പത്തനംതിട്ടയില്‍ ജനവാസമേഖലയില്‍ മഴ കുറഞ്ഞെങ്കിലും വനത്തില്‍ ഇപ്പോഴും മഴ തുടരുകയാണ്. മൂഴിയാര്‍ അടക്കമുള്ള വനമേഖലകളില്‍ ആദിവാസികള്‍ കുടുങ്ങിക്കിടക്കുന്നു. എ.സി റോഡില്‍ ജലനിരപ്പ് ഉയര്‍ന്നതിനാല്‍ കെ.എസ്.ആര്‍.ടി.സി. സര്‍വീസ് ഭാഗികമായി നിര്‍ത്തിവച്ചിരിക്കുന്നതായി എ.ടി.ഒ അറിയിച്ചു. റോഡിന്റെ പലയിടങ്ങളിലും ബൈക്കുകള്‍ക്ക് പോകാനാകുന്നില്ല. അച്ചന്‍കോവിലാറും മണിമലയാറും കരകവിഞ്ഞ് ഒഴുകുന്നതിനാല്‍ തീരത്ത് താമസിക്കുന്നവര്‍ ജാഗ്രത പാലിക്കണമെന്ന് ആലപ്പുഴ പത്തനംതിട്ട ജില്ലാ ഭരണകൂടങ്ങള്‍ അറിയിച്ചു. അച്ചന്‍ കോവിലിന്റെ തീരപ്രദേശങ്ങളായ ഹരിപ്പാട്, കരുവാറ്റ, വീയപുരം, ചെറുതന,പള്ളിപ്പാട് മേഖലകളില്‍ ജാഗ്രതാ നിര്‍ദ്ദേശം മൈക്കിലൂടെയും മറ്റും അറിയിച്ചിട്ടുണ്ട്. ജലനിരപ്പ് ഉയരാന്‍ സാധ്യതയുള്ളതിനാല്‍ പ്രദേശവാസികള്‍ പ്രധാനപ്പെട്ട രേഖകള്‍, അവശ്യവസ്തുക്കള്‍ എന്നിവ പ്രത്യേകം കിറ്റുകളിലാക്കി സൂക്ഷിക്കണം. ഇത് വീടിന്റെ ഏറ്റവും ഉയര്‍ന്ന ഭാഗങ്ങളിലാണ് സൂക്ഷിക്കേണ്ടതെന്നും കളക്ടര്‍ അറിയിച്ചു.

പമ്പയില്‍ ജലനിരപ്പ് കൂടുകയും കുറയുകയും ചെയ്യുന്നുണ്ട്. വെള്ളം തെളിയുന്നതിനാല്‍ താമസിക്കാതെ ജലനിരപ്പ് താഴുമെന്ന് ജില്ലാ അധികൃതര്‍ അറിയിച്ചു. നാല് ദിവസമായി ജില്ലയിലെ മലയോരമേഖലയില്‍ പലയിടങ്ങളിലും വൈദ്യുതിയില്ല. പല സഥലങ്ങളിലും റേഷന്‍ കടകള്‍ തുറക്കാന്‍ നിര്‍ദ്ദേശം നല്‍കിയിട്ടുണ്ട്. വനത്തില്‍ കുടങ്ങിക്കിടക്കുന്നവര്‍ക്ക് ഭക്ഷണവും വെള്ളവും അടക്കമുള്ള ഭക്ഷണസാധനങ്ങള്‍ എത്തിച്ചു. വൈദ്യസഹായം ആവശ്യമുള്ളവരെ ദുരന്തനിവാരണ സേന പുറത്തെത്തിച്ചു. നാനൂറോളം കുടുംബങ്ങളാണ് ആങ്ങമൂഴിക്കടുത്തുള്ള വനമേഖലയില്‍ ഉണ്ടായിരുന്നത്. ജില്ലയിലെ വന മേഖലയില്‍ നിന്ന് 800 പേരെ മാറ്റി പാര്‍പ്പിച്ചു. രക്ഷാപ്രവര്‍ത്തനങ്ങള്‍ക്കായി 10 ബോട്ടുകള്‍ ഇന്ന് എത്തിച്ചു. പമ്പയുടെ തീരത്ത് കുടുങ്ങിയവരെ വടം ഉപയോഗിച്ച് രക്ഷിച്ചു. 

ആലപ്പുഴ- ചങ്ങനാശേരി റോഡിന്റെ 26 കിലോമീറ്റര്‍ വെള്ളത്തിലായി. ഇരുചക്രവാഹനങ്ങള്‍ക്ക് യാത്ര ബുദ്ധിമുട്ടായി. അതേസമയം മറ്റ് വാഹനങ്ങള്‍ സാവധാനം പോകുന്നുണ്ട്. എം.സി റോഡില്‍ വൈകുന്നേരത്തോടെ ഗതാഗതം പുനസ്ഥാപിക്കുമെന്നാണ് അധികൃതര്‍ അറിയിച്ചിരിക്കുന്നത്. ആലപ്പുഴ വഴിയുള്ള ട്രെയിന്‍ ഗതാഗതം ഉള്‍പ്പെടെ റദ്ദാക്കിയതിനാല്‍ എറണാകുളം മുതല്‍ വടക്കോട്ടുള്ള പ്രദേശങ്ങളിലേക്ക് പോകാന്‍ ആളുകള്‍ ആശ്രയിക്കുന്ന പ്രധാനറോഡാണിത്. കോട്ടയം വഴി ആലപ്പുഴവഴിയുള്ള ട്രെയിനുകള്‍ വഴിതിരിച്ച് വിട്ടിട്ടുണ്ടെങ്കിലും എല്ലാവര്‍ക്കും ട്രെയിനിനെ ആശ്രയിക്കാന്‍ കഴിയില്ല. സ്വകാര്യവാഹനങ്ങളിലടക്കം സഞ്ചരിക്കുന്നവര്‍ എം.സി റോഡിനെയാണ് ആശ്രയിക്കുന്നത്.

പമ്പയില്‍ ജലനിരപ്പ് കുറയുമ്പോള്‍ കുട്ടനാട്ടില്‍ ജലനിരപ്പ് സാധാരണ ഉയരുന്നത് പതിവാണ്. അതിനാല്‍ മുന്നൊരുക്കങ്ങള്‍ അധികൃതര്‍ തുടങ്ങിയിട്ടുണ്ട്. കഴിഞ്ഞ പ്രളയത്തില്‍ തകര്‍ന്ന കുട്ടനാട് ഇതുവരെ മോചിതമായിട്ടില്ല. പല വീടുകള്‍ക്കും കൃഷിയിടങ്ങള്‍ക്കും ചെറുകിട കച്ചവടസ്ഥാപനങ്ങള്‍ക്കും അടക്കം നാശനഷ്ടം സംഭവിച്ചിരുന്നു. അതില്‍ നിന്ന് കരകയറും മുമ്പാണ് മറ്റൊരു പ്രളയം കുട്ടനാട്ടിലേക്ക് എത്തുന്നത്. അപ്പര്‍കുട്ടനാട്ട് മേഖലയില്‍ വെള്ളം കയറിയിട്ടുണ്ടെങ്കിലും കഴിഞ്ഞ തവണത്തെ അത്രയും ജലനിരപ്പ് ഉയര്‍ന്നിട്ടില്ല. മാത്രമല്ല കഴിഞ്ഞതവണത്തെ സാഹചര്യം കണക്കിലെടുത്ത് ചെങ്ങന്നൂരില്‍ നിന്ന് അടക്കം ആളുകള്‍ ആദ്യമേ മാറിത്താമസിച്ചിരുന്നു. പലരും ബന്ധുവീടുകളിലും ക്യാമ്പുകളിലുമാണ് കഴിയുന്നത്.