ആര്‍ ബാലകൃഷ്ണ പിള്ളയ്‌ക്കെതിരെ നിരന്തരം പോരാടി അദ്ദേഹത്തെ ജയിലിലാക്കിയ പ്രതിപക്ഷ നേതാവ് വിഎസ് അച്യുതാനന്ദന്‍ അതേ പിള്ളയ്ക്ക് അനുകൂലമായി ചരടു വലിക്കുന്നു. ബാലകൃഷ്ണ പിള്ളയുടെയും ചീഫ് വിപ്പ് പി.സി.ജോര്‍ജ്ജിന്റേയും നിലപാടുകളെ പരോക്ഷമായി പിന്തുണച്ച് അച്യുതാനന്ദന്‍ രംഗത്തെത്തി. അഴിമതിക്കെതിരായ പോരാട്ടത്തില്‍ ബാലകൃഷ്ണ പിള്ളയോ ജോര്‍ജ്ജോ നിലപാടെടുത്താല്‍ അവരെ പിന്തുണയ്ക്കുമെന്ന് വി.എസ് പറഞ്ഞു. അഴിമതിക്കെതിരെ പോരാടുക എന്നതാണ് ഇടതുമുന്നണിയുടെ നിലപാടെന്നും അദ്ദേഹം കൊല്ലത്ത് മാദ്ധ്യമങ്ങളോട് പറഞ്ഞു.
ബാലകൃഷ്ണ പിള്ളയായാലും ജോര്‍ജ്ജ് ആയാലും അഴിമതിയുമായി ബന്ധപ്പെട്ട് പുറത്ത് പറയുന്നത് ശരിയാണ് എന്ന് ബോദ്ധ്യപ്പെട്ടാല്‍ പിന്തുണയ്ക്കും. ഇക്കാര്യം എല്‍.ഡി.എഫ് ആലോചിച്ച് തീരുമാനിക്കും വി.എസ് പറഞ്ഞു. ഇടമലയാര്‍ കേസില്‍ വി.എസ് കേസ് കൊടുത്തിട്ടാണല്ലോ ബാലകൃഷ്ണ പിള്ളയെ ശിക്ഷിച്ചതെന്ന് ചൂണ്ടിക്കാട്ടിയപ്പോള്‍ അഴിമതിക്കെതിരെ ഇപ്പോള്‍ എന്ത് നിലപാട് അവര്‍ സ്വീകരിക്കുന്നു എന്നാണ് നോക്കേണ്ടതെന്നായിരുന്നു അച്യുതാനന്ദന്റെ മറുപടി.
ആര്‍.ബാലകൃഷ്ണ പിള്ളയെ ഇടതുമുന്നണിയില്‍ എടുക്കുന്ന കാര്യം സി.പി.എം സംസ്ഥാന സെക്രട്ടറി പിണറായി വിജയനും തള്ളിയിരുന്നില്ല. പിള്ളയെ എല്‍.ഡി.എഫില്‍ എടുക്കുന്നത് സംബന്ധിച്ച് യു.ഡി.എഫ് തീരുമാനം അറിഞ്ഞതിനുശേഷം പ്രതികരിക്കുമെന്നായിരുന്നു പിണറായി പറഞ്ഞത്. പിള്ള അഴിമതി ആരോപണം ഉന്നയിച്ചാല്‍ അത് എങ്ങനെ തെറ്റാകുമെന്നും അദ്ദേഹം ചോദിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha