപാര സ്ഥാപന ഉടമകള്‍ പറയുന്നത്. അതേസമയം, വന്‍തോതില്‍ നികുതിവെട്ടിപ്പാണ് ഇത്തരത്തില്‍ നടക്കുന്നതെന്നാണ് സെയില്‍ടാക്‌സ് അധികൃതര്‍ പറയുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്Likeചെയ്യുക
https://www.facebook.com/Malayalivartha
