മധ്യകേരളത്തില്‍ മഴയുടെ ശക്തി കുറഞ്ഞു. മഴയുടെ ശക്തി കുറഞ്ഞതോടെ അണക്കെട്ടുകളില്‍ നിന്ന് ഒഴുക്കിവിടുന്ന വെള്ളത്തിന്റെ തോത് കുറച്ചു. പെരിയാര്‍, ചാലക്കുടിപ്പുഴ, മൂവാറ്റുപുഴയാര്‍ എന്നീ നദികളിലെ ജലനിരപ്പ് കഴിഞ്ഞ ദിവസത്തെ അപേക്ഷിച്ച് കുറഞ്ഞിട്ടുണ്ട്. കടുത്ത വെള്ളപ്പൊക്കമുണ്ടായ മൂവാറ്റുപുഴയില്‍ ഉള്‍പ്പെടെ ജലനിരപ്പ് കുറഞ്ഞു.

കോതമംഗലത്തേക്കുള്ള റോഡ് ഗതാഗതം പുനഃസ്ഥാപിച്ചു. ഇവിടെ മാത്രം എട്ടു ദുരിതാശ്വാസ ക്യാമ്പുകള്‍ ഇതിനകം അവസാനിപ്പിച്ചിട്ടുണ്ട്. ചാലക്കുടിപ്പുഴയുടെയും പെരിയാറിന്റെയും തീരപ്രദേശങ്ങളിലും വെള്ളം ഇറങ്ങിത്തുടങ്ങി. എറണാകുളം ജില്ലയില്‍ ഇന്ന് ആകെ 15 ക്യാമ്ബുകള്‍ അവസാനിപ്പിച്ചു.

അതേസമയം, ഷട്ടറുകള്‍ തുറക്കാത്ത ഇടുക്കി, ഇടമലയാര്‍ അണക്കെട്ടുകളുടെ ജലനിരപ്പില്‍ വര്‍ധനവുണ്ടായിട്ടുണ്ട്. എന്നാല്‍, രണ്ടു ഡാമുകളിലും സംഭരണശേഷിയുടെ പകുതിയില്‍ താഴെ മാത്രമേ നിലവില്‍ വെള്ളമുള്ളൂ.
കനത്ത മഴയില്‍ വെള്ളം കയറിയതിനെ തുടര്‍ന്ന് അടച്ചിട്ട നെടുമ്ബാശ്ശേരി വിമാനത്താവളം ഞായറാഴ്ച ഉച്ചയ്ക്ക് 12 മുതല്‍ പ്രവര്‍ത്തനം പുന:രാരംഭിക്കും. വിമാനത്താവളത്തില്‍ കുടുങ്ങിക്കിടന്നിരുന്ന വിമാനങ്ങള്‍ ടെയ്ക്ക് ഓഫ് ചെയ്തു തുടങ്ങി.വെള്ളം ഇറങ്ങിയതിനെ തുടര്‍ന്ന് ആലപ്പുഴചങ്ങനാശ്ശേരി റൂട്ടിലെ ഗതാഗതം പുന:സ്ഥാപിച്ചു. എറണാകുളംആലപ്പുഴകായംകുളം റൂട്ടിലെ ട്രെയിന്‍ സര്‍വീസും പുന:രാരംഭിച്ചിട്ടുണ്ട്.
എന്നാല്‍, അപ്പര്‍ കുട്ടനാട്ടില്‍ വെള്ളം കയറിത്തുടങ്ങിയതിനെ തുടര്‍ന്ന് ആളുകളെ ഒഴിപ്പിക്കുന്നുണ്ട്. ചെങ്ങന്നൂരിലും കുട്ടനാട്ടിലുമായി ഇന്ന് ഏതാനും ക്യാമ്ബുകള്‍ തുറന്നു. ആവശ്യമെങ്കില്‍ കൂടുതല്‍ ക്യാമ്ബുകള്‍ തുറക്കുമെന്ന് അധികൃതര്‍ അറിയിച്ചു.