പ്രധാനമന്ത്രി നരേന്ദ്രമോദിയുടെയും കേന്ദ്രസര്‍ക്കാരിന്റെയും വര്‍ഗീയ അജന്‍ഡകള്‍ക്കെതിരെ രാജ്യം കരുതിയിരിക്കണമെന്ന് സുപ്രീംകോടതിയിലെ പ്രശസ്ത അഭിഭാഷകനും ആംആദ്മി പാര്‍ട്ടി നേതാവുമായ പ്രശാന്ത് ഭൂഷന്‍. പ്രസ് ക്‌ളബ്ബിന്റെ മീറ്റ് ദ് പ്രസ് പരിപാടിയില്‍ പങ്കെടുക്കുകയായിരുന്നു അദ്ദേഹം. കേന്ദ്രസര്‍ക്കാരിനൊപ്പം സംഘപരിവാര്‍ സംഘടനകളെല്ലാമുണ്ട്. രാജ്യമാകെ വര്‍ഗീയ വിഷം പരത്തുകയാണ് ഈ സംഘടനകള്‍. മറ്റുള്ളവരുടെ വ്യക്തിത്വം വകവയ്ക്കാത്ത ഫാസിസ്റ്റ് രീതികളാണ് മോദിക്കും ഈ സംഘടനാ നേതാക്കള്‍ക്കുമുള്ളത്. ഭൂമി ഏറ്റെടുക്കല്‍, പ്രകൃതി സംരക്ഷണം, തൊഴിലുറപ്പ് തുടങ്ങിയ മേഖലകളില്‍ യുപിഎ സര്‍ക്കാര്‍ ഏര്‍പ്പെടുത്തിയ ജനോപകാര പ്രദമായ പല നിയമങ്ങളും മോദി സര്‍ക്കാര്‍ റദ്ദാക്കുകയാണ്.
ശാസ്ത്ര രംഗത്തു രാജ്യത്തിന്റെ നേട്ടങ്ങളെയെല്ലാം തള്ളിപ്പറഞ്ഞ് നൂറു വര്‍ഷം പിറകിലേക്കു കൊണ്ടുപോവാനാണു ശ്രമം. അഴിമതി വിരുദ്ധ പ്രസ്ഥാനത്തിന്റെ കാലത്തു തന്നെ കിരണ്‍ ബേദിക്കു ബിജെപിയോടുള്ള ചായ്‌വിനെ പറ്റി സംശയമുണ്ടായിരുന്നു. പ്രസ്ഥാനത്തെ നിയന്ത്രിക്കാന്‍ അവരെ അനുവദിച്ചിരുന്നില്ല. അവരുടേത് കക്ഷി രാഷ്ട്രീയ അവസരവാദമാണ്. തിരഞ്ഞെടുപ്പു വിജയത്തിനു വേണ്ടി പ്രഖ്യാപിത നിലപാടുകളിലും കാഴ്ചപ്പാടുകളിലും ആം ആദ്മി പാര്‍ട്ടി വിട്ടുവീഴ്ച ചെയ്യരുത്. അത്തരം വിട്ടുവീഴ്ചകള്‍ ആത്മഹത്യാപരമാണ്. ഒത്തുതീര്‍പ്പുകളുണ്ടാക്കി മറ്റു രാഷ്ട്രീയ പാര്‍ട്ടികളെ പോലെ ആകരുത്. പാര്‍ട്ടിക്കകത്തെ ചില പ്രശ്‌നങ്ങള്‍ ഡല്‍ഹി തിരഞ്ഞെടുപ്പിനു ശേഷം ചര്‍ച്ച ചെയ്തു പരിഹരിക്കുമെന്നും അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha