സംസ്ഥാനത്ത് വീണ്ടും മഴ ശക്തിപ്രാപിക്കുന്നു. ഞായറാഴ്ച വരെ മഴ തുടരുന്നതിനാല്‍ കേന്ദ്രകാലാവസ്ഥാ നിരീക്ഷണകേന്ദ്രം അഞ്ച് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. കോട്ടയം, എറണാകുളം, ഇടുക്കി, മലപ്പുറം, വയനാട് ജില്ലകളിലാണ് യെല്ലോ അലര്‍ട്ട് പ്രഖ്യാപിച്ചത്. വെള്ളിയാഴ്ച ഇടുക്കി, തൃശ്ശൂര്‍, മലപ്പുറം, കോഴിക്കോട്, കണ്ണൂര്‍ ജില്ലകളിലും യെല്ലോ അലേര്‍ട്ട് പ്രഖ്യാപിച്ചിട്ടുണ്ട്. ശനിയാഴ്ചയും മലപ്പുറം, കോഴിക്കോട്, കണ്ണൂര്‍ ജില്ലകളില്‍ യെല്ലോ അലേര്‍ട്ട് തുടരും. ഇത് ഉത്തരകേരളത്തിലെ ജനങ്ങളെ ആശങ്കയിലാഴ്ത്തി. അറബിക്കടലില്‍ തെക്കുപടിഞ്ഞാറ് ദിശയിലായി 45 മുതല്‍ 55 കിലോമീറ്റര്‍ വരെ വേഗതില്‍ കാറ്റു വീശാന്‍ സാധ്യത ഉള്ളതിനാല്‍ ഇന്നും നാളെയും മത്സ്യത്തൊഴിലാളികള്‍ ജാഗ്രതാ പിലിക്കണമെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കി. അങ്ങനെ സംസ്ഥാനം വീണ്ടും പ്രകൃതി ദുരന്തങ്ങളെ നേരിടാന്‍ സജ്ജമായി.

മുന്നറിയിപ്പ് നല്‍കിയിട്ടുള്ള ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചിട്ടില്ല. സാഹചര്യങ്ങള്‍ക്ക് അനുസരിച്ച് ജില്ലാ കളക്ടര്‍മാര്‍ അവധി പ്രഖ്യാപിക്കും. ജാഗ്രതാനിര്‍ദ്ദേശത്തിന്റെ ഭാഗമായി മണ്ണിടിച്ചില്‍ ഭീഷണിയുളള മേഖലകളിലുള്ളവരെ മാറ്റും. സംസ്ഥാനത്ത് 838 വീടുകള്‍ പൂര്‍ണമായും 8718 വീടുകള്‍ ഭാഗികമായും തകര്‍ന്നിട്ടുണ്ട്. ദുരിതാശ്വാസ ക്യാമ്പുകളുടെ എണ്ണം വെട്ടിക്കുറച്ചതിനാല്‍ ഒഴിപ്പിക്കുന്ന പ്രദേശങ്ങളിലെ ആളുകളെ എവിടെ പാര്‍പ്പിക്കുമെന്ന് താമസിക്കാതെ തീരുമാനിക്കും. മലപ്പുറത്ത് പലരും ദൂരെയുള്ള ക്യാമ്പുകളിലേക്ക് മാറാന്‍ തയ്യാറായിട്ടില്ല. ഇവരില്‍ പലരുടെയും വീടുകള്‍ വാസയോഗ്യമല്ല. പല വീടുകളിലെയും ചെളിയും മണ്ണും മാറ്റുന്നതിന് വലിയ പണച്ചെലവുണ്ട്. സര്‍ക്കാരിന്റെ അടിയന്തരസഹായം പോലും വിതരണം ചെയ്ത് തുടങ്ങിയിട്ടില്ല. തിരുവനന്തപുരം ജില്ലാ പഞ്ചായത്തിന്റെയും നഗരസഭയുടെയും അടക്കം സന്നദ്ധപ്രവര്‍ത്തകര്‍ ശുചീകരണത്തിനായി ജില്ലയില്‍ എത്തിയിട്ടുണ്ടെങ്കിലും അവര്‍ക്ക് എല്ലായിടത്തും ചെന്നെത്താന്‍ കഴിയില്ല.

നാളെ കോട്ടയം, എറണാകുളം, ഇടുക്കി, മലപ്പുറം, വയനാട് ജില്ലകളിലും 23ന് മലപ്പുറം, കണ്ണൂര്‍, കാസര്‍കോട് ജില്ലകളിലും യെല്ലോ അലര്‍ട്ട് പ്രഖ്യാപിച്ചതിനാല്‍ ദുരിതാശ്വാസ പ്രവര്‍ത്തനങ്ങളെ സാരമായി ബാധിക്കും. ശനിയാഴ്ച ഇടുക്കി, തൃശ്ശൂര്‍, മലപ്പുറം, കോഴിക്കോട്, കണ്ണൂര്‍ ജില്ലകളില്‍ ജാഗ്രതാ നിര്‍ദേശം നല്‍കിയിട്ടുണ്ട്.