നടി മഞ്ജുവാര്യര്‍ അടക്കമുള്ള 30 അംഗ സംഘം ഹിമാചല്‍ പ്രദേശിലെ ഉള്‍നാടന്‍ ഗ്രാമമായ ഛത്രുവില്‍ കുടുങ്ങിക്കിടക്കുന്നു. സംഭവം ശ്രദ്ധയില്‍പെട്ട കേന്ദ്രവിദേശകാര്യസഹ മന്ത്രി വി.മുരളീധരന്‍ ഹിമാചല്‍ മുഖ്യമന്ത്രി ജയ്‌റാം ടാ്കകൂറുമായി ബന്ധപ്പെട്ടു. ഛത്രൂ ഉള്‍പ്പെട്ട പ്രദേശത്തെ എം.എല്‍.എ കൂടിയായ മുഖ്യമന്ത്രി പ്രശ്‌നത്തില്‍ ഇടപെടാമെന്ന് ഉറപ്പ് നല്‍കിയതായി വി. മുരളീധരന്‍ മാധ്യമങ്ങളെ അറിയിച്ചു. വൈകുന്നേരത്തോടെ ഇവരെ രക്ഷപെടുത്തുമെന്നാണ് അറിയുന്നത്. മഴയിലും മണ്ണിടിച്ചിലിലും റോഡ് ഒലിച്ചുപോയതിനാല്‍ എയര്‍ലിഫ്റ്റ് ചെയ്യുകയേ മാര്‍ഗമുള്ളൂ എന്ന് മഞ്ജുവാര്യരുടെ സഹോദരന്‍ മധുവാര്യര്‍ പറഞ്ഞു. ഇന്നലെ രാത്രി സാറ്റലൈറ്റ് ഫോണിലൂടെ മധുവിനെ മഞ്ജു വിളിച്ചിരുന്നു. രണ്ട് ദിവസത്തേക്കുള്ള ഭക്ഷണം മാത്രമേ സംഘത്തിന്റെ കൈവശമുള്ളൂ എന്നും മധുവാര്യര്‍ പറഞ്ഞു. 

പ്രദേശത്ത് 200റോളം പേരാണ് കുടുങ്ങിക്കിടക്കുന്നത്. മൂന്നാഴ്ച മുമ്പാണ് സനല്‍കുമാര്‍ ശശീധരന്റെ പുതിയ ചിത്രത്തിന്റെ ചിത്രീകരണത്തിന് മഞ്ജുവാര്യര്‍ ഉള്‍പ്പെടെയുള്ളവര്‍ ഹിമാചല്‍ പ്രദേശില്‍ എത്തിയത്. സിംലയില്‍ നിന്ന് 330 കിലോമീറ്റര്‍ അകലെയാണ് ഛത്രു ഗ്രാമം. ഇവരെ സിംലയിലേക്ക് കൊണ്ടുവരാന്‍ സൈന്യത്തിന്റെ ഉള്‍പ്പെടെ സേവനം ഹിമാചല്‍ സര്‍ക്കാര്‍ തേടിയതായാണ് അറിയുന്നത്. സമുദ്രനിരപ്പില്‍ നിന്നും 11000 അടി ഉയരത്തില്‍ സ്ഥിതി ചെയ്യുന്ന സ്ഥലമാണിത്. ഹോട്ടലുകളൊന്നും ഇല്ലാത്ത സ്ഥലമായതിനാല്‍ ടെന്റ് കെട്ടിയാണ് ഷൂട്ടിംഗ് സംഘം താമസിക്കുന്നത്. പര്‍വതാരോഹണവും ഛത്രുവിലെ ഗ്രാമവാസികളുടെ ജീവിതവും ആസ്പദമാക്കിയാണ് സനല്‍കുമാര്‍ ശശിധരന്‍ കയറ്റം സിനിമ ഒരുക്കുന്നത്. 

സനല്‍കുമാര്‍ ശശിധരന്റെ ഒരാള്‍പൊക്കം എന്ന ചിത്രം ഹിമാചല്‍ പ്രദേശിലാണ് ചിത്രീകരിച്ചത്. അന്ന് ഛത്രു ഉള്‍പ്പെടെയുള്ള ഗ്രാമങ്ങളില്‍ പോയിരുന്നു. ആ അനുഭവങ്ങളുടെ പശ്ചാത്തലത്തിലാണ് ഇങ്ങിനെയൊരു സിനിമ എടുക്കാന്‍ തീരുമാനിച്ചത്. മൂന്നാ്ച മുമ്പ് അവിടെ എത്തിയപ്പോള്‍ ജനജീവിതം സാധാരണഗതിയിലായിരുന്നു. എന്നാല്‍ പെട്ടെന്നാണ് കാര്യങ്ങള്‍ മാറിമറിഞ്ഞത്. വളരെ ചെറിയ ബജറ്റിലാണ് സിനിമ ഒരുക്കുന്നത്. സംവിധായകനിലുള്ള വിശ്വാസം കൊണ്ടാണ് മഞ്ജു അഭിനയിക്കാന്‍ തയ്യാറായത്. മികച്ച സംവിധായകനുള്ള സംസ്ഥാന അവാര്‍ഡ് സനല്‍കുമാര്‍ ശശിധരന് 2014ല്‍ ഒരാള്‍പൊക്കത്തിന് ലഭിച്ചിരുന്നു.

കനത്ത മഴയിലും പ്രളയത്തിലും വിറങ്ങലിച്ചുനില്‍ക്കുകയാണ് ഉത്തരേന്ത്യ. പല സംസ്ഥാനങ്ങളിലും സഞ്ചാരികള്‍ ഉള്‍പ്പെടെ കുടുങ്ങിക്കിടക്കുകയാണ്. പ്രളയക്കെടുതിയില്‍ മരണം 80 കടന്നു. ഉത്തരാഖണ്ഡിലും ഹിമാചല്‍ പ്രദേശിലും മഴ തുടരുകയാണ്. ഉത്തരാഖണ്ഡില്‍ ഗംഗ, അളകനന്ദ, മന്ദാകിനി നദികള്‍ കരകവിഞ്ഞത് ഒഴുകുകയാണ്. കേന്ദ്രദുരന്തനിവാരണ അതോറിട്ടിയും സൈന്യവും ഉള്‍പ്പെടെ രക്ഷാപ്രവര്‍ത്തനം നടത്തുന്നുണ്ട്.