രണ്ട് ദിവസമായി സംസ്ഥാനത്ത് ദുരിരം ഉണ്ടായ പ്രദേശങ്ങളിലെല്ലാം ജീവന്‍ പണയം വെച്ചാണ് സംസ്ഥാന ഫയര്‍ ആന്‍ഡ് റിസ്‌ക്യൂ സേന ജനങ്ങളെയും വളര്‍ത്തുമൃഗങ്ങളെയും അടക്കം രക്ഷപെടുത്തിയത്. രക്ഷാപ്രവര്‍ത്തനത്തിനിടെ ഒരാള്‍ക്ക് അപകടം പറ്റിയതായി സേന തങ്ങളുടെ ഫെയിസ്ബുക്കിലൂടെ അറിയിച്ചു.
കോട്ടയം കടുത്തുരുത്തി യൂണിറ്റിലെ ഫയര്‍മാന്‍ അഭിജിത്തിനാണ് പരിക്കേറ്റത്. പരിക്ക് നിസാരമാണ്. വീടിന് മുകളില്‍ വീണ മരം മുറിക്കുന്നതിനിടെ കാല്‍വഴുതി അഭിജിത്ത് താഴേക്ക് വീഴുകയായിരുന്നു. വിവിധ പ്രളയബാധിത പ്രദേശങ്ങളില്‍ ജീവന്‍ പണയപ്പെടുത്തി രക്ഷാപ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന ഫയര്‍ഫോഴ്‌സ് ജീവനക്കാരെ സഹായിക്കുന്നതിനായി നിലവില്‍ ഫയര്‍ഫോഴ്‌സ് അക്കാദമിയില്‍ പരിശീലനത്തിലിരിക്കുന്ന പുതിയ റിക്രൂട്ട്‌സ് ചേര്‍ന്ന് ഇംപ്രൊവൈസ്ഡ് റാഫ്റ്റ് തയ്യാറാക്കി. 


ഏഴ് മണിക്കുറിന്റെ സാഹസികതക്കൊടുവില്‍ കണ്ണൂര്‍ ബാവലി പുഴയില്‍ മരത്തിലകപ്പെട്ട നാല് യുവാക്കളെ ഇന്ന് ഫയര്‍ഫോഴ്‌സ് രക്ഷപെടുത്തി. പുല്‍പ്പള്ളി പെരികെല്ലൂര്‍ കോളനിയിലെ യുവാക്കളായ സുരേഷ് (22) വിമല്‍ (21) സുധീഷ് (22) രാജു (22) എന്നിവരെയാണ് രക്ഷപെടുത്തിയത്. വെള്ളിയാഴ്ച പുലര്‍ച്ചെ 5.30 തോടെ പുഴ കടക്കുന്നതിനിടെ വെള്ളം കയറിയപ്പോള്‍ മരത്തില്‍ കയറി കൂടിയ മൂന്ന് പേരെ ഇന്ന് വൈകീട്ട് 3.30നും ഒരാളെ 4.30നേുമാണ് കരകെത്തിച്ചത്. 
അടിയന്തിര രക്ഷാപ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന മലപ്പുറം കവളപ്പാറയിലും വയനാട് പുത്തുമലയിലും ഫയര്‍ഫോഴ്‌സ് സേനാംഗങ്ങളെ സഹായിക്കുന്നതിനായി തിരുവനന്തപുരം, കൊല്ലം, കായംകുളം, എന്നിവിടങ്ങളില്‍ നിന്നായി ഫയര്‍ഫോഴ്‌സിന്റെ 30 വീതം അടങ്ങുന്ന മൂന്ന് ടീമിനെ അയച്ചിട്ടുണ്ട്. 

കുത്തിയൊഴുകുന്ന മുവാറ്റുപുഴയാറിനോട് ചേര്‍ന്ന കൊച്ചങ്ങാടി, ചന്ത ക്കടവ്, മാര്‍ക്കറ്റ് , ആരക്കുഴ പ്രദേശങ്ങളില്‍ നിന്നും സ്ത്രീകളും കുട്ടികളും പ്രായമായവരും ആയ നിരവധി പേരേയും സ്വകാര്യ റിസോര്‍ട്ടില്‍ നിന്നും 12 കുടുംബങ്ങള്‍ ഉള്‍പ്പെട്ട 35 വിദേശ ടൂറിസ്റ്റുകളേയും ഫയര്‍ഫോഴ്‌സ് രക്ഷപ്പെടുത്തി. ഇന്ന് രാവിലെ 3.45 ന് 42 യാത്രക്കാരുമായി തിരുവനന്തപുരത്തു നിന്നും മാട്ടുപ്പെട്ടിക്ക് പുറപ്പെട്ട കെ.എസ്.ആര്‍.ടി.സി ബസ് കക്കടാശ്ശേരി എന്ന സ്ഥലത്ത് റോഡില്‍ നെഞ്ചൊപ്പം വെള്ളത്തില്‍ അകപ്പെട്ടു. അവരെ രക്ഷപ്പെടുത്തി ആമ്പുലന്‍സില്‍ രക്ഷാകേന്ദ്രത്തില്‍ ഫയര്‍ഫോഴ്‌സ് എത്തിച്ചു. 

പിന്നീട് റബ്ബര്‍ ഡിങ്കിയില്‍ കെട്ടിടങ്ങളില്‍ കുടുങ്ങിപ്പോയ നിരവധി ആളുകളെ സുരക്ഷിത സ്ഥലങ്ങളില്‍ എത്തിച്ചു. സ്വകാര്യ റിസോര്‍ട്ടില്‍ കുടുങ്ങിയ വിവിധ രാജ്യക്കാരായ വിദേശ ടൂറിസ്റ്റുകളായ 35 പേരെ ഒഴിപ്പിച്ച് മറ്റൊരു റിസോര്‍ട്ടിലേക്ക് സുരക്ഷിതമായി മാറ്റി. തുടര്‍ച്ചയായ 16 മണിക്കൂര്‍ രക്ഷാപ്രവര്‍ത്തനംവൈകുന്നേരമാണ് അവസാനിച്ചത്. തൃശ്ശൂര്‍ കുണ്ടുപാറ മ്യുസിയം ക്രോസ്സ് റോഡില്‍ വെള്ളം കയറിയതിനെ തുടര്‍ന്ന് ജനങ്ങളെ തൃശ്ശൂര്‍ ഫയര്‍ ആന്‍ഡ് റെസ്‌ക്യൂ സ്‌റ്റേഷനിലെ ലീഡിങ് ഫയര്‍മാന്‍ അനില്‍, കണ്ണന്‍,മധു, ഫൈസല്‍, സുമേഷ്. എന്നിവര്‍ മാറ്റി പാര്‍പ്പിച്ചു. പ്രായമായവരെ ചുമന്നാണ് സുരക്ഷിതമായ ഇടങ്ങളില്‍ എത്തിച്ചത്. മലപ്പുറം വളാഞ്ചേരി പട്ടാമ്പി റോഡില്‍ മാട്ടില്‍ മാളിലും കൊട്ടാരം ഭാഗത്തും കുടുങ്ങിയവരെയും ഇന്ന് രക്ഷപെടുത്തി. പത്തനംതിട്ട റാന്നിയില്‍ ഒഴുക്കില്‍പ്പെട്ട ഒരു നാല്‍ക്കാലിയേയും ഫയര്‍ഫോഴ്‌സ് കരയ്‌ക്കെത്തിച്ചു. അങ്ങനെ മനുഷ്യന് മാത്രമല്ല വളര്‍ത്തുമൃഗങ്ങള്‍ക്കും രക്ഷകരായി ഫയര്‍ഫോഴ്‌സ്.