പിണറായി സര്ക്കാരിനെ വെട്ടിലാക്കി ഓര്ത്തഡോക്സ് സഭ. സുപ്രീംകോടതി വിധി നടപ്പാക്കാതെ മന്ത്രിസഭാ ഉപസമിതിയെ കൊണ്ട് ചര്ച്ചയ്ക്ക് ശ്രമിക്കുന്ന മുഖ്യമന്ത്രിക്ക് സഭ അന്ത്യശാസനം നല്കിയിരിക്കുകയാണ്
പിണറായി സര്ക്കാരിനെ വെട്ടിലാക്കി ഓര്ത്തഡോക്സ് സഭ. സുപ്രീംകോടതി വിധി നടപ്പാക്കാതെ മന്ത്രിസഭാ ഉപസമിതിയെ കൊണ്ട് ചര്ച്ചയ്ക്ക് ശ്രമിക്കുന്ന മുഖ്യമന്ത്രിക്ക് സഭ അന്ത്യശാസനം നല്കിയിരിക്കുകയാണ്. ഒരാഴ്ചയ്ക്കുള്ളില് വിധി നടപ്പാക്കിയില്ലെങ്കില് സര്ക്കാരിനെതിരെ കോടതിയലക്ഷ്യ ഹര്ജി നല്കുമെന്ന് സഭാ വ്ക്താവ് വ്യക്തമാക്കി. സുപ്രീംകോടതി വിധി നടപ്പാക്കേണ്ട ബാധ്യത സര്ക്കാരിനുണ്ടെന്ന് ഉപസമിതി ചര്ച്ചയ്ക്ക് നേതൃത്വം വഹിക്കുന്ന മന്ത്രി ഇ.പി ജയരാജനെ ഓര്ത്തഡോക്സ് സഭ നേതൃത്വം അറിയിച്ചിരുന്നു. രണ്ട് തവണ ഉപസമിതി ചര്ച്ചയ്ക്ക് വിളിച്ചെങ്കിലും ഓര്ത്തഡോക്സ് സഭ പങ്കെടുത്തില്ല. ഒരു തവണ ഇ.പി ജയരാജനുമായി കൂടിക്കാഴ്ച നടത്തുക മാത്രമാണ് ചെയ്തത്. സര്ക്കാരാണ് സഭാ തര്ക്കം വഷളാക്കുന്നതെന്ന് കേസ് തീര്പ്പാക്കിയ സുപ്രീംകോടതി ജഡ്ജി അരുണ്മിശ്ര വ്യക്തമാക്കിയിരുന്നു. മതപരമായ വിഷയങ്ങളില് സര്ക്കാരിനെന്താണ് കാര്യമെന്നും അദ്ദേഹം ചോദിച്ചു. അതോടെയാണ് ഓര്ത്തഡോക്സ് സഭ ശക്തമായ നിലപാട് സ്വീകരിച്ചത്.
കോടതിയലക്ഷ്യം നടന്നാല് ചീഫ് സെക്രട്ടറിയെ സുപ്രീംകോടതി വിളിച്ചുവരുത്തും. അത് സര്ക്കാരിന് വലിയ നാണക്കേടുണ്ടാക്കും. അത് മനസ്സിലാക്കിയാണ് ചീഫ് സെക്രട്ടറിക്ക് ഓര്ത്തഡോക്സ് സഭാ സെക്രട്ടറി കത്തയച്ചത്. കോടതിയലക്ഷ്യ ഹര്ജി നല്കുന്നതിന് മുന്നോടിയായുള്ള നീക്കമാണിതെന്ന് നിയമവിദഗ്ധര് പറയുന്നു. ഓര്ത്തഡോക്സ് സഭ ഇത് സംബന്ധിച്ച് നിയമോപദേശം തേടിയിരുന്നു. പിറവം കോതമംഗലം വിധികള് നടപ്പാക്കാത്തതില് ഓര്ത്തഡോക്സ് സഭയ്ക്ക് വലിയ പരാതിയുണ്ടായിരുന്നു. ഓര്ത്തഡോക്സ്, യാക്കോബായ സഭാ തര്ക്കത്തെ തുടര്ന്ന് ഓര്ത്തഡോക്സ് വിഭാഗത്തിന് അനുകൂലമായാണ് പിറവം, കോതമംഗലം പള്ളികളുടെ സ്വത്ത് തര്ക്ക കേസുകളില് വിധി ഉണ്ടായത്.
കഴിഞ്ഞ നിയമസഭാ തെരഞ്ഞെടുപ്പില് ചെങ്ങന്നൂര്, ആറന്മുള നിയമസഭാ മണ്ഡലങ്ങളില് ഓര്ത്തഡോക്സ് സഭ എല്ഡിഎഫിന് അകമഴിഞ്ഞ പിന്തുണ നല്കിയിരുന്നു. അങ്ങനെ യു.ഡി.എഫിന്റെ പരമ്പരാഗതമായ ഈ രണ്ട് മണ്ഡലങ്ങളും എല്.ഡി.എഫ് തിരിച്ചുപിടിച്ചു. ആറന്മുളയില് സിറ്റിംഗ് എം.എല്.എയും മുതിര്ന്ന കോണ്ഗ്രസ് നേതാവുമായ കെ. ശിവദാസന് നായരെയാണ് എല്.ഡി.എഫ് സ്വതന്ത്രയായ വീണാ ജോര്ജ്ജ് തോല്പ്പിച്ചത്. സഭയുടെ മകളെന്നാണ് അന്ന് ഓര്ത്തഡോക്സ് സഭ വീണാജോര്ജ്ജിനെ വിശേഷിപ്പിച്ചത്. ഇടത്പക്ഷത്തിന് ലോക്സഭാ തെരഞ്ഞെടുപ്പില് പിന്തുണ നല്കില്ലെന്ന് ഓര്ത്തഡോക്സ് സഭ സെക്രട്ടറി ബിജു ഉമ്മന് അന്ന് വ്യക്തമാക്കിയിരുന്നു.
അകമഴിഞ്ഞ പിന്തുണ നല്കിയിട്ടും തുടര്ച്ചയായി സഭയ്ക്കെതിരായ നടപടികളാണ് സര്ക്കാര് സ്വീകരിച്ചതെന്ന് ഓര്ത്തഡോക്സ് സഭ സെക്രട്ടറി ബിജു ഉമ്മന് പറഞ്ഞു. അത് വിശ്വാസികളുടെ മനസിനെ ആഴത്തില് മുറിവേല്പ്പിച്ചെന്നും അദ്ദേഹം പറഞ്ഞു. എന്നാല് ഒരു മുന്നണിക്കും പരസ്യപിന്തുണ നല്കില്ലെന്ന് ഓര്ത്തഡോക്സ് സഭ വക്താവ് ഫാ. ജോണ്സ് എബ്രഹാം കൊന്നാട്ട് പറഞ്ഞു. കഴിഞ്ഞ തവണ നടന്ന തെരഞ്ഞെടുപ്പുകളില് എല്.ഡി.എഫിന് അകമഴിഞ്ഞ പിന്തുണ നല്കിയിരുന്നു. പരസ്യപ്രസ്താവനകളും നടത്തിയിരുന്നു. ഇത്തവണ അതുകണ്ടാകില്ലെന്നും അദ്ദേഹം വ്യക്തമാക്കി. സര്ക്കാര് വഞ്ചിച്ചെന്നും ഓര്ത്തഡോക്സ് സഭയ്ക്ക് നീതി ലഭിച്ചില്ലെന്നും സഭാ തലവന് ബസേലിയോസ് മാര്തോമാ പൗലോസ് രണ്ടാമന് ഡിസംബറില് നിരണം രൂപതയില് നടന്ന വിശുദ്ധ കുര്ബാനയില് പറഞ്ഞിരുന്നു.
https://www.facebook.com/Malayalivartha
