കേരളത്തിന്റെ സൈന്യം വീണ്ടും അത്ഭുതങ്ങള്‍ സൃഷ്ടിക്കുന്നു. ദുര്‍ഘടമായതിനെ തുടര്‍ന്ന് ഫയര്‍ഫോഴ്‌സ് ഉപേക്ഷിച്ച ദൗത്യം മത്സ്യത്തൊഴിലാളികള്‍ ഏറ്റെടുത്ത് വിജയിപ്പിച്ചു. കണ്ണൂര്‍ ജില്ലയില്‍ മഴ ഏറ്റവും കൂടുതല്‍ നാശംവിതച്ച ശ്രീകണ്ഠാപുരത്ത് മൂന്ന് ദിവസമായി ഭക്ഷണവും വെള്ളവുമില്ലാതെ കുടുങ്ങിക്കിടന്നവരെ മത്സ്യത്തൊഴിലാളികള്‍ രക്ഷിച്ച് കരയ്‌ക്കെത്തിച്ചു. ശക്തമായ കാറ്റും ഒഴുക്കും കാരണം രണ്ട് ദിവസമായി ഫയര്‍ഫോഴ്‌സിനെ ഇവരുടെ അടുത്ത് ചെല്ലാനായിരുന്നില്ല. അന്യസംസഥാന തൊഴിലാളികളാണ് ഇവിടെയൊരു കെട്ടിടത്തില്‍ കുടുങ്ങിയത്. കണ്ണൂരില്‍ നിന്ന് മത്സ്യത്തൊഴിലാളികള്‍ ബോട്ടുമായാണ് എത്തിയത്. മൊത്തം ഏഴ് തൊഴിലാളികളുണ്ടായിരുന്നു. ശക്തമായ മഴയും ഒഴുക്കും അവഗണിച്ചാണ് മത്സ്യത്തൊഴിലാളികള്‍ രക്ഷാപ്രവര്‍ത്തനത്തില്‍ ഏര്‍പ്പെട്ടത്. ഇവരെ ജില്ലാ കളക്ടര്‍ അഭിനന്ദിച്ചു.

മലയോര മേഖലകളില്‍ മഴ ശക്തമായി തുടരുകയാണ്. പുഴയോട് ചേര്‍ന്ന നഗര പ്രദേശങ്ങള്‍ വെള്ളത്താല്‍ ഒറ്റപ്പെട്ട് കിടക്കുകയാണ്. ശ്രീകണ്ഠാപുരം, ഇരിട്ടി, കൊട്ടിയൂര്‍, ഇരിക്കൂര്‍ ടൗണുകളിലും സമീപ പ്രദേശങ്ങളിലും വൈദ്യുതിയും ഗതാഗതവും തടസ്സപ്പെട്ടു. ജില്ലയില്‍ 71 ക്യാമ്പുകളിലായി 8000ത്തിലധികം ആളുകള്‍ കഴിയുന്നുണ്ട്. കനത്ത മഴ തുടരുന്ന സാഹചര്യത്തില്‍ ജില്ലയിലെ ടൂറിസ്റ്റ് കേന്ദ്രങ്ങളിലേക്കുള്ള പ്രവേശനം താല്കാകാലികമായി ഞായറാഴ്ചവരെ നിരോധിക്കുകയാണ്. സഞ്ചാരികളുടെ സുരക്ഷയെ മുന്‍നിര്‍ത്തിയാണ് ജില്ലാ ടൂറിസം പ്രമോഷന്‍ കൗണ്‍സിലിനു കീഴിലുള്ള എല്ലാ കേന്ദ്രങ്ങളിലേക്കുമുള്ള പ്രവേശനം താല്കാലികമായി നിരോധിക്കുന്നത്. ജില്ലയിലെ മുഴുവന്‍ ബീച്ചുകളിലും സഞ്ചാരികള്‍ പ്രവേശിക്കാന്‍ പാടുള്ളതല്ല. വെള്ള ച്ചാട്ടങ്ങളിലേക്കുള്ള പ്രവേശനവും ജലാശയങ്ങള്‍ പുഴകള്‍, നദികള്‍, അവയുടെ തീരപ്രദേശങ്ങള്‍ എന്നിവയുമായി ബന്ധപ്പെട്ടുള്ള വിനോദസഞ്ചാര സംബന്ധിയായ പ്രവര്‍ത്തനങ്ങള്‍ അപകട സാധ്യത മുന്‍നിര്‍ത്തി താല്കാലികമായി നിര്‍ത്തിവെക്കേണ്ടതാണെന്ന് കളക്ടര്‍ന്ന് അറിയിച്ചു.

ജില്ലയില്‍ ശനിയാഴ്ച റെഡ് അലേര്‍ട്ട് പ്രഖ്യാപിച്ചിരിക്കുകയാണ്. നാളെ 11 ന് ഓറഞ്ച് അലേര്‍ട്ടും തിങ്കളും ചൊവ്വയും യെല്ലോ അലേര്‍ട്ടും പ്രഖ്യാപിച്ചിട്ടുണ്ട്. 
ഈ സാഹചര്യത്തില്‍ ജനങ്ങള്‍ അതീവ ജാഗ്രത പുലര്‍ത്തണമെന്നും കളക്ടര്‍ അറിയിച്ചു. റെഡ് അലേര്‍ട്ട് പ്രഖ്യാപിച്ച ദിവസം അതിതീവ്ര മഴയ്ക്കും ഓറഞ്ച് അലേര്‍ട്ട് പ്രഖ്യാപിച്ച ദിവസം ഒറ്റപ്പെട്ടയിടങ്ങളില്‍ ശക്തമായതോ അതിശക്തമായതോ മഴയ്ക്കും സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്
ബന്ധപ്പെട്ട സര്‍ക്കാര്‍ വകുപ്പുകളോടും ഉദ്യോഗസ്ഥരോടും തയ്യാറെടുപ്പുകള്‍ നടത്താനും ആവശ്യമായ ക്രമീകരണങ്ങള്‍ ഉണ്ടാക്കുവാനും നിര്‍ദേശം നല്‍കിയിട്ടുണ്ട്.
മാറി താമസിക്കേണ്ട സാഹചര്യം വരികയാണെങ്കില്‍ അധികൃതര്‍ നിര്‍ദേശിക്കുന്ന സുരക്ഷിത സ്ഥാനത്തേക്ക് മാറിത്താമസിക്കാന്‍ ജനങ്ങള്‍ തയ്യാറാവണമെന്നും കളക്ടറുടെ ഓഫീസ് അറിയിച്ചു.

അഴീക്കലില്‍ നിന്ന് അടക്കമുള്ള മത്സ്യത്തൊഴിലാളികള്‍ തങ്ങളുടെ ബോട്ടുകളും വള്ളങ്ങളുമായി രക്ഷാപ്രവര്‍ത്തനത്തിന് ഇറങ്ങിയത് വലിയ ആശ്വാസമായി. കഴിഞ്ഞ പ്രളയത്തിലും സൈന്യത്തിനും ദുരന്തനിവാരണ സേനയ്ക്കും ഫയര്‍ഫോഴ്‌സിനും എത്താന്‍ കഴിയാത്ത മേഖലകളിലെത്തി ജനങ്ങളെ സുരക്ഷിതമായ ഇടങ്ങളിലേക്ക് മാറ്റിയത് മത്സ്യത്തൊഴിലാളികളായിരുന്നു. ഇത്തവണ മധ്യതിരുവിതാംകൂറില്‍ വലിയതോതില്‍ ജലനിരപ്പ് ഉയരാത്തതിനാലും നേരത്തെ ആളുകള്‍ മാറി താമസിച്ചതിനാലും മത്സ്യത്തൊഴിലാളികളുടെ സഹായം വേണ്ടിവന്നില്ല.