കേരളം ഇപ്പോള്‍ ഹര്‍ത്താലിന്റെ ആലസ്യത്തിലാണ്. ജനത്തെ ബാധിക്കുന്ന പൊള്ളുന്ന നൂറ് പ്രശ്‌നങ്ങള്‍ ഉള്ളപ്പോള്‍ അസ്ഥാനത്തുള്ള ഈ ഹര്‍ത്താല്‍ എന്തിനെന്ന് പാവം പൊതു ജനത്തിനും അറിയില്ല. 

തുടര്‍ച്ചയായ മാധ്യമ വിചാരണ, ചാനല്‍ റേറ്റിംഗിനായുള്ള മത്സരം, ഇവയ്ക്കപ്പുറം വിശ്വസനീയമായ തെളിവുകളൊന്നുമില്ല. ആരോപണങ്ങളുടെ പുകമറയ്ക്കപ്പുറം വസ്തുതകളുമില്ല. കാര്യങ്ങള്‍ ഇങ്ങനെയായിരിക്കേ കേരളത്തില്‍ മദ്യനിരോധനം എര്‍പ്പെടുത്തിയപ്പോള്‍ കോടിക്കണക്കിന് രൂപ വരുമാനത്തില്‍ കുറവ് വരുമെന്ന് ഒരു മദ്യവ്യാപാരി. പ്രത്യേകിച്ച് ഏറെ കളങ്കിത താല്‍പര്യമുള്ളയാള്‍ ഒരു വൈകുന്നേരം ചാനലില്‍ പ്രത്യക്ഷപ്പെട്ട് കെ എം മാണിയെന്ന അതികായനെതിരെ ഒരാരോപണം ഉന്നയിക്കുന്നു. പിന്നെ കൃത്യമായ തിരക്കഥയെന്നപോലെ നാടകം മുന്നേറുന്നു. ചാനലുകള്‍ റേറ്റിംഗിനായി കളിമൂര്‍ഛിപ്പിക്കുന്നു. രംഗം കൊഴുക്കുന്നു. തെളിവുകള്‍ സ്ഥാപിക്കാന്‍ ആരോപണമുന്നയിച്ചയാള്‍ പലകുറുക്കുവഴികളും തേടുന്നു. രാഷ്ടീയ വൈരിയെ പറ്റിക്കാന്‍ കിട്ടിയ അവസരമുപയോഗിച്ച പിള്ളയും, കുതികാല്‍വെട്ടി സ്വയം നേതാവാകാന്‍ തരം പാര്‍ത്തിരുന്നയാളും എരിതീ പകര്‍ന്നു. സുഹൃത്തുക്കളെ വിളിച്ചിരുത്തി നാട്ടില്‍ പരക്കുന്ന കഥകള്‍ പറയിച്ച് മദ്യസത്കാരത്തിനിടയില്‍ പലവീമ്പും വിളിച്ച് പറഞ്ഞ്‌ അവയൊക്കെ റെക്കോര്‍ഡ് ചെയ്ത് എഡിറ്റ് ചെയ്ത് തെളിവുണ്ടാക്കി! ഇവയ്ക്കപ്പുറം എന്താണുള്ളത്.

അഴിമതി നടന്നിട്ടുണ്ടെങ്കില്‍ അതിനെ മലയാളിവാര്‍ത്ത ന്യായീകരിക്കാനൊരുങ്ങുന്നില്ല. പക്ഷേ തന്റെ വകുപ്പല്ലാത്ത, നിയമപരമായി ഒരവകാശവുമില്ലാത്ത ഒരു നയത്തിന്റെ പേരില്‍, ഫയലിന്റെ പേരിലാണോ കെഎം മാണി പണപ്പിരിവ് നടത്തിയത്. ഇത് ഏറെ സംശയങ്ങളുണര്‍ത്തുന്നു. ഇവിടെ ഒന്നേയുള്ളു കെ എം മാണിയുടെ രാജി ആവശ്യപ്പെടുന്നത് എന്ത് തെളിവുകളുടെ, എന്തെല്ലാം വസ്തുതകളുടെ അടിസ്ഥാനത്തിലാണ് എന്ന് ആരോപണമുന്നയിക്കുന്നവര്‍ വെളിപ്പെടുത്തണം.

കൃത്രിമമായി സൃഷ്ടിച്ച ഒരു ചാരക്കേസില്‍ കേരളത്തിന്റെ മുന്‍ മുഖ്യമന്ത്രിയും രാഷ്ടീയ അതികായനുമായിരുന്ന കെ കരുണാകരന്റെ രാഷ്ടീയ ജീവിതം അവസാനിപ്പിക്കാന്‍ നടത്തിയ ഗൂഢാലോചന പുറത്ത് വരുകയും അദ്ദേഹം നിരപരാധിയാണെന്ന് കേരളം പിന്നീട് തിരിച്ചറിയുകയും ചെയ്ത അനുഭവമാണ് നമുക്കുള്ളത്.
കേരള കോണ്‍ഗ്രസ് അവകാശപ്പെടുന്നത് പോലെ ഇതൊരു രാഷ്ടീയ ഗൂഢാലോചനയാണോ? 83 വയസുള്ള ഒരാളെ വ്യക്തിഹത്യ ചെയ്ത് ആ പ്രസ്ഥാനത്തെ തകര്‍ക്കലാണോ ആരോപണത്തിന് പിന്നില്‍. ഒരുപാട് സംശയങ്ങള്‍ ബാക്കിയാകുന്നു.
ഇവിടെ ഇടതുപക്ഷവും പ്രത്യേകിച്ച് സിപിഐയും ബിജെപിയും രാഷ്ടീയം കളിക്കുകയാണ്. കെ.എം.മാണിക്കെതിരെയുള്ള ആരോപണങ്ങളുടെ സത്യസന്ധത മനസിലാക്കിയുള്ള പ്രതിഷേധമല്ലയത്. വെറും രാഷ്ടീയ മുതലെടുപ്പുകള്‍. സമരം ഉയര്‍ത്തിക്കാട്ടി മാണിയെ പേടിപ്പിക്കുക. വിറളിപിടിപ്പിക്കുക, എങ്ങനെയെങ്കിലും തങ്ങളുടെ പാളയത്തിലെത്തിക്കാന്‍ നോക്കുക.
ജനങ്ങളോടാണ് ഇവര്‍ക്ക് ആത്മാര്‍ഥതയെങ്കില്‍ 20കോടി രൂപയുടെ അഴിമതി തെളിയിക്കാന്‍ ഒരു ചെറുവിരല്‍പോലും ആരും എന്തേ അനക്കുന്നില്ല. തങ്ങളിലേക്ക് തിരിഞ്ഞ് കുത്തുമോ എന്ന ഭയം. എന്താണ് മാധ്യമങ്ങള്‍ യാഥാര്‍ത്ഥ്യം അംഗീകരിക്കാത്തത്. ബിജുരമേശ് ഇട്ട് കൊടുക്കുന്ന വാര്‍ത്തകള്‍ എക്‌സ്‌ക്ലൂസീവുകളാണെന്ന രീതിയില്‍ ജനങ്ങളെ പറ്റിക്കാനാണ് ചാനലുകാര്‍ മത്സരിക്കുന്നത്.
കേസ് വിജിലന്‍സ് അന്വേഷിക്കട്ടെ, സത്യം പുറത്ത് വരട്ടെ, സ്രെട്ടറിയേറ്റിനുമുന്നില്‍ നിന്ന് വെല്ലുവിളിച്ച വിഎസ്, കോണ്‍ഗ്രസ് ഒന്നു തിരിച്ച് വിരട്ടിയപ്പോള്‍ മാളത്തിലൊളിച്ചു. മകന് വേണ്ടി ഒരഡ്ജസ്റ്റ്‌മെന്റ് വിരട്ടലിന്റെ കാര്‍ഡിറക്കി. അതേയുള്ളു.
ബിജുരമേശ് പോലും പറഞ്ഞു, മറ്റുള്ളവരുടെ പേര് പറഞ്ഞാല്‍ താന്‍ വെള്ളം കുടിക്കുമെന്ന്. അപ്പോള്‍ ഭീഷണി ആരുടെ അടുക്കല്‍ നിന്നാണ്. മാണി അഴിമതി നടത്തിയെങ്കില്‍ അത് പുറത്ത് കൊണ്ടു വരാന്‍എന്ത് ശ്രമമാണ് പ്രതിപക്ഷം നടത്തിയത്. മാധ്യമങ്ങളുടെ ഭാഗത്ത് നിന്ന് ആത്മാര്‍ഥമായ ശ്രമങ്ങള്‍ വല്ലതുമുണ്ടായോ, മാതൃഭൂമി ചാനല്‍ പുറത്ത് വിട്ട എക്‌സ്‌ക്ലൂസീവ് സ്റ്റോറി പിന്നെ ആരും പിന്തുടര്‍ന്നില്ല.

 ഇവിടെ ജനങ്ങള്‍ വിഡ്ഢിയാക്കപ്പെടുന്നു. യുഡിഎഫിനെ ദുര്‍ബലമാക്കി മുന്നണിയില്‍ നുഴഞ്ഞ്‌ കയറാനാണ് സിപി ഐ ശ്രമിക്കുന്നത്. അവര്‍ സിപിഐയെ വെട്ടിലാക്കിയാണ് മുന്നോട്ട് പോകുന്നത്. കേരളാകോണ്‍ഗ്രസിനെ തകര്‍ക്കാന്‍ സിപിഎമ്മിനെയും മാണിയെയും തമ്മിലടിപ്പിച്ച് ചോരകുടിക്കാന്‍ ഒരു കളി.
ജനം പരസ്പരം ചോദിക്കുന്നു. ഞങ്ങളെ വിഡ്ഢികളാക്കാനാണോ ഈ ഹര്‍ത്താല്‍? ആര്‍ക്കുവേണ്ടി, കെഎം മാണിക്കെതിരെ കുറ്റപത്രമില്ല, ആരോപണത്തിന്റെ പുക മാത്രം!

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha