വീട്ടിൽ ഉണ്ടാക്കുന്ന രുചികളോട് മലയാളികള്‍ക്കുള്ള ഇഷ്ട്ടം ചെറുതല്ല. അങ്ങനെ ആഗ്രഹിക്കുന്നവർക്ക് വീട്ടിലെ ഭക്ഷണം കഴിക്കാനുളള അവസരമൊരുക്കി കോഴിക്കോട് നിന്നൊരു ആപ് കൊച്ചിയിൽ വരുന്നു. വീട്ടമ്മമാരാണ് രുചിയേറിയ ഭക്ഷണം ഉണ്ടാക്കുന്നത്. ഇതിലൂടെ സ്ത്രീകള്‍ക്കൊരു വരുമാനമാര്‍ഗവും ഒരുങ്ങുകയാണ്. സ്ത്രീകള്‍ വീട്ടിലുണ്ടാക്കുന്ന ചൂട് ദോശ, പുട്ട്, ഇടിയപ്പം, ചോറും മീന്‍കറി തുടങ്ങിയവ ഓണ്‍ലൈനായി വിതരണം ചെയ്യും. 'ഡൈനപ്‌സ്' ആപ്പാണ് ഇതിനായി ഒരുങ്ങുന്നത്. കോഴിക്കോട് ആസ്ഥാനമായ എക്ലെറ്റിക് ഈറ്റ്‌സ് എന്ന സ്റ്റാര്‍ട്ടപ്പാണ് ഈ ആപ്പ് വികസിപ്പിച്ചിരിക്കുന്നത്. ആവശ്യക്കാരന്‍ ഉള്ളിടത്ത് അഞ്ച് കിലോമീറ്റര്‍ ചുറ്റളവില്‍ നിന്ന് ഭക്ഷണം ഓര്‍ഡര്‍ ചെയ്യാൻ കഴിയും. പണം ഓണ്‍ലൈനായി അടയ്ക്കാവുന്നതാണ്. ഭക്ഷണം മുന്‍കൂട്ടി ഏര്‍പ്പാടാക്കാനും സൗകര്യമൊരുക്കുന്നുണ്ട്. അമേരിക്കയില്‍ സിവില്‍ എന്‍ജിനിയറായ സജ്‌ന എന്ന കോഴിക്കോട്ടുകാരിയാണ് ഈ ആപ് വികസിപ്പിച്ചെടുത്തത്. രുചികരമായ ഭക്ഷണം ഉണ്ടാക്കാനറിയുന്ന സ്ത്രീകളുടെ കഴിവ് ഉപയോഗപ്രദമാക്കാനുള്ള വഴി കൂടിയാണ് ഇ ആപ്പ്.

ഗൂഗില്‍ പ്ലേ സ്‌റ്റോറില്‍ ലഭ്യമായ ആപ്പിന്റെ ഐഒഎസ് പതിപ്പ് ഉടന്‍ ഇറങ്ങും. പാചകം ഒരു തൊഴിലാക്കാന്‍ താല്‍പ്പര്യമുള്ള സ്ത്രീകള്‍ക്ക് ആപ്പില്‍ ഷെഫ് ആയി രജിസ്റ്റര്‍ ചെയ്യാവുന്നതാണ്. രുചികരമായ ഭക്ഷണം ഉണ്ടാക്കാനുള്ള കഴിവും എഫ്‌എസ്‌എസ്‌എഐ സര്‍ട്ടിഫിക്കറ്റും ഒരു ബാങ്ക് അക്കൗണ്ടും മാത്രമാണ് ഇതിനാവശ്യം. വിഭവങ്ങളും വിലയും ഷെഫിന് തീരുമാനിക്കാവുന്നതാണ്. ഓരോ ദിവസവും എന്താണ് ഉണ്ടാക്കുക എന്ന് മുന്‍കൂട്ടി പറയാനും വിഭവത്തെക്കുറിച്ചുള്ള വിശദ വിവരങ്ങൾ പോസ്റ്റ് ചെയ്യാനും കഴിയുന്നതാണ്. സ്ത്രീകളുണ്ടാക്കുന്ന ഭക്ഷണമാണ് വിതരണം ചെയ്യുന്നതെന്ന് ഉറപ്പുവരുത്തുമെന്ന് ആപ്പിന്റെ ഓപ്പറേഷന്‍ മാനേജര്‍ റാഷിദ ലുഖ്മാന്‍ അറിയിച്ചു. കഴിച്ച ഭക്ഷണത്തെ കുറിച്ച്‌ പ്രതികരണം അറിയിക്കാനും സൗകര്യം ഒരുക്കുന്നുണ്ട്. ഡൈനപ്‌സ് ആപ് ഏപ്രില്‍ മുതല്‍ കോഴിക്കോട് പ്രവര്‍ത്തനം ആരംഭിച്ച്‌ തുടങ്ങി.