കേരളത്തിൽ ഇന്നും നാളെയും ഒറ്റപ്പെട്ട മഴയ്ക്ക് സാധ്യത... ഇന്നും നാളെയും ഒറ്റപ്പെട്ട ശക്തമായ മഴയ്ക്ക് സാദ്ധ്യതയുണ്ടെന്ന് കാലവസ്ഥാ വകുപ്പ് . ഇന്ന് പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും നാളെ പത്തനംതിട്ട, ഇടുക്കി, എറണാകുളം, പാലക്കാട് ജില്ലകളിലും യെല്ലോ അലർട്ടാണ്.

വടക്കൻ ബംഗാൾ ഉൾക്കടലിനും അതിനോട് ചേർന്ന ബംഗ്ലാദേശ് തീരപ്രദേശത്തിനും മുകളിലായി സ്ഥിതിചെയ്തിരുന്ന ചക്രവാതചുഴി ന്യൂനമർദ്ദമായി ശക്തി പ്രാപിച്ചതാണ് മഴയ്ക്ക് സാഹചര്യമൊരുക്കുന്നത്. ഇന്നലെ ആലപ്പുഴ, എറണാകുളം ജില്ലകളിൽ യെല്ലോ അലർട്ട് നൽകിയിരുന്നെങ്കിലും പ്രതീക്ഷിച്ച മഴ സാഹചര്യമില്ലാത്തിനാൽ പിൻവലിക്കുകയായിരുന്നു.

കള്ളക്കടൽ പ്രതിഭാസത്തിന്റെ ഭാഗമായി തിരുവനന്തപുരം ജില്ലയിലെ തീരങ്ങളിൽ ഇന്ന് രാവിലെ 8.30 വരെയും കന്യാകുമാരി തീരത്ത് രാത്രി 11.30 വരെയും കടലാക്രമണത്തിന് സാദ്ധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം.

അതേസമയം സംസ്ഥാനത്ത് താപനിലയിലും വർദ്ധനവ് തുടരുന്നു. ഇന്നലെ പുനലൂരിൽ 35.2 ഡിഗ്രി താപനില രേഖപ്പെടുത്തി. കോട്ടയം, പാലക്കാട് ജില്ലകളിലും 35 ഡിഗ്രിയിലെത്തി. കണ്ണൂർ, കൊച്ചി, കോഴിക്കോട്, തിരുവനന്തപുരം എന്നിവിടങ്ങളിൽ 34 ഡ്രിഗിക്ക് മുകളിലായിരുന്നു ചൂട്.